ചെന്നൈ: നടി അംബികാ നായര്‍ക്കും സഹോദരന്‍ മല്ലികാര്‍ജുനനും (അര്‍ജുന്‍ നായര്‍) എതിരെ പരാതി നല്‍കി മുതിര്‍ന്ന ചലച്ചിത്ര നടി രാധ. 46 കോടിയിലധികം രൂപയുടെ ചെക്കുകള്‍ അനധികൃതമായി മാറിയെടുക്കാന്‍ ഇരുവരും ശ്രമിച്ചെന്നാണ് രാധയുടെ പ്രധാന ആരോപണം. തങ്ങള്‍ ഒരുമിച്ചു താമസിച്ചിരുന്ന സമയത്ത് താന്‍ ഒപ്പിട്ടുവച്ചിരുന്ന അഞ്ച് ചെക്കുകള്‍ തട്ടിയെടുത്തെന്നാണ് രാധയുടെ പരാതി.
അടുത്തിടെ ഈ ബാങ്ക് അക്കൗണ്ടുകള്‍ സംബന്ധിച്ച വിവരങ്ങള്‍ പരിശോധിച്ചപ്പോഴാണ് ഇത്രയും വലിയൊരു തുകയുടെ തട്ടിപ്പ് നടന്നതായി അറിയുന്നതെന്ന് രാധ പറയുന്നു. കുടുംബപരമായുള്ള സ്വര്‍ണം, വജ്രം ഉള്‍പ്പെടെയുള്ള ആഭരണശേഖരവുമായി ബന്ധപ്പെട്ട് ഇവര്‍ക്കിടെയില്‍ തര്‍ക്കങ്ങള്‍ നിലനില്‍ക്കുന്ന സാഹചര്യത്തിലാണ് പുതിയ പരാതി.
ഇന്നുരാവിലെ ചെന്നൈ പൊലീസ് കമ്മീഷണര്‍ ഓഫീസിലെത്തിയാണ് രാധ തന്റെ സഹോദരി അംബികയ്ക്കും സഹോദരന്‍ അര്‍ജുനും എതിരെ പരാതി നല്‍കിയിരിക്കുന്നത്. അംബികയും ഇവരുടെ സഹോദരന്‍ അര്‍ജുനും ചേര്‍ന്നാണ് ഈ തട്ടിപ്പ് നടത്തിയത് എന്നാണ് പൊലീസില്‍ നല്‍കിയ പരാതിയില്‍ പറയുന്നത്. പരാതിയില്‍ ചെന്നൈ പൊലീസ് അന്വേഷണം ആരംഭിച്ചിട്ടുണ്ട്.
ബിസിനസ്സ് അക്കൗണ്ടില്‍ നിന്നുള്ള ചെക്കുകളാണ് ഇരുവരും ദുരുപയോഗം ചെയ്യാന്‍ ശ്രമിച്ചത്. 2025 ജനുവരിയില്‍ അക്കൗണ്ടില്‍ പുതിയ ചെക്ക് ബുക്ക് നിലവില്‍ വന്നതിനാല്‍ പഴയ ചെക്കുകള്‍ അസാധുവായിരുന്നു. എന്നാല്‍, സെപ്റ്റംബര്‍ 17ന് അംബിക നായരുടെ പേരില്‍ സമര്‍പ്പിച്ച 5 പഴയ ചെക്കുകളെക്കുറിച്ച് ഐഡിബിഐ ബാങ്കില്‍ നിന്ന് ലഭിച്ച ഇമെയിലിലൂടെയാണ് രാധ വിവരമറിയുന്നത്. തുടര്‍ന്ന് രാധ ബാങ്കുമായി ബന്ധപ്പെട്ട് ഇടപാടുകള്‍ തടഞ്ഞുവെന്നും പരാതിയില്‍ പരാതിയില്‍ പറയുന്നു.
11 ലക്ഷം, 13.17 കോടി, 27.73 കോടി, 7 കോടി, 1.79 കോടി രൂപ വീതമുള്ള അഞ്ച് ചെക്കുകളാണ് ബാങ്കില്‍ സമര്‍പ്പിച്ചിരുന്നത്. ഈ ചെക്കുകളില്‍ തുകയും പേരും തീയതിയും എഴുതിച്ചേര്‍ത്തത് സഹോദരന്‍ മല്ലികാര്‍ജുനനാണെന്ന് രാധ ആരോപിക്കുന്നു. അര്‍ജുനെതിരെ വിദേശ നാണയ വിനിമയ നിരോധന നിയമപ്രകാരം കേസുകളുണ്ടെന്നും പിഴയടയ്ക്കാന്‍ കോടതി ഉത്തരവുണ്ടെന്നും പരാതിയില്‍ പറയുന്നു.

തിരുവനന്തപുരം: നാളെ നടക്കുന്ന പ്രിയദർശിനി പദ്ധതിയിൽ സാരി വിതരണം പരിപാടിയിൽ ഇല്ലെന്ന് ഗതാഗതമന്ത്രി സി.പി ജോൺ. ആഘോഷപരിപാടി മാത്രം നടത്താനാണ് നിർദേശമെന്നും പ്രചരിക്കുന്ന വാർത്തകൾ തെറ്റെന്നും മന്ത്രി പ്രതികരിച്ചു. കെഎസ്ആർടിസിയുടെ പ്രിയദർശിനി പദ്ധതി നൂറ് ദിവസം തികയ്ക്കുന്നതിന്‍റെ ഭാഗമായി സംസ്ഥാനത്തെ എല്ലാ കെഎസ്ആർടിസി ഡിപ്പോകളിലും വനിതകൾക്ക് സാരി വിതരണമുണ്ടാകുമെന്നായിരുന്നു നേരത്തെ റിപ്പോർട്ടുകളുണ്ടായിരുന്നത്.

ഓരോ ഡിപ്പോയിലും 15 സാരികൾ വീതമാണ് നൽകുകയെന്നായിരുന്നു നേരത്തെ പുറത്തുവരുന്ന വിവരം. ഇതിന് പിന്നാലെയാണ് സാരീവിതരണം പരിപാടിയുടെ ഭാഗമല്ലെന്ന് മന്ത്രി തന്നെയും സ്ഥിരീകരിച്ചിരിക്കുന്നത്.

രാവിലെ 10ന് തിരുവനന്തപുരം തമ്പാനൂര്‍ കെഎസ്ആര്‍ടിസി ടെര്‍മിനലില്‍ നടക്കുന്ന ചടങ്ങ് മന്ത്രി സി.പി. ജോണ്‍ ദ്ഘാടനം നിര്‍വഹിക്കും. പ്രിയദര്‍ശിനി പദ്ധതി മികച്ച രീതിയില്‍ മുന്നോട്ടുപോകുകയാണെന്നും നിലവില്‍ ഓര്‍ഡിനറി ബസുകളില്‍ മാത്രമാണ് പദ്ധതി നടപ്പാക്കുന്നതെന്നും ഈ രീതിയില്‍ തന്നെ പദ്ധതി തുടരാനാണ് തീരുമാനമെന്നും മന്ത്രി വ്യക്തമാക്കി.

കരുനാഗപ്പള്ളി: വധശ്രമക്കേസിലെ പ്രതിയെ അറസ്റ്റ് ചെയ്യാനെത്തിയ പൊലീസ് സംഘത്തിന് നേരെ യുവതികളടക്കമുള്ള നാലംഗ സംഘത്തിന്റെ ആക്രമണം. ഡിവൈഎസ്പി സ്ക്വാഡിലെ പൊലീസുകാർക്കുനേരെയുണ്ടായ ആക്രമണത്തിൽ എസ്ഐ ജിനു സാരമായി പരിക്കേറ്റു. സംഭവവുമായി ബന്ധപ്പെട്ട് ജെറിൻ, രേഷ്മ, രമ്യ, ഹർഷ എന്നിവരെ അറസ്റ്റ് ചെയ്തു. ശനിയാഴ്ച രാത്രിയായിരുന്നു സംഭവം.
വധശ്രമക്കേസിലെ പ്രതി ജെറിൻ കരുനാഗപ്പള്ളിയിലുണ്ടെന്ന വിവരത്തെത്തുടർന്നാണ് ഡിവൈഎസ്പി സ്ക്വാഡിലെ പൊലീസ് സംഘം സ്ഥലത്തെത്തിയത്. വീട്ടിൽ ജെറിനും മൂന്ന് സ്ത്രീകളുമായിരുന്നു ഉണ്ടായിരുന്നത്. തങ്ങൾ പൊലീസുകാരാണെന്ന് അറിയിച്ചെങ്കിലും സംഘം ആക്രമിക്കുകയായിരുന്നെന്ന് പൊലീസ് പറഞ്ഞു. പോലീസുകാരെ ചുടുകട്ട കൊണ്ട് തലയ്ക്കടിക്കുകയും, സ്ത്രീകൾ ചേർന്ന് എസ്ഐ അടക്കമുള്ളവരെ ഇടിക്കുകയും കടിക്കുകയും ചെയ്തു. തുടർന്ന് കൂടുതൽ പോലീസുകാരെത്തിയാണ് ഇവരെ അറസ്റ്റ് ചെയ്തത്.