കൊച്ചി: വീട്ടില് നിന്ന് അളവില് കൂടുതല് മദ്യം കണ്ടെടുത്ത കേസില് അബ്കാരി ആക്ട് പ്രകാരം റിപ്പോര്ട്ടര് ടി വി എം ഡി ആന്റോ അഗസ്റ്റിനെ അറസ്റ്റ് ചെയ്തു. മെസിയുടെ സന്ദര്ശനവുമായി ബന്ധപ്പെട്ട തട്ടിപ്പില് പൊലീസ് നടത്തിയ തിരച്ചലില് ആണ് വീട്ടില് നിന്ന് മദ്യം കണ്ടെത്തിയത്. റെയ്ഡിനിടെ 67 ലിറ്റര് മദ്യവും കണ്ടെടുത്തിരുന്നു. അതില് 43 ലിറ്റര് വിദേശ നിര്മിത മദ്യമാണ്. കൂടാതെ വൈനും കണ്ടെടുത്തിട്ടുണ്ട്.
എസ്ഐടി അറിയിച്ചതിനെത്തുടര്ന്ന് എക്സൈസ് എത്തി മദ്യശേഖരം പിടിച്ചെടുത്തു. ഇതുമായി ബന്ധപ്പെട്ട് ആന്റോയെ അറസ്റ്റ് ചെയ്യാന് എക്സൈസ് സംഘം എത്തിയെങ്കിലും എഫ്ഐആര് വേണമെന്ന് പ്രതി ആവശ്യപ്പെട്ടു. ഒടുവില് എഫ്ഐആര് പകര്പ്പ് നല്കിയ ശേഷമാണ് അറസ്റ്റിനോട് ആന്റോ സഹകരിച്ചത്.
63 ലിറ്റര് വിദേശമദ്യം വീട്ടില് എന്തിന് സൂക്ഷിച്ചു എന്ന മാധ്യമങ്ങളുടെ ചോദ്യത്തിന് മറ്റേതോ ഒരു എക്സൈസ് കേസിലാണ് തന്നെ അറസ്റ്റ് ചെയ്തിരിക്കുന്നത് എന്നാണ് ആന്റോ അഗസ്റ്റിന്പറഞ്ഞത്. തുടര്ന്ന് ആന്റോ അഗസ്റ്റിനെ ആലുവ ജില്ലാ ആശുപത്രിയില് വൈദ്യ പരിശോധനയ്ക്ക് എത്തിച്ചു.
അതേ സമയം, മുഖ്യമന്ത്രിക്കെതിരായ വ്യാജ വിവാഹ ആരോപണത്തില് റിപ്പോര്ട്ടര് ചാനല് ഉടമ ആന്റോ അഗസ്റ്റിനെ ഒന്നാം പ്രതിയാക്കി പൊലീസ് കേസെടുത്തിട്ടുണ്ട്. തിരുവനന്തപുരം സിറ്റി പൊലീസ് കമ്മിഷണറുടെ നിര്ദേശപ്രകാരം ആന്റോയ്ക്കും അജ്ഞാതരായ രണ്ടു പേര്ക്കുമെതിരെയാണ് സൈബര് പൊലീസ് എഫ്ഐആര് റജിസ്റ്റര് ചെയ്തിരിക്കുന്നത്. കോണ്ഗ്രസ് നേതാവ് രാജു പി.നായര് സംസ്ഥാന പൊലീസ് മേധാവിക്കു നല്കിയ പരാതിയുടെ അടിസ്ഥാനത്തിലാണു നടപടി. കേസ് കളമശേരി പൊലീസിനു കൈമാറി. കേസില് ആന്റോയെ ഉടന് ചോദ്യം ചെയ്യുമെന്നാണ് സൂചന.
