സീറ്റ് ബെല്‍റ്റ് ധരിക്കാതെ യാത്ര ചെയ്ത സംഭവത്തില്‍ ഖേദം പ്രകടിപ്പിച്ച് കരുനാഗപ്പള്ളി എംഎല്‍എ സി.ആര്‍. മഹേഷ്. സീറ്റ് ബെല്‍റ്റ് ധരിക്കാതെയും വാഹനം ഓടിക്കുന്നതിനിടെ മൊബൈല്‍ ഫോണ്‍ ഉപയോഗിച്ചും യാത്ര ചെയ്തതിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതിന് പിന്നാലെയാണ് എംഎല്‍എയുടെ പ്രതികരണം.
‘സീറ്റ് ബെല്‍റ്റ് ഇടാതെ യാത്ര ചെയ്യുന്നത് നിയമവിരുദ്ധമാണ്. എന്റെ ഭാഗത്ത് നിന്ന് അത്തരമൊരു പിഴവ് സംഭവിച്ചു. അതില്‍ ഖേദം പ്രകടിപ്പിക്കുന്നു. പലര്‍ക്കും അറിഞ്ഞും അറിയാതെയും ട്രാഫിക് നിയമലംഘനങ്ങള്‍ സംഭവിക്കാറുണ്ട്. പ്രത്യേകിച്ച് ജനപ്രതിനിധികളുടെ ഭാഗത്ത് നിന്ന് അത്തരം വീഴ്ചകള്‍ ഉണ്ടാകാന്‍ പാടില്ല’ എന്നാണ് സി.ആര്‍. മഹേഷ് ഫെയ്‌സ്ബുക്ക് കുറിപ്പില്‍ വ്യക്തമാക്കിയത്.
കായിക മന്ത്രി ഒ.ജെ. ജനീഷിന്റെ പേഴ്‌സണല്‍ സ്റ്റാഫ് അംഗമായ ജെയ്‌സണ്‍ ജെയിംസ് വാഹനം ഓടിക്കുന്നതിനിടെ മൊബൈല്‍ ഫോണില്‍ വീഡിയോ ചിത്രീകരിക്കുകയായിരുന്നു. ഡ്രൈവര്‍ ജെയ്‌സണും മുന്‍സീറ്റിലിരുന്ന സി.ആര്‍. മഹേഷും സീറ്റ് ബെല്‍റ്റ് ധരിച്ചിരുന്നില്ല. 12 സെക്കന്‍ഡ് ദൈര്‍ഘ്യമുള്ള വീഡിയോ സിനിമാഗാനത്തിന്റെ പശ്ചാത്തല സംഗീതത്തോടുകൂടി ഇന്‍സ്റ്റഗ്രാമിലും ഫെയ്‌സ്ബുക്കിലും റീല്‍സായി പോസ്റ്റ് ചെയ്തിരുന്നു.
ജനപ്രതിനിധികളും പൊതുപ്രവര്‍ത്തകരും ഉള്‍പ്പെട്ട നിയമലംഘന ദൃശ്യങ്ങള്‍ സമൂഹമാധ്യമങ്ങളില്‍ വ്യാപക വിമര്‍ശനത്തിന് ഇടയാക്കി. വിവാദം ശക്തമായതോടെ ജെയ്‌സണ്‍ ജെയിംസ് വീഡിയോ തന്റെ സോഷ്യല്‍ മീഡിയ അക്കൗണ്ടുകളില്‍നിന്ന് നീക്കം ചെയ്തെങ്കിലും അതിനകം ദൃശ്യങ്ങള്‍ വ്യാപകമായി പ്രചരിച്ചിരുന്നു.
