ഭരണിക്കാവ്:പ്രതിപക്ഷ നേതാവ് വി.ഡി സതീശൻ നയിക്കുന്ന പുതുയുഗയാത്രയ്ക്ക് ഭരണിക്കാവിൽ നൽകിയ സ്വീകരണത്തിനിടെ ഉല്ലാസ് കോവൂരിൻ്റെ സർപ്രൈസ് ജന്മദിനാഘോഷം വേറിട്ടതായി.ആർവൈഎഫ് സംസ്ഥാന പ്രസിഡൻ്റും കുന്നത്തൂരിലെ യുഡിഎഫ് സ്ഥാനാർത്ഥിയുമായ ഉല്ലാസ് കോവൂരിൻ്റെ ജന്മദിനത്തിലാണ് പ്രതിപക്ഷ നേതാവിൻ്റെ യാത്ര ഭരണിക്കാവിലെത്തിയത്.

ജന്മദിനമാണെന്ന കാര്യം ഉല്ലാസ് ആരെയും അറിയിച്ചിരുന്നില്ല.അടുത്ത സുഹൃത്തുക്കൾക്ക് മാത്രമറിയാമായിരുന്ന രഹസ്യം പക്ഷേ
സോഷ്യൽ മീഡിയ വഴി പരസ്യമായി.പുതുയുഗ യാത്രയിൽ വി.ഡി സതീശൻ തൻ്റെ പ്രസംഗം അവസാനിപ്പിക്കുന്നതിനിടെ കെ.എസ്.യു നേതാവായ ഗൗരി പതാരം കേക്കുമായി വേദിയിലെത്തി.പ്രതിപക്ഷ നേതാവ് തന്നെ ഉല്ലാസ് കോവൂരിൻ്റെ ജന്മദിനമാണ് ഇന്നെന്നും അദ്ദേഹത്തെ സ്നേഹിക്കുന്ന നിങ്ങൾ ഇത്തവണ വിജയിപ്പിക്കില്ലേയെന്നും ചോദിച്ചു.നിറഞ്ഞ കയ്യടിയായിരുന്നു മറുപടി.തുടർന്ന് കേക്ക് മുറിച്ച് സതീശൻ ഉല്ലാസിന് നൽകി.നെറുകയിൽ മുത്തവും.

തുടർന്ന് ഡിസിസി പ്രസിഡൻ്റ്,യുഡിഎഫ് ജില്ലാ ചെയർമാൻ എന്നിവരുടെ പേരുകൾ എടുത്ത് പറഞ്ഞ് നിയമസഭാ തെരഞ്ഞെടുപ്പിൽ ഉല്ലാസിൻ്റെ പ്രവർത്തനങ്ങൾ ഏകോപിപ്പിക്കാൻ താൻ നേരിട്ടെത്തുമെന്നും അറിയിച്ചു.അതിനും വലിയ കരഘോഷമാണ് വേദിയിൽ നിന്നും ലഭിച്ചത്.താൻ ജന്മദിനം കേക്ക് മുറിച്ച് ആഘോഷിക്കുന്നത് ജീവിതത്തിൽ ഇത് രണ്ടാം തവണ മാത്രമെന്നും ഒട്ടും പ്രതീക്ഷിക്കാതെ സർപ്രൈസ് തന്ന എല്ലാ പ്രിയപ്പെട്ടവർക്കും നന്ദിയെന്നും ഉല്ലാസ് കോവൂർ പിന്നീട് പ്രതികരിച്ചു.

കുന്നത്തൂർ:യുഡിഎഫ് അധികാരത്തിൽ എത്തിയാൽ വിദേശ രാജ്യങ്ങളുടെ മാതൃകയിൽ കേരളത്തെ തുറമുഖ നഗരമാക്കി വികസിപ്പിക്കുമെന്ന് പ്രതിപക്ഷ നേതാവ് വി.ഡി സതീശൻ പറഞ്ഞു.പുതുയുഗയാത്രയ്ക്ക് ഭരണിക്കാവിൽ നൽകിയ സ്വീകരണ സമ്മേളനത്തിൽ സംസാരിക്കുകയായിരുന്നു ജാഥാ ക്യാപ്റ്റൻ കൂടിയായ അദ്ദേഹം.കേരളത്തിലെ പരമ്പരാഗത വ്യവസായങ്ങളെ സംരക്ഷിച്ചു കൊണ്ടായിരിക്കും രാജ്യാന്തര നിലവാരത്തിലേക്ക് നമ്മളും മാറുക.

കഴിഞ്ഞ 10 വർഷമായി കേരളത്തെ തകർത്ത് തരിപ്പണമാക്കിയ സർക്കാരാണ് നാട് ഭരിക്കുന്നതെന്ന് സതീശൻ ചൂണ്ടിക്കാട്ടി.നമ്മുടെ സമ്പദ് വ്യവസ്ഥ തകർന്നു.6 ലക്ഷം കോടിയുടെ കടം പിണറായി സർക്കാർ ഇറങ്ങി പോകുമ്പോൾ ബാധ്യതയാകുന്നത്.കേരളത്തിലെ പാവപ്പെട്ടവർ കടക്കെണിയിലാണ്.നാടുനീളെ ജപ്തി
നോട്ടീസ് പ്രവഹിക്കുകയാണ്.

വീണാ ജോർജിനെ ഓസ്ക്കാർ അവാർഡിനും ചിന്താ ജെറോമിനെ വയലാർ അവാർഡിനും ശുപാർശ ചെയ്യണമെന്നും വി.ഡി സതീശൻ പരിഹസിച്ചു.യുഡിഎഫ് കുന്നത്തൂർ നിയോജക മണ്ഡലം ചെയർമാൻ എസ്.സുഭാഷ് അധ്യക്ഷത വഹിച്ചു.കൊടിക്കുന്നിൽ സുരേഷ് എം.പി സമ്മേളനം ഉദ്ഘാടനം ചെയ്തു.എൻ.കെ പ്രേമചന്ദ്രൻ എം.പി, വി.കെ ശ്രീകണ്ഠൻ എം.പി,ഉല്ലാസ് കോവൂർ,മാങ്കോട് രാധാകൃഷ്ണൻ,അസ്ക്കർ,സി.പി ജോൺ,എം.എം നസീർ,ഷാനിമോൾ ഉസ്മാൻ, പി.സി വിഷ്ണുനാഥ്

എംഎൽഎ,ജി.ദേവരാജൻ, സുൾഫിക്കർ സലാം,വാക്കനാട് രാധാകൃഷ്ണൻ,കല്ലട ഫ്രാൻസിസ്,സൈമൺ അലക്സ്,സൂരജ് രവി,പി.ജർമ്മിയാസ്,പി.രാജേന്ദ്രപ്രസാദ്,കെ.സി രാജൻ,കാരയ്ക്കാട്ട് അനിൽ,വൈ.ഷാജഹാൻ, കെ.സുകുമാരൻ നായർ , എസ് സുഭാഷ് എന്നിവര്‍ പ്രസംഗിച്ചു.അഡ്വ.ഷാനവാസ് കുറ്റിയിൽ സ്വാഗതം പറഞ്ഞു.കൊട്ടാരക്കര എഴുകോണിലെ സ്വീകരണത്തിനു ശേഷം രാത്രി 7.30 ഓടെ ഭരണിക്കാവിലെത്തിയ പുതുയുഗ യാത്രയെയും ജാഥാ ക്യാപ്ടൻ പ്രതിപക്ഷ നേതാവ് വി.ഡി സതീശനെയും വൻജനാവലിയുടെ സാന്നിധ്യത്തിലാണ് സമ്മേളന വേദിയിലേക്ക് വരവേറ്റത്.

പടിഞ്ഞാറേകല്ലട. കാരാളി ടൗൺ വാർഡിൽ പൈപ്പ് പൊട്ടിയിട്ട് മൂന്നാഴ്ച്ച.
മെയിന്റനൻസ് ചെയ്യാത്തതിൽ പ്രതിഷേധിച്ച് വാട്ടർ അതോറിറ്റി ഓഫീസിൽ പഞ്ചായത്ത് മെമ്പർ സമരം തുടങ്ങി
പടിഞ്ഞാറെ കല്ലട പഞ്ചായത്തിലെ കാരാളിമുക്ക് കടപുഴ റോഡിൽ കണത്താർ കുന്നം ക്ഷേത്രത്തിന് സമീപം മൂന്നിടത്താണ് ഒരു മാസത്തോളമായി പൈപ്പ് പൊട്ടിക്കിടക്കുന്നത് വാർഡിലെ ജനപ്രതിനിധിയായ സുരേഷ്ചന്ദ്രൻ എ എക്സിയെയും AE യെയും നിരവധി തവണ അറിയിച്ചിട്ടും പരിഹാരമുണ്ടാകാത്തത്തിൽ പ്രതിഷേധിച്ചാണ് സുരേഷ്ചന്ദ്രൻ ഓഫീസിന് മുന്നിൽ സമരം തുടങ്ങിയത്

സമരം തുടങ്ങിയതിന് ശേഷം ഉദ്യോഗസ്ഥർ സ്ഥലം സന്ദർശിക്കുകയും തിങ്കളാഴ്ച രാവിലെ തന്നെ മെയിന്റനൻസ് ചെയ്യാമെന്ന് ഉറപ്പ് നൽകുകയും ചെയ്തതിന്റെ അടിസ്ഥാനത്തിൽ സമരം അവസാനിപ്പിക്കുകയായിരുന്നു
സർക്കാർ ഇരുപത് മാസമായി പണം കൊടുക്കാത്തത്തിനാൽ കോൺട്രാക്ടർമാർ സമരത്തിലാണ് അതിനാലാണ് മെയിന്റനൻസ് പണികളെല്ലാം മുടങ്ങുന്നതെന്ന് ഉദ്യോഗസ്ഥർ പറയുന്നു
തിങ്കളാഴ്ച വൈകിട്ട് 4 മണിക്ക് മുൻപ് പണി ചെയ്തില്ലെങ്കിൽ 4 മണിക്ക് ശേഷം ശക്തമായ സമരം ആരംഭിക്കുമെന്ന് സുരേഷ് ചന്ദ്രൻ പറഞ്ഞു