കൊല്ലം: കേരളകൗമുദി മൺറോത്തുരുത്ത് ലേഖകനും കോൺഗ്രസ് നേതാവുമായ കിഴക്കേകല്ലട ചൈത്രത്തിൽ ബി. അംബുജൻ (54) അന്തരിച്ചു. ഇന്നലെ രാവിലെ പത്ത് മണിയോടെ വീട്ടുമുറ്റത്തെ മാവിന്റെ ശിഖരം മുറിക്കുന്നതിനിടെ കാൽവഴുതി താഴെ വീണായിരുന്നു അപകടം.

വീട്ടിൽ മറ്റാരും ഇല്ലാതിരുന്ന സമയത്താണ് അപകടം സംഭവിച്ചത്. ഏറെ നേരം കഴിഞ്ഞിട്ടും അംബുജനെ കാണാത്തതിനെ തുടർന്ന് അയൽവാസി നടത്തിയ തിരച്ചിലിലാണ് വീണുകിടക്കുന്ന നിലയിൽ കണ്ടെത്തിയത്. ഉടൻ തന്നെ കുണ്ടറ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പാരലൽ കോളേജ് അദ്ധ്യാപകൻ കൂടിയായിരുന്നു അദ്ദേഹം.

പൊതുരംഗത്ത് സജീവമായിരുന്ന അംബുജൻ കോൺഗ്രസ് ശാസ്താംകോട്ട ബ്ലോക്ക് ജനറൽ സെക്രട്ടറി, കർഷക കോൺഗ്രസ് മണ്ഡലം പ്രസിഡന്റ് എന്നീ നിലകളിൽ പ്രവർത്തിച്ചു വരികയായിരുന്നു.

കുടുംബം

• ഭാര്യ: ബിനിത (അദ്ധ്യാപിക, പുനലൂർ എസ്.എൻ.ഡി.പി എച്ച്.എസ്.എസ്).
• മകൻ: അശ്വിൻ (എം.ബി.ബി.എസ് വിദ്യാർത്ഥി).