കൊല്ലം: മുളങ്കാടകം വിഷ്ണത്തുകാവിന് സമീപം നൂറുവർഷത്തോളം പഴക്കമുള്ള വീട് പൂർണമായും കത്തിനശിച്ചു.

വിഷ്ണത്തുകാവ് എൻ.കെ.ആർ.എ 90 എയിൽ ശോഭനകലയുടെ ജി.പി. വിലാസം വീടാണ് ഇന്നലെ ഉച്ചയോടെ തീപിടിച്ച് നശിച്ചത്.

ഉച്ചയ്ക്ക് 1.30ഓടെയാണ് സംഭവം. പഴയ വീടിന്റെ ഒരു ഭാഗം പൊളിച്ചുനീക്കി പുതിയ വീടിന്റെ നിർമാണം നടക്കുകയായിരുന്നു. നിർമാണം അന്തിമഘട്ടത്തിലെത്തിയതിനാൽ ശോഭനകല പുതിയ വീട്ടിലായിരുന്നു. ഇതിനിടെ വലിയ ശബ്ദം കേട്ട് പുറത്തേക്കെത്തിയപ്പോഴാണ് പഴയ വീടിന്റെ പിൻഭാഗത്തുനിന്ന് പുക ഉയരുന്നത് കണ്ടത്. നിമിഷങ്ങൾക്കകം തീ ആളിപ്പടർന്നു.

ശോഭനകലയുടെ നിലവിളി കേട്ട് ഓടിയെത്തിയവർ ഫയർഫോഴ്സിനെ വിവരമറിയിച്ചു. രണ്ട് യൂണിറ്റ് എത്തിയെങ്കിലും അപ്പോഴേക്കും വീട് പൂർണമായും കത്തിനശിച്ചിരുന്നു. കഴുക്കോലുകൾ കത്തിയതോടെ മേൽക്കൂരയിലെ ഓടുകൾ നിലംപതിച്ചു. ഫർണിച്ചർ, ഇലക്ട്രിക് ഉപകരണങ്ങൾ, രേഖകൾ, വസ്ത്രങ്ങൾ എന്നിവയും കത്തിനശിച്ചു.

രണ്ട് യൂണിറ്റ് ഫയർഫോഴ്സ് ചേർന്നാണ് തീയണച്ചത്.

കൊല്ലം: വിവാഹ ചടങ്ങുകള്‍ക്ക് മുന്‍കൂറായി പണം വാങ്ങിയ ശേഷം സദ്യയും ഭക്ഷണവും എത്തിക്കാതെ തട്ടിപ്പ് നടത്തിയെന്ന പരാതികള്‍ നേരിടുന്ന കാഞ്ഞിരപ്പള്ളി കേന്ദ്രീകരിച്ചുള്ള ‘ഉദയം കാറ്ററിംഗ് ആന്‍ഡ് ഇവന്റ്‌സ്’ ഉടമക്കെതിരെ കൊല്ലത്തും സമാനമായ പരാതി. കോട്ടയം, പെരുമ്പാവൂര്‍ എന്നിവിടങ്ങളില്‍ സമാന പരാതികള്‍ ഉയര്‍ന്നതിന് പിന്നാലെയാണ് കൊല്ലത്തെ സംഭവവും പുറത്തുവന്നത്. കൊല്ലം ഇരവിപുരം ആസ്ഥാനമായി പ്രവര്‍ത്തിക്കുന്ന ‘റോയല്‍ ഈവ്‌സ് വെഡ്ഡിംഗ്‌സ് ആന്‍ഡ് ഇവന്റ്‌സ്’ സ്ഥാപനമാണ് പരാതിക്കാര്‍.
ഏകദേശം ഒരു മാസം മുമ്പാണ് സംഭവം. ശക്തികുളങ്ങരയില്‍ നടന്ന വിവാഹത്തിന്റെ അലങ്കാര ജോലികളും മറ്റ് ക്രമീകരണങ്ങളും ആദ്യം ഏറ്റെടുത്തിരുന്നത് ഉദയം കാറ്ററിങ് സ്ഥാപനമായിരുന്നു. എന്നാല്‍ അപകടം സംഭവിച്ചതിനാല്‍ പരിപാടിയുടെ ജോലികള്‍ ഏറ്റെടുക്കാന്‍ കഴിയില്ലെന്നും തങ്ങള്‍ക്ക് വേണ്ടി ഇവന്റ് നടത്തണമെന്നും ആവശ്യപ്പെട്ട് കുണ്ടറയിലെ മറ്റൊരു സ്ഥാപനവുമായി ഉദയം ഉടമ ബന്ധപ്പെട്ടു. വിവാഹം ശക്തികുളങ്ങരയിലായതിനാല്‍ ഇരവിപുരത്തെ റോയല്‍ ഈവ്‌സ് സ്ഥാപനവുമായി ബന്ധപ്പെടാന്‍ കുണ്ടറയിലെ സ്ഥാപനം നിര്‍ദേശിച്ചതിനെ തുടര്‍ന്നാണ് ഇവര്‍ ജോലികള്‍ ഏറ്റെടുത്തതെന്ന് പരാതിയില്‍ പറയുന്നു.
തുടര്‍ന്ന് ഡെക്കറേഷന്‍ ഉള്‍പ്പെടെയുള്ള മുഴുവന്‍ ജോലികളും റോയല്‍ ഈവ്‌സ് സംഘം പൂര്‍ത്തിയാക്കി നല്‍കിയെങ്കിലും വാഗ്ദാനം ചെയ്ത തുക ലഭിച്ചില്ലെന്നാണ് ആരോപണം. രണ്ട് തവണയായി 20,000 രൂപ നല്‍കിയെങ്കിലും വാഹനാപകടത്തില്‍ പരിക്കേറ്റ് ആശുപത്രി ബില്‍ അടയ്ക്കാനുണ്ടെന്ന് പറഞ്ഞ് അതില്‍നിന്ന് 10,000 രൂപ തിരികെ വാങ്ങിയതായും പരാതിക്കാര്‍ പറയുന്നു.
പിന്നീട് പലതവണ ഫോണില്‍ ബന്ധപ്പെട്ടിട്ടും പണം നല്‍കാതെ ഒഴിഞ്ഞുമാറിയെന്നാണ് ആരോപണം. സംഭവത്തില്‍ റോയല്‍ ഈവ്‌സ് ഏകദേശം ഒരു മാസം മുമ്പ് തന്നെ പരാതി നല്‍കിയിരുന്നു. അലങ്കാര ജോലികള്‍ ചെയ്ത വകയില്‍ മാത്രം ഏകദേശം 65,000 രൂപ ലഭിക്കാനുണ്ടെന്നാണ് സ്ഥാപനത്തിന്റെ കണക്ക്.
സംഭവത്തില്‍ നിയമനടപടികളുമായി മുന്നോട്ടുപോകാനാണ് സ്ഥാപനത്തിന്റെ തീരുമാനം. അതേസമയം, ഉദയം കാറ്ററിങ് ഉടമക്കെതിരെ കോട്ടയം, പെരുമ്പാവൂര്‍ എന്നിവിടങ്ങളിലും സമാന പരാതികള്‍ ഉയര്‍ന്നിട്ടുണ്ടെന്നാണ് പരാതിക്കാരുടെ ആരോപണം.

കൊട്ടാരക്കര: കൊല്ലം-ചെങ്കോട്ട ദേശീയ പാതയില്‍ താമരശ്ശേരി ജങ്ഷന് സമീപം ഓമ്‌നി വാന്‍ ട്രെയിലറിലേക്ക് ഇടിച്ചുകയറിയുണ്ടായ അപകടത്തില്‍ വാന്‍ ഡ്രൈവര്‍ക്ക് ഗുരുതര പരിക്ക്. കരുനാഗപ്പള്ളി സ്വദേശി അല്‍ത്താഫ് (30)നെ ഗുരുതര പരിക്കോടെ കൊട്ടാരക്കരയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
ഇന്ന് വൈകിട്ട് താമരശ്ശേരി ജങ്ഷന് സമീപം ആഗ്രോ ബാസാറിന് സമീപം കൊട്ടാരക്കര ഭാഗത്തുനിന്നും കൊല്ലത്തേക്ക് വന്ന ട്രെയിലറിലേക്ക് എതിര്‍ ദിശയില്‍ അമിത വേഗതയില്‍ എത്തിയ സോഡിയാക് ടൂ വീലേഴ്സിന്റെ വാന്‍ ഇടിച്ചുകയറുകയായിരുന്നു. വാന്‍ വെട്ടിപൊളിച്ചാണ് പരിക്കേറ്റ അല്‍ത്താഫിനെ പുറത്തെടുത്ത് ആശുപത്രിയില്‍ എത്തിച്ചത്.