ശാസ്താംകോട്ട. റോഡുപുറമ്പോക്കു കയ്യേറി നിര്‍മ്മാണപ്രവര്‍ത്തനത്തിനുള്ള നീക്കം അധികൃതരെത്തി തടഞ്ഞു. ചവറ ശാസ്താംകോട്ട പ്രധാന പാതയില്‍ വേങ്ങ മാമ്പുഴ മുക്കിലാണ് ഓഡിറ്റോറിയത്തോട് ചേര്‍ന്ന സ്ഥലം കയ്യേറാന്‍ നീക്കം നടന്നത്. ഓഡിറ്റോറിയത്തിന് മുന്നില്‍ പ്രധാനപാതയില്‍ നിന്നും പത്തുമീറ്റര്‍ ഉള്ളിലേക്കുറോഡ് പുറമ്പോക്ക് ഉണ്ട്.
ഇത് പഴയ ചിലര്‍ക്കുമാത്രമേധാരണയുള്ളു . ഈ ഭൂമി പിന്നിലെ ഓഡിറ്റോറിയത്തിന്‍റെ ഭാഗമായി മാറ്റാനാണ് നീക്കമുണ്ടായത്. ഇവിടെ ജെസിബി ഉപയോഗിച്ച് മണ്ണുമാറ്റി നിര്‍മ്മാണ പ്രവര്‍ത്തനത്തിനായി നീക്കം നടന്നതോടെ നാട്ടുകാര്‍ മരാമത്തു റോഡ് വിഭാഗത്തെ അറിയിക്കുകയായിരുന്നു.
അസി. എന്‍ജിനീയര്‍ സുനിതയുടെ നേതൃത്വത്തില്‍ എത്തിയ ഉദ്യോഗസ്ഥര്‍ സ്ഥലം കൃത്യമായി അളന്ന് തിരിച്ച് ഇതിനു പിന്നിലായി മാത്രം നിര്‍മ്മാണം നടത്തിയാല്‍ മതിയെന്ന് അറിയിക്കുകയായിരുന്നു. താലൂക്ക് സര്‍വേ വിഭാഗം ഉദ്യോഗസ്ഥരും റവന്യൂ അധികൃതരും സ്ഥലത്തെത്തി. ഈ സ്ഥലം കെട്ടിത്തിരിക്കരുതെന്നും നിര്‍ദ്ദേശിച്ചിട്ടുണ്ട്.
