തിരുവനന്തപുരം: സിഎംആര്‍എല്‍-എക്‌സാലോജിക് അഴിമതിയാരോപണ കേസില്‍ ഇതുവരെ എഫ്‌ഐആര്‍ രജിസ്റ്റര്‍ ചെയ്യാത്തത് എന്താണെന്ന് വിജിലന്‍സിനോട് ഹൈക്കോടതി. ഗുരുതരമായ കുറ്റകൃത്യങ്ങള്‍ നടന്നിട്ടുണ്ടെന്ന് പ്രഥമദൃഷ്ട്യാ ബോധ്യപ്പെട്ടിട്ടും നടപടികള്‍ വൈകുന്നതിലെ അതൃപ്തിയും കോടതി പ്രകടിപ്പിച്ചു. വിശദമായ വാദം കേള്‍ക്കാമെന്നും മുദ്രവെച്ച കവറില്‍ വിവരങ്ങള്‍ കൈമാറണമെന്നും വിജിലന്‍സിനോട് കോടതി ആവശ്യപ്പെട്ടു.
എഫ്‌ഐആര്‍ രജിസ്റ്റര്‍ ചെയ്തില്ലെങ്കിലും വിഷയത്തില്‍ പ്രാഥമിക അന്വേഷണം ഊര്‍ജ്ജിതമായി നടക്കുന്നുണ്ട് എന്ന് സര്‍ക്കാരിന് വേണ്ടി ഹാജരായ അഭിഭാഷകന്‍ കോടതിയെ അറിയിച്ചു. പൊതുപ്രവര്‍ത്തകനായ കെ.എം.ഷാജഹാനാണ് ഈ കേസില്‍ വിജിലന്‍സ് അന്വഷണം വേണമെന്ന് ആവശ്യപ്പെട്ട് ഹൈക്കോടതിയെ സമീപിച്ചത്. ഈ ഹര്‍ജി പരിഗണിക്കവേയാണ് എന്തുകൊണ്ട് എഫ്‌ഐആര്‍ രജിസ്റ്റര്‍ ചെയ്യുന്നില്ലെന്ന ചോദ്യം കോടതി ഉയര്‍ത്തിയത്.
എന്‍ഫോഴ്‌സ്‌മെന്റ് ഡയറക്ടറേറ്റ് നല്‍കിയ കത്തിന്റെ പൂര്‍ണ്ണരൂപം ഹാജരാക്കാനും സര്‍ക്കാര്‍ അഭിഭാഷകനോട് കോടതി ആവശ്യപ്പെട്ടു. മുദ്രവെച്ച കവറില്‍ വിശദാംശങ്ങള്‍ കൈമാറാമെന്ന് ഇഡിയും കോടതിയെ അറിയിച്ചു. ഡിജിപിക്ക് കത്ത് കൈമാറിയത് വ്യക്തമായ ചില കണ്ടെത്തലുകളുടെ അടിസ്ഥാനത്തില്‍ ആണെന്നും എഫ്‌ഐആര്‍ രജിസ്റ്റര്‍ ചെയ്തുതന്നെ അന്വേഷണം നടത്തണമെന്നുമാണ് ഇഡി ആവശ്യപ്പെടുന്നത്.
