ചോറ്റാനിക്കര: കാൽ നൂറ്റാണ്ടിലേറെ സ്വന്തം കുടുംബത്തിന്റെ ഭാഗമായി ജീവിച്ച വീട്ടുജോലിക്കാരിക്ക് ഓർത്തഡോക്സ് സഭാ വൈദികന്റെ വീട്ടിൽ ഹൈന്ദവ ആചാരപ്രകാരം അന്ത്യകർമങ്ങൾ നടത്തി മാതൃകയായി ഒരു കുടുംബം.

അമ്പാടിമല ഓണശ്ശേരിൽ ഫാ. ഒ. ജെ. ജേക്കബിന്റെ വീട്ടിലെ സഹായിയായിരുന്ന ഇരുമ്പനം സ്വദേശിനി പാർവതി (പായമ്മ–88)യുടെ സംസ്കാരച്ചടങ്ങാണ് വൈദികന്റെ വീട്ടിൽ നടന്നത്. പാർവതിയുടെ ബന്ധുവായ സജീവ് ഹൈന്ദവ ആചാരപ്രകാരം കർമങ്ങൾ നിർവഹിച്ച ശേഷം എരുവേലി ശ്മശാനത്തിൽ സംസ്കാരം നടത്തി.

2000-ലാണ് പാർവതി ഫാ. ജേക്കബിന്റെ വീട്ടിലെത്തുന്നത്. കോലഞ്ചേരി സെന്റ് പീറ്റേഴ്സ് കോളേജ് പ്രൊഫസറായിരുന്ന വൈദികന്റെ ഭാര്യ മരിച്ചതിനെ തുടർന്ന് ആറുവയസ്സുകാരിയായ മകൾ മെറിനെ നോക്കാനായിരുന്നു അവരെ വീട്ടിലെത്തിച്ചത്. അടുത്ത ബന്ധുക്കൾ ആരുമില്ലാതിരുന്ന പാർവതി പിന്നീട് ആ കുടുംബത്തിലെ ഒരംഗമായി മാറുകയായിരുന്നു.

വാർദ്ധക്യസഹജമായ അസ്വസ്ഥതകൾ ഉണ്ടായിരുന്നെങ്കിലും കഴിഞ്ഞ ആഴ്ചവരെ വീട്ടുകാര്യങ്ങളിൽ സജീവമായിരുന്നു പായമ്മ. ശാരീരിക ബുദ്ധിമുട്ടിനെ തുടർന്ന് ഞായറാഴ്ച രാത്രി ചോറ്റാനിക്കര ടാറ്റാ ആശുപത്രിയിൽ പ്രവേശിപ്പിച്ചെങ്കിലും അവിടെവച്ചാണ് മരണം സംഭവിച്ചത്.

മൃതദേഹം രാത്രി തന്നെ വൈദികന്റെ വീട്ടിലെത്തിച്ച ശേഷം, പാർവതിയുടെ വിശ്വാസത്തിനും ആചാരങ്ങൾക്കും അനുസൃതമായി അന്ത്യകർമങ്ങൾ നടത്താനുള്ള എല്ലാ ഒരുക്കങ്ങളും ഫാ. ജേക്കബും കുടുംബാംഗങ്ങളും ചേർന്നാണ് നിർവഹിച്ചത്. മതത്തിനുമപ്പുറം മനുഷ്യസ്നേഹത്തിന്റെയും പരസ്പര ബഹുമാനത്തിന്റെയും സന്ദേശം ഉയർത്തിപ്പിടിച്ച ഈ സംഭവം സമൂഹത്തിൽ ശ്രദ്ധേയമായി.

കാൺപൂർ: ‘ഫ്രീ’ എന്ന വാക്ക് കേട്ടാൽ എന്തും സ്വന്തമാക്കാൻ ഓടുന്നവരുടെ സ്വഭാവത്തെ ചർച്ചയാക്കി ഉത്തർപ്രദേശിലെ കാൺപൂരിൽ നിന്നുള്ള ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു. മാലിന്യം തള്ളുന്ന സ്ഥലത്ത് ഉപേക്ഷിച്ച കാലാവധി കഴിഞ്ഞ ചോക്ലേറ്റുകളും ടോഫികളും ശേഖരിക്കാൻ വൻ ജനക്കൂട്ടം എത്തിയതാണ് സംഭവം.

ഒരു ചോക്ലേറ്റ് ഫാക്ടറിയിൽനിന്ന് ഉപേക്ഷിച്ച മിഠായികൾ റോഡരികിൽ തള്ളിയിട്ടെന്ന വിവരം പ്രചരിച്ചതോടെയാണ് ആളുകൾ കൂട്ടത്തോടെ സ്ഥലത്തെത്തിയത്. ബാഗുകളും ചാക്കുകളും ഒഴിഞ്ഞ പാത്രങ്ങളുമായെത്തിയവർ നിലത്തുനിന്ന് ചോക്ലേറ്റുകളും ടോഫികളും വാരിയെടുത്ത് കൊണ്ടുപോകുന്നതാണ് ദൃശ്യങ്ങളിലുള്ളത്. പലരും ഇവ വീട്ടിലേക്കും കൊണ്ടുപോയതായാണ് റിപ്പോർട്ട്.

കാലാവധി കഴിഞ്ഞതോ വിൽപ്പനയ്ക്ക് ഉപയോഗിക്കാൻ കഴിയാത്തതോ ആയതിനാലാണ് പാക്കറ്റുകളോടെ മിഠായികൾ ഉപേക്ഷിച്ചതെന്നാണ് റിപ്പോർട്ട്. എന്നാൽ, ഇത്തരത്തിൽ ഉപേക്ഷിച്ച ഭക്ഷ്യവസ്തുക്കൾ ആളുകൾ ശേഖരിച്ച് ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങൾക്ക് ഇടയാക്കുമെന്ന ആശങ്കയും ഉയരുന്നുണ്ട്. കാലാവധി കഴിഞ്ഞതും കേടായതുമായ ഭക്ഷണം കഴിക്കുന്നത് ഭക്ഷ്യവിഷബാധ ഉൾപ്പെടെയുള്ള ആരോഗ്യപ്രശ്നങ്ങൾക്ക് കാരണമാകാം.

അതേസമയം, കാലാവധി കഴിഞ്ഞ ഭക്ഷ്യോൽപ്പന്നങ്ങൾ ഇത്തരത്തിൽ പൊതുസ്ഥലത്ത് തള്ളിയതിനെതിരെയും വിമർശനമുണ്ട്. ഉപയോഗശൂന്യമായ ഭക്ഷ്യവസ്തുക്കൾ സുരക്ഷിതമായി നശിപ്പിക്കുകയോ സംസ്കരിക്കുകയോ ചെയ്യുന്നതിന് പകരം മാലിന്യക്കൂമ്പാരത്തിൽ ഉപേക്ഷിച്ചത് ശരിയായ നടപടിയാണോയെന്നാണ് പ്രധാന ചോദ്യം.

സംഭവത്തിൽ അധികൃതർ അന്വേഷണം ആരംഭിച്ചതായും റിപ്പോർട്ടുണ്ട്. സംഭവത്തെക്കുറിച്ച് അന്വേഷിച്ച് റിപ്പോർട്ട് സമർപ്പിക്കാൻ പങ്കി പൊലീസ് സ്റ്റേഷൻ ഇൻചാർജിനോട് ഡെപ്യൂട്ടി പൊലീസ് കമ്മീഷണർ ഖാസിം അബിദി നിർദേശിച്ചതായി ദൈനിക് ഭാസ്‌കർ ഹിന്ദി റിപ്പോർട്ട് ചെയ്തു.

‘ഫ്രീ’ എന്ന വാക്കിന്റെ ആകർഷണത്തിൽ കാലാവധി പോലും നോക്കാതെ ഭക്ഷ്യവസ്തുക്കൾ ശേഖരിക്കുന്നതിനെ പരിഹസിച്ചും വിമർശിച്ചും നിരവധി പേരാണ് സമൂഹമാധ്യമങ്ങളിൽ പ്രതികരിക്കുന്നത്. അതേസമയം, സംഭവത്തിന്റെ പശ്ചാത്തലത്തിൽ ഭക്ഷ്യസുരക്ഷയും കാലാവധി കഴിഞ്ഞ ഉൽപ്പന്നങ്ങളുടെ സുരക്ഷിതമായ സംസ്കരണവും സംബന്ധിച്ച ചർച്ചയും ശക്തമായിരിക്കുകയാണ്.