കൊച്ചി. കൊച്ചി–വൈപ്പിൻ റോ-റോ സർവീസ് മുന്നറിയിപ്പില്ലാതെ താൽക്കാലികമായി നിർത്തിവെച്ചതോടെ നൂറുകണക്കിന് യാത്രക്കാർ ദുരിതത്തിൽ. എൻജിൻ തകരാറിനെ തുടർന്ന് കഴിഞ്ഞദിവസം റോ-റോ നിയന്ത്രണം വിട്ട് കടലിലേക്ക് ഒഴുകിയ സംഭവത്തിനും കായലിലെ ശക്തമായ അടിയൊഴുക്കിനും പിന്നാലെയാണ് സർവീസ് നിർത്തിയത്. സുരക്ഷ മുൻനിർത്തിയുള്ള നടപടിയെന്നാണ് കെഎസ്ഐഎൻസിയുടെ വിശദീകരണം. എന്നാൽ ദിവസേന റോ-റോയെ ആശ്രയിക്കുന്ന നൂറുകണക്കിന് പേരാണ് ഇതോടെ യാത്രാ പ്രതിസന്ധിയിലായത്.
മുന്നറിയിപ്പില്ലാതെ സർവീസ് നിർത്തിയതോടെ ജോലിക്കും പഠനത്തിനുമായി ദിവസേന റോ-റോയെ ആശ്രയിക്കുന്ന നൂറുകണക്കിന് യാത്രക്കാരാണ് പ്രതിസന്ധിയിലായത്. രാവിലെ പതിവുപോലെ ജെട്ടിയിലെത്തിയ ശേഷമാണ് സർവീസ് ഇല്ലെന്ന വിവരം പലരും അറിയുന്നത്. മുൻകൂട്ടി അറിയിപ്പ് ലഭിച്ചില്ലെന്ന പരാതിയാണ് യാത്രക്കാർ ഉയർത്തുന്നത്.
മൂന്ന് റോ-റോ യാനങ്ങൾ ഉണ്ടായിട്ടും കാര്യക്ഷമമായ നടത്തിപ്പ് ഉറപ്പാക്കാൻ അധികൃതർക്ക് കഴിയുന്നില്ലെന്നാണ് യാത്രക്കാരുടെ വിമർശനം. സർവീസ് മുടങ്ങുമ്പോഴെല്ലാം ബദൽ സംവിധാനമോ വ്യക്തമായ അറിയിപ്പോ ലഭിക്കാത്തതിനാൽ സാധാരണക്കാർക്കാണ് കൂടുതൽ ബുദ്ധിമുട്ട് നേരിടേണ്ടി വരുന്നതെന്നും യാത്രക്കാർ പറയുന്നു.
ഇന്നലെ എൻജിൻ തകരാറിനെ തുടർന്ന് റോ-റോ നിയന്ത്രണം വിട്ട് കപ്പൽച്ചാലിലൂടെ കടലിലേക്ക് ഒഴുകിയിരുന്നു. അമ്പതോളം യാത്രക്കാരും ഒൻപത് കാറുകളും ഒരു വാനും അമ്പതോളം ഇരുചക്ര വാഹനങ്ങളും റോ-റോയിലുണ്ടായിരുന്നു. ഫിഷറീസ് മറൈൻ എൻഫോഴ്സ്മെന്റിന്റെ സമയോചിത ഇടപെടലാണ് വലിയ അപകടം ഒഴിവാക്കിയത്. ശക്തമായ അടിയൊഴുക്കും, വിവിധ വസ്തുക്കൾ പ്രൊപ്പല്ലറിൽ കുടുങ്ങിയതുമാണ് നിലവിലെ സാങ്കേതിക പ്രതിസന്ധിക്ക് കാരണമെന്ന് കെഎസ്ഐഎൻസി വിശദീകരിക്കുന്നു. മുൻകൂട്ടി അറിയിപ്പ് നൽകാതിരുന്നതാണ് വലിയ ബുദ്ധിമുട്ടുണ്ടാക്കിയതെന്നും യാത്രക്കാർ പറയുന്നു.
അതേസമയം, ഇന്ന് സേതുസാഗർ 2 യാനം മാത്രം സർവീസ് നടത്തുമെന്ന് KSINC അറിയിച്ചു. സേതുസാഗർ I-ൽ സാങ്കേതിക തകരാർ തുടരുന്നതിനാൽ നിലവിലെ സാഹചര്യത്തിൽ സർവീസ് നടത്താൻ പ്രായോഗിക ബുദ്ധിമുട്ടുണ്ടെന്നാണ് വിശദീകരണം. പൂർണമായും സാധാരണ നിലയിലേക്ക് സർവീസ് എപ്പോൾ മടങ്ങിയെത്തുമെന്ന കാര്യത്തിൽ ഇതുവരെ വ്യക്തതയില്ല.
