അവസാന മത്സരത്തിൽ ഇന്ത്യയെ ഏഴു വിക്കറ്റിന് പരാജയപ്പെടുത്തി ന്യൂസിലൻഡ് ടി20 പരമ്പര 3-2ന് അവസാനിപ്പിച്ചു. അഞ്ചാം മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറിൽ എട്ടു വിക്കറ്റ് നഷ്ടത്തിൽ 191 റൺസെടുത്തു. മറുപടി ബാറ്റിങ്ങിനിറങ്ങിയ ന്യൂസിലൻഡ് 18 ഓവറിൽ മൂന്നു വിക്കറ്റ് നഷ്ടത്തിൽ ലക്ഷ്യം മറികടന്നു.
ന്യൂസിലൻഡിന്റെ വിജയത്തിൽ ഓപ്പണർ ടിം സെയ്ഫർട്ടിന്റെയും ഗ്ലെൻ ഫിലിപ്സിന്റെയും അർധസെഞ്ച്വറികളാണ് നിർണായകമായത്. പരമ്പരയിൽ ഇതുവരെ ഫോമിലെത്താൻ കഴിയാതിരുന്ന സെയ്ഫർട്ട് അവസാന മത്സരത്തിൽ തകർപ്പൻ പ്രകടനമാണ് പുറത്തെടുത്തത്. 50 പന്തിൽ 11 ഫോറും അഞ്ച് സിക്സുമടക്കം 93 റൺസ് നേടിയ താരം സെഞ്ച്വറിക്ക് ഏഴു റൺസ് അകലെ പുറത്തായി.
സഹ ഓപ്പണർ ഫിൻ അലൻ രണ്ടു റൺസിന് പുറത്തായി. തുടർന്ന് ഡാരിൽ മിച്ചൽ 16 പന്തിൽ നാല് സിക്സുകളടക്കം 29 റൺസെടുത്തു. പിന്നീട് സെയ്ഫർട്ടും ഗ്ലെൻ ഫിലിപ്സും ചേർന്ന് ന്യൂസിലൻഡ് ഇന്നിങ്സ് മുന്നോട്ടുനയിച്ചു. 38 പന്തിൽ എട്ട് ഫോറും മൂന്ന് സിക്സുമടക്കം 65 റൺസുമായി ഫിലിപ്സ് പുറത്താകാതെ നിന്നു. ഫോറടിച്ചാണ് താരം ടീമിന്റെ വിജയം പൂർത്തിയാക്കിയത്. ഇന്ത്യയ്ക്കായി അർഷ്ദീപ് സിങ്, വരുൺ ചക്രവർത്തി, നിതീഷ് കുമാർ റെഡ്ഡി എന്നിവർ ഓരോ വിക്കറ്റ് വീതം വീഴ്ത്തി.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് തുടക്കത്തിൽ തന്നെ തിരിച്ചടിയേറ്റു. ഓപ്പണർമാരായ അഭിഷേക് ശർമയും സഞ്ജു സാംസണും രണ്ടക്കം കാണാതെ മടങ്ങി. അഭിഷേക് റൺസൊന്നുമെടുക്കാതെ പുറത്തായപ്പോൾ സഞ്ജുവിന് നേടാനായത് നാലു റൺസ് മാത്രം. ആദം മിൽനെയായിരുന്നു ഇന്ത്യയുടെ തുടക്കത്തിലെ തകർച്ചയ്ക്ക് വഴിയൊരുക്കിയത്.
തുടർന്ന് ഒന്നിച്ച ഇഷാൻ കിഷനും ശ്രേയസ് അയ്യരും ചേർന്നാണ് ഇന്ത്യൻ ഇന്നിങ്സിന് കരുത്തേകിയത്. ഇരുവരും ചേർന്ന് 93 റൺസ് കൂട്ടിച്ചേർത്തു. 32 പന്തിൽ 61 റൺസെടുത്ത ഇഷാനും 23 പന്തിൽ 50 റൺസ് നേടിയ ശ്രേയസും ഇന്ത്യൻ സ്കോർ ഉയർത്തി. ഇരുവരും പുറത്തായതോടെ വീണ്ടും സമ്മർദത്തിലായ ഇന്ത്യയെ അവസാന ഓവറുകളിൽ നിതീഷ് കുമാർ റെഡ്ഡിയും നമൻ ധീറും ചേർന്നാണ് 191 റൺസിലെത്തിച്ചത്.
കഴിഞ്ഞ മത്സരത്തിൽ ഗ്ലെൻ ഫിലിപ്സിന്റെ സെഞ്ച്വറി കരുത്തിലാണ് ന്യൂസിലൻഡ് ഇന്ത്യയെ പരാജയപ്പെടുത്തിയത്. അവസാന മത്സരത്തിലും ബാറ്റിങ് മികവ് ആവർത്തിച്ച കിവികൾ വിജയത്തോടെ പരമ്പരയ്ക്ക് വിരാമമിട്ടു.