അകാലത്തില് വിടപറഞ്ഞ ഏക മകള് നന്ദനയുടെ പിറന്നാള് ദിനത്തില് ഹൃദയം തൊടുന്ന കുറിപ്പുമായി ഗായിക കെ. എസ്. ചിത്ര. സ്വര്ഗത്തിലെ മാലാഖയാണ് തന്റെ മകളെന്നാണ് ചിത്ര തന്റെ ഫേസ്ബുക്ക് പോസ്റ്റില് കുറിച്ചത്. കുട്ടിയുടെ ചിത്രവും പങ്കുവച്ചിട്ടുണ്ട്. നീ ഞങ്ങളെ വിട്ട് നേരത്തെ പോയെന്നും ചിലപ്പോള് നല്ല കുട്ടികളെ സ്വര്ഗത്തിലാവശ്യമുണ്ടായിരിക്കുമെന്നും ചിത്ര കുറിച്ചു.’ഞങ്ങളുടെ പ്രിയപ്പെട്ട മകള്, സ്വര്ഗത്തിലെ മാലാഖയായവള്, നീ ഞങ്ങളെ വിട്ട് നേരത്തെ പോയി. നിനക്കായി ഞങ്ങള് കരുതിവച്ച ജീവിതം ജീവിക്കാന് കൂടുതല് സമയം ലഭിച്ചെങ്കിലെന്ന് ആഗ്രഹിച്ചുപോകുന്നു. എന്നാല് ചിലപ്പോള് നല്ല കുട്ടികളെ സ്വര്ഗത്തിലാവശ്യമുണ്ടായിരിക്കും. നീ അവരില് ഒരാളാണ്. പിറന്നാള് ആശംസകള് നന്ദന’ – എന്നാണ് ചിത്ര കുറിച്ചത്. വര്ഷങ്ങള് നീണ്ട കാത്തിരിപ്പിന് ഒടുവില് 2002 ല് ആണ് ചിത്രയ്ക്കും ഭര്ത്താവ് വിജയശങ്കറിനും മകള് പിറന്നത്. 2011ല് ദുബായിലെ വില്ലയില് നീന്തല് കുളത്തില് വീണാണ് ഒമ്പത് വയസുകാരിയായ നന്ദന മരണപ്പെട്ടത്.