മുംബൈ: ഇന്ത്യയിലുള്പ്പെടെ വലവിരിച്ച് സ്പൈഡര്മാന്റെ കുതിപ്പ്. ടോം ഹോളണ്ട് നായകനായ ‘സ്പൈഡര്മാന്: ബ്രാന്ഡ് ന്യൂ ഡേ’ ഇന്ത്യന് ബോക്സ് ഓഫീസില് റെക്കോര്ഡുകള് തകര്ത്ത് മുന്നേറുയാണ്. റിലീസ് ചെയ്ത ആദ്യവാരത്തിനുള്ളില് ഇന്ത്യയില് നിന്ന് 300 കോടിയിലധികം ഗ്രോസ് കളക്ഷന് നേടിയ ചിത്രം രാജ്യത്ത് ഈ നേട്ടം കൈവരിക്കുന്ന ആദ്യ ഹോളിവുഡ് സിനിമയായി. നിര്മാതാക്കളായ സോണി പിക്ചേഴ്സാണ് ഔദ്യോഗിക കലക്ഷന് വിവരങ്ങള് പുറത്തുവിട്ടത്.
ട്രേഡ് ട്രാക്കറായ സാക്നില്ക്കിന്റെ കണക്കുപ്രകാരം, ഞായറാഴ്ച മാത്രം രാജ്യത്തെ 18,051 ഷോകളില് നിന്ന് ചിത്രം 76 കോടി രൂപയുടെ നെറ്റ് കലക്ഷന് നേടി. ഇതോടെ ഇന്ത്യയിലെ ആകെ നെറ്റ് കലക്ഷന് 256.20 കോടി രൂപയായപ്പോള് ഗ്രോസ് കലക്ഷന് 306.37 കോടി രൂപയായി ഉയര്ന്നു.
ചിത്രത്തിന്റെ ഇംഗ്ലീഷ് പതിപ്പാണ് ഏറ്റവും കൂടുതല് വരുമാനം നേടുന്നത്. അതേസമയം, ഹിന്ദി ഡബ്ബ് ചെയ്ത പതിപ്പിനും മള്ട്ടിപ്ലക്സുകളില് മികച്ച പ്രതികരണമാണ് ലഭിക്കുന്നത്. ഇന്ത്യയില് ഒരു ഹോളിവുഡ് ചിത്രം നേടിയ ഏറ്റവും വലിയ ബോക്സ് ഓഫീസ് നേട്ടമെന്ന റെക്കോര്ഡും ചിത്രത്തിന്റെ പേരിലായി.
കേരളത്തിലും ചിത്രം ചരിത്രവിജയം കുറിക്കുകയാണ്. സംസ്ഥാനത്ത് ഇതുവരെ 20 കോടി രൂപയിലധികം കലക്ഷന് നേടിയ ചിത്രം കേരള ബോക്സ് ഓഫീസില് ഏറ്റവും കൂടുതല് വരുമാനം നേടിയ ഹോളിവുഡ് സിനിമയായി മാറി. ആദ്യദിനത്തില് തന്നെ ഏകദേശം 5.5 കോടി രൂപ നേടിയ ചിത്രം വെള്ളി, ശനി, ഞായര് ദിവസങ്ങളില് സൂപ്പര്താര ചിത്രങ്ങള്ക്ക് സമാനമായ തിരക്കാണ് തിയറ്ററുകളില് സൃഷ്ടിച്ചത്. ഇംഗ്ലീഷിന് പുറമെ ഹിന്ദി, തമിഴ്, തെലുങ്ക്, കന്നഡ പതിപ്പുകളിലും മികച്ച പ്രതികരണം നേടി ചിത്രം വിജയകരമായി പ്രദര്ശനം തുടരുകയാണ്.