കോഴിക്കോട് : കരിപ്പൂർ വിമാനത്താവളം വഴി കടത്താൻ ശ്രമിച്ച സ്വർണം തട്ടിയെടുക്കാൻ എത്തിയ സംഘത്തിലെ നാല് പേരെ പോലീസ് അറസ്റ്റ് ചെയ്തു.
മുക്കം സ്വദേശി അലി ഉബൈരാൻ (24), സഹോദരൻ ഉബൈദ് അക്ബർ (19), പരപ്പൻപൊയിൽ സ്വദേശി കുന്നുമ്മൽ ഗസ്വാൻ ഇബിൻ റഷീദ് (20), മുക്കം സ്വദേശി അർഷാദ് (24) എന്നിവരാണ് പിടിയിലായത്.
കള്ളക്കടത്ത് സ്വർണം തട്ടിയെടുക്കാൻ കോഴിക്കോട് വിമാനത്താവളത്തിൽ എത്തിയതിനാണ് ഇവരെ പോലീസ് അറസ്റ്റ് ചെയ്തത്. പ്രതികൾക്ക് വാഹനം നൽകിയതിനും ഒളിത്താവളം ഒരുക്കിയതിനുമാണ് അലി ഉബൈരാനെതിരെ കേസെടുത്തിട്ടുള്ളത്.
കൊണ്ടോട്ടി ഡെപ്യൂട്ടി സൂപ്രണ്ട് ഓഫ് പോലീസ് കെ. അഷ്റഫിന്റെ നേതൃത്വത്തിലുള്ള അന്വേഷണ സംഘമാണ് ഇവരെ പിടികൂടിയത്. പ്രതികൾ ഉപയോഗിച്ച വാഹനവും പോലീസ് കസ്റ്റഡിയിലെടുത്തിട്ടുണ്ട്.
അറസ്റ്റിലായ യുവാക്കൾക്ക് കൊടുവള്ളി, ചെറുപ്പളശ്ശേരി, താമരശ്ശേരി തുടങ്ങിയ മേഖലകളിൽ പ്രവർത്തിക്കുന്ന സ്വർണക്കടത്ത്-ക്വട്ടേഷൻ സംഘങ്ങളുമായി അടുത്ത ബന്ധമുണ്ടെന്നാണ് പോലീസ് സംശയിക്കുന്നത്. ഇവരുടെ ബാങ്ക് അക്കൗണ്ടുകളും സാമ്പത്തിക ഇടപാടുകളും പോലീസ് വിശദമായി പരിശോധിച്ചുവരുന്നു.
