തിരുവനന്തപുരം: കൃഷിവകുപ്പ് സ്പെഷല് സെക്രട്ടറി എന് പ്രശാന്ത് ഐഎഎസിനെതിരെ വീണ്ടും അച്ചടക്ക നടപടി. സര്ക്കാരിനെതിരെ അനുമതിയില്ലാതെ മാധ്യമങ്ങളോട് സംസാരിച്ചതിനാണ് എന് പ്രശാന്തിനെതിരെ വീണ്ടും നടപടി എടുത്തത്. ഇത് എട്ടാമത്തെ പ്രാവശ്യമാണ് പ്രശാന്തിനെതിരെ നടപടി എടുക്കുന്നത്.
ചീഫ് സെക്രട്ടറിയാണ് എന് പ്രശാന്തിന് നോട്ടീസ് നല്കിയത്. സര്ക്കാരിനെതിരെ അനുമതിയില്ലാതെ മാധ്യമങ്ങളോട് സംസാരിച്ചതിന് നിലവില് സസ്പെന്ഷനിലാണ് അദ്ദേഹം. റിവ്യൂകമ്മിറ്റി ചേരാനിരിക്കെയാണ് 8-ാമത്തെ തവണ നടപടി ആരംഭിച്ചത്.
ഡോ. എ ജയതിലകിനെതിരെ ആരോപണമുന്നയിച്ചതിന്റെ പേരിലാണ് പ്രശാന്തിനെ സര്വീസില് നിന്ന് സസ്പെന്ഡ് ചെയ്തത്. ഡോ.എ. ജയതിലകിനെതിരെ സമൂഹമാധ്യമങ്ങളിലൂടെ കടുത്ത വിമര്ശനം ഉന്നയിച്ചത് ചൂണ്ടിക്കാട്ടി 2024 നവംബര് 11നാണ് പ്രശാന്തിനെ സസ്പെന്ഡ് ചെയ്തത്. മതാടിസ്ഥാനത്തില് വാട്സാപ്പ് ഗ്രൂപ്പ് ഉണ്ടാക്കിയ സംഭവത്തില് കെ. ഗോപാലകൃഷ്ണനെയും ഇതേ ദിവസം സസ്പെന്ഡ് ചെയ്തിരുന്നു. രണ്ട് ഉദ്യോഗസ്ഥരെ ഒരേ ദിവസം സസ്പെന്ഡ് ചെയ്തത് കേരളത്തിന്റെ സിവില് സര്വീസ് ചരിത്രത്തില് ആദ്യവുമായിരുന്നു
