ഇടനിലക്കാരനായ വിഴിഞ്ഞം സ്വദേശി പിടിയിൽ; കൂടുതൽ പേരിലേക്ക് അന്വേഷണം
തിരുവനന്തപുരം: കോവളം സ്പാ പീഡനക്കേസിൽ ഒരാൾ കൂടി അറസ്റ്റിൽ. പെൺകുട്ടിയെ സ്പാകളിലെത്തിക്കാൻ ഇടനിലക്കാരനായി പ്രവർത്തിച്ചിരുന്ന വിഴിഞ്ഞം സ്വദേശി കിരണിനെയാണ് പൊലീസ് പിടികൂടിയത്. ആന്ധ്ര സ്വദേശിനിയായ 16കാരിയെ കോവളത്തെ സ്പാകളിലെത്തിച്ച് ലൈംഗിക ചൂഷണത്തിന് ഇരയാക്കിയ കേസിലാണ് അറസ്റ്റ്.
പെൺകുട്ടിയുടെ ഇളയമ്മയും ഭർത്താവും ഉൾപ്പെട്ട സംഘമാണ് കുട്ടിയെ കേരളത്തിലെത്തിച്ചതെന്നാണ് പൊലീസിന്റെ കണ്ടെത്തൽ. ബംഗളൂരു കേന്ദ്രീകരിച്ച് പ്രവർത്തിക്കുന്ന ഇടനിലക്കാരുമായും ഇവർക്ക് ബന്ധമുണ്ടായിരുന്നു. കേസിൽ അന്തർസംസ്ഥാന ഇടനിലക്കാരിയായ വാണിയെ നേരത്തെ അറസ്റ്റ് ചെയ്തിരുന്നു. പെൺകുട്ടിയെ തമിഴ്നാട്ടിലെ സ്പാകളിലും എത്തിച്ചിരുന്നതായി അന്വേഷണത്തിൽ വ്യക്തമായിട്ടുണ്ട്.
കോവളത്തെ സ്പാകളുടെ നടത്തിപ്പുമായി ബന്ധപ്പെട്ട് തിരുവനന്തപുരം കോർപറേഷൻ ജൂനിയർ ഹെൽത്ത് ഇൻസ്പെക്ടർ അനുരൂപ്, സ്പാ നടത്തിപ്പുകാരായ സജിത്ത് കുമാർ, നിഷാന്ത്, താൽക്കാലിക ജൂനിയർ ഹെൽത്ത് ഇൻസ്പെക്ടർ മായ എന്നിവരും നേരത്തെ അറസ്റ്റിലായിരുന്നു. സ്പാകളിൽനിന്നുള്ള വരുമാനം അനുരൂപിന്റെ അക്കൗണ്ടിലേക്ക് എത്തിയിരുന്നതായും പൊലീസ് കണ്ടെത്തിയിട്ടുണ്ട്.
പ്രതികളുടെ ഫോണുകളിൽനിന്ന് ലഭിച്ച വിവരങ്ങളും സാമ്പത്തിക ഇടപാടുകളുടെ രേഖകളും കേന്ദ്രീകരിച്ചാണ് അന്വേഷണം പുരോഗമിക്കുന്നത്. സെപ്റ്റംബറിൽ പെൺകുട്ടിയെ കാണാതായെന്ന പരാതിയിൽ നടത്തിയ അന്വേഷണത്തിനിടെയാണ് ലൈംഗിക ചൂഷണത്തിന്റെ വിവരം പുറത്തുവന്നത്. പെൺകുട്ടിയുടെ പ്രായം മാറ്റിക്കാണിക്കുന്ന തിരിച്ചറിയൽ രേഖകൾ ഉപയോഗിച്ചിരുന്നതായും കണ്ടെത്തിയിരുന്നു.
സംഘത്തിന് കൂടുതൽ പേരുമായി ബന്ധമുണ്ടോയെന്നും മറ്റ് പെൺകുട്ടികളെയും സമാനരീതിയിൽ സ്പാകളിലെത്തിച്ചിട്ടുണ്ടോയെന്നും പ്രത്യേക അന്വേഷണസംഘം പരിശോധിച്ചുവരികയാണ്.