കൊച്ചി. മെട്രോ പേരുമാറ്റത്തിൽ വിശദീകരണവുമായി KMRL. കൊച്ചി മെട്രോയുടെ പേര് മാറ്റുമെന്ന വാർത്ത തെറ്റിദ്ധാരണ മൂലമുണ്ടായതാണെന്ന് KMRL വ്യക്തമാക്കി. കൊച്ചി മെട്രോയുടെ പേര് മാറ്റാനുള്ള നിർദേശമല്ല; മറിച്ച്, കൊച്ചി മെട്രോ റെയിൽ ലിമിറ്റഡ് എന്ന കമ്പനിയുടെ പേര് ‘കേരളം മെട്രോ റെയിൽ ലിമിറ്റഡ്’ എന്നാക്കി മാറ്റാനുള്ള നിർദേശമാണ് സർക്കാരിന് സമർപ്പിച്ചതെന്ന് KMRL വിശദീകരിച്ചു.
കൊച്ചി മെട്രോ പഴയ പേരിൽ തന്നെ തുടരുമെന്നും ഭാവിയിൽ തിരുവനന്തപുരം, കോഴിക്കോട് എന്നിവിടങ്ങളിൽ ആരംഭിക്കുന്ന മെട്രോകളും അതത് നഗരങ്ങളുടെ പേരിൽ തന്നെ അറിയപ്പെടുമെന്നും അധികൃതർ വിശദീകരിച്ചു. സംസ്ഥാനത്തെ വിവിധ മെട്രോ പദ്ധതികളെ, ഒരു കമ്പനിയുടെ കീഴിൽ കൊണ്ടുവരുന്നതിന്റെ ഭാഗമായാണ് കമ്പനിയുടെ പേര് മാറ്റാൻ നിർദേശിച്ചതെന്നും കൊച്ചി മെട്രോ വ്യക്തമാക്കി. മറ്റു സംസ്ഥാനങ്ങളിലെ മാതൃക പിന്തുടർന്നാണ് നിർദേശമെന്നും, സർക്കാരിന്റെ പൂർണ സമ്മതത്തോടെ മാത്രമേ നിർദേശം നടപ്പാക്കുകയുള്ളൂവെന്നും KMRL അറിയിച്ചു.
