കൊച്ചി. ആ ഭീകര മര്ദ്ദനം നടന്നത് വഴി കൊടുത്തില്ലെന്ന കാരണത്താല്,കഴിഞ്ഞദിവസം സോഷ്യല് മീഡിയയില് ഏവരേയും നടുക്കിയ അക്രമത്തിനു പിന്നിലെ കാരണം നിസാരമെന്നു കരുതാവുന്ന വഴിത്തര്ക്കമാണ്. ഒറ്റ ഇടിയില് പ്രതിയോഗി തറപറ്റുന്നതും അനക്കമറ്റ് കിടക്കുന്നതും വിഡിയോയില് കാണാം. മൂന്നു പേരെ അനക്കം വരുമ്പോഴെല്ലാം ഇടിക്കുകയും തൊഴിക്കുകയും ചെയ്യുന്നത് വിഡിയോവിലുണ്ട്.
ബൈക്ക് യാത്രക്കാരായ യുവാക്കളെയാണ് കാര് യാത്രക്കാര് ക്രൂരമായി മര്ദിച്ചത്. തൃക്കാക്കര എന്ജിഒ ക്വാര്ട്ടേഴ്സിന് സമീപമാണ് റോഡ് റേജിന് ഇരയായി യുവാക്കള്ക്ക് മര്ദനമേറ്റത്. ആക്രമണത്തില് വാഴക്കാല സ്വദേശികളായ മുഹമ്മദ് ഷാഫി, പ്രവീണ് കുമാര്, നിസാം എന്നിവര്ക്ക് ഗുരുതര പരിക്കേറ്റു. സംഭവത്തില് കണ്ടാലറിയാവുന്ന കാര് യാത്രക്കാര്ക്കെതിരെ കേസ് രജിസ്റ്റര് ചെയ്ത് പൊലീസ് അന്വേഷണം ആരംഭിച്ചു.
ബൈക്കില് യാത്ര ചെയ്യുകയായിരുന്ന യുവാക്കളെ പിറകില് നിന്നുവന്ന കാറിലുണ്ടായിരുന്ന സംഘം വാഹനം മറികടന്ന് തടഞ്ഞുനിര്ത്തുകയായിരുന്നു. തുടര്ന്ന് വഴി മാറ്റി കൊടുത്തില്ലെന്ന് ആരോപിച്ച് ബൈക്ക് യാത്രക്കാരുമായി തര്ക്കത്തിലേര്പ്പെടുകയും അവരെ ക്രൂരമായി മര്ദിക്കുകയുമായിരുന്നു. പ്രതികള് ഇടിവള കൊണ്ട് മുഖത്ത് അടിക്കുകയും ദേഹം മുഴുവന് ചവിട്ടുകയും ചെയ്തു. ആക്രമണത്തില് ഒരു യുവാവിന്റെ താടിയെല്ല് പൊട്ടുകയും പല്ലിന് ഇളക്കം സംഭവിക്കുകയും ചെയ്തിട്ടുണ്ട്.
മര്ദനത്തില് പരിക്കേറ്റ യുവാക്കളെ സമീപത്തെ ആശുപത്രിയില് പ്രവേശിപ്പിച്ചു. സംഭവത്തിന്റെ ദൃശ്യങ്ങള് പുറത്തുവന്നിട്ടുണ്ട്. സമീപത്തെ കൂടുതല് സിസിടിവി ദൃശ്യങ്ങള് ശേഖരിച്ചാണ് അന്വേഷണം പുരോഗമിക്കുന്നത്. ദൃക്സാക്ഷികളില് നിന്നും വിവരം തേടിയിട്ടുണ്ട്. പ്രതികള് സഞ്ചരിച്ച കാറിനെക്കുറിച്ചുള്ള വിവരങ്ങള് ശേഖരിച്ചുവരികയാണെന്നും അക്രമികളെ ഉടന് വലയിലാക്കുമെന്നും പോലീസ് അറിയിച്ചു.