തിരുവനന്തപുരം: പരീക്ഷാക്കാലം കഴിഞ്ഞു…. ഇനി വെക്കേഷന്‍ മൂഡിലാണ് വിദ്യാര്‍ത്ഥികള്‍. സംസ്ഥാനത്തെ സ്‌കൂളുകളിലെ എസ്എസ്എല്‍സി പരീക്ഷ സമാപിച്ചു. ധാരാളം പ്രത്യേകതകളോടെയാണ് ഇത്തവണ എസ്എസ്എല്‍സി പരീക്ഷ എത്തിയത്. പാഠപുസ്തക പരിഷ്‌കരണത്തിന് ശേഷമുള്ള ആദ്യ പരീക്ഷയാണ് നടന്നത്.
വ്യത്യസ്ത മാതൃകകള്‍ ഇത്തവണ പരീക്ഷിച്ചിരുന്നു. ഐടി (Information Technology) പരീക്ഷയില്‍ നിര്‍മിത ബുദ്ധി (AI), റോബോട്ടിക്‌സ് എന്നിവ ഉള്‍പ്പെടുത്തിയത് ഇത്തവണത്തെ പ്രധാന ഹൈലൈറ്റാണ്. സാങ്കേതികവിദ്യയുടെ പുത്തന്‍ പാഠങ്ങള്‍ ഉള്‍ക്കൊണ്ടാണ് വിദ്യാര്‍ഥികള്‍ ഇത്തവണ പരീക്ഷയെ നേരിട്ടത്.

Also Read:

പരീക്ഷാ ഹാളുകളില്‍ നിന്നും ചിരിച്ചും കരഞ്ഞും പുറത്തേക്കിറങ്ങിയ വിദ്യാര്‍ഥികളുടെ വൈകാരികമായ കാഴ്ചകളാണ് സംസ്ഥാനത്തെ വിവിധ സ്‌കൂളുകളില്‍ ദൃശ്യമായത്. പ്രിയപ്പെട്ട കൂട്ടുകാരെ പിരിയുന്നതിന്റെ വിഷമമാണ് ഒരു വശത്തെങ്കില്‍, പരീക്ഷാ പഠനം കഴിഞ്ഞ് ഇനി വരാനിരിക്കുന്ന രണ്ട് മാസത്തെ അവധിക്കാലം ആഘോഷമാക്കാനുള്ള ആവേശത്തിലാണ് മറ്റു ചിലര്‍.
പരസ്പരം ഷര്‍ട്ടുകളില്‍ ഛായങ്ങള്‍ വിതറിയും, ഹൃദയസ്പര്‍ശിയായ വരികള്‍ ഓട്ടോഗ്രാഫുകളില്‍ കുറിച്ചും വിദ്യാര്‍ഥികള്‍ ബൈ പറഞ്ഞു. പതിവ് രീതികള്‍ക്ക് മോഡേണ്‍ യു?ഗത്തിലും മാറ്റമില്ലെന്ന് തെളിയിക്കുന്നതായിരുന്നു പല വിദ്യാലയങ്ങളില്‍ നിന്നുമുള്ള കാഴ്ചകള്‍.

അതേസമയം ഗള്‍ഫ് മേഖലയില്‍ കേരള സിലബസ് പിന്തുടരുന്ന സ്‌കൂളുകളിലെ എസ്എസ്എല്‍സി, ഹയര്‍ സെക്കന്‍ഡറി പരീക്ഷകള്‍ സംഘര്‍ഷത്തിന്റെ പശ്ചാത്തലത്തില്‍ മാറ്റിയിരുന്നു. ഇവര്‍ക്ക് പിന്നീട് പരീക്ഷ നടത്തണോ അതോ മുന്‍കാല പഠനമികവിന്റെ അടിസ്ഥാനത്തില്‍ ശാസ്ത്രീയമായി മാര്‍ക്ക് നിര്‍ണയിക്കണോ എന്ന് തീരുമാനമെടുക്കും.

കേരളത്തില്‍ 4,17,497 കുട്ടികളാണ് പത്താംക്ലാസ് പരീക്ഷ എഴുതിയത്. മൂല്യനിര്‍ണയ ക്യാമ്പുകള്‍ ഏപ്രില്‍ 16ന് ആരംഭിച്ച് മെയ് രണ്ടിന് പൂര്‍ത്തിയാകും. മെയ് മൂന്നാംവാരത്തിനുള്ളില്‍ എസ്എസ്എല്‍സി പരീക്ഷാ ഫലപ്രഖ്യാപനം നടത്തും. പ്ലസ് ടു ഫലപ്രഖ്യാപനം മെയ് 22ന് നടത്തും.

ഒന്നുമുതല്‍ ഒമ്പതുവരെയുള്ള ക്ലാസുകളുടെ പരീക്ഷകള്‍ പൂര്‍ത്തിയാക്കി ചൊവ്വാഴ്ച മധ്യവേനലവധിക്കായി സ്‌കൂള്‍ അടയ്ക്കും. ഹയര്‍ സെക്കന്‍ഡറി, വിഎച്ച്എസ്ഇ പരീക്ഷകള്‍ ശനിയാഴ്ച പൂര്‍ത്തിയായിരുന്നു.

കൊച്ചി: സംസ്ഥാനത്ത് വീണ്ടും സ്വര്‍ണവില കുറഞ്ഞു. പവന് ഒറ്റയടിക്ക് 600 രൂപയാണ് കുറഞ്ഞത്. 1,08,000 രൂപയാണ് ഒരു പവന്‍ സ്വര്‍ണത്തിന്റെ വില. ഗ്രാമിന് ആനുപാതികമായി 75 രൂപയാണ് കുറഞ്ഞത്. 13,500 രൂപയാണ് ഒരു ഗ്രാം സ്വര്‍ണത്തിന്റെ വില.
പശ്ചിമേഷ്യന്‍ സംഘര്‍ഷത്തെ തുടര്‍ന്ന് ആഗോള വിപണിയില്‍ ഉണ്ടായ അനിശ്ചിതത്വം സ്വര്‍ണ വിലയെ കാര്യമായിത്തന്നെ സ്വാധീനിക്കുന്നുണ്ട്. കഴിഞ്ഞ ദിവസങ്ങളില്‍ അസംസ്‌കൃത എണ്ണ വില കുറഞ്ഞപ്പോഴാണ് സ്വര്‍ണ വില തിരിച്ചുകയറാന്‍ തുടങ്ങിയത്.

Also Read

ഈ മാസത്തിന്റെ തുടക്കത്തില്‍ 1,26,920 രൂപയായിരുന്നു പവന്‍ വില. പിന്നീടുള്ള ദിവസങ്ങളില്‍ വില താഴുകയായിരുന്നു. മൂന്നാഴ്ചയ്ക്കിടെ 26,000 രൂപയിലേറെ ഇടിഞ്ഞ് ഒരു ലക്ഷത്തില്‍ താഴെയെത്തിയ ശേഷമാണ് വില തിരിച്ചുകയറിയത്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന്‍ വില ആദ്യമായി ഒരു ലക്ഷം കടന്നത്.

ഫിറ്റ്നസ് ട്രെയ്നറായ യുവതിയെ കുത്തിയ ശേഷം യുവാവ് ആത്മഹത്യക്കു ശ്രമിച്ചു. തിരുവനന്തപുരം പാറശാലയില്‍ ആണ് സംഭവം. പാറശാല സ്വദേശി അശ്വന്താണ് യുവതിയെ ആക്രമിച്ച ശേഷം ജീവനൊടുക്കാന്‍ ശ്രമിച്ചത്. രാവിലെ പത്തു മണിയോടെയാണ് സംഭവം. പാറശാല പ്ലാമൂട്ടുകടയിലെ ജിമ്മിലെ ഫിറ്റ്നസ് ട്രെയിനര്‍ ആയ കാവ്യയ്ക്കാണ് നെഞ്ചിലും തലയ്ക്കു പിന്നിലും കുത്തേറ്റത്.

Also Read

രാവിലെ പത്തു മണിയോടെ ഇരുചക്രവാഹനത്തില്‍ സ്ഥലത്തെത്തിയ അശ്വന്ത് ജിമ്മില്‍ ആരും ഇല്ലെന്ന് ഉറപ്പാക്കിയ ശേഷം അകത്തു കയറി കാവ്യയെ ആക്രമിക്കുകയായിരുന്നു. തിരഞ്ഞെടുപ്പ് പ്രചാരണത്തിനു ജിമ്മില്‍ എത്തിയ രാഷ്ട്രീയ പ്രവര്‍ത്തകരാണ് കാവ്യയെ രക്തത്തില്‍ കുളിച്ച നിലയില്‍ കണ്ടെത്തിയത്. തുടര്‍ന്ന് ഇവര്‍ പൊലീസില്‍ വിവരം അറിയിക്കുകയും ആംബുലന്‍സ് വിളിച്ച് കാവ്യയെ ആശുപത്രിയിലേക്കു കൊണ്ടുപോകുകയുമായിരുന്നു.
കാവ്യയെ തീവ്രപരിചരണ വിഭാഗത്തില്‍ പ്രവേശിപ്പിച്ചു. ജിമ്മില്‍നിന്ന് പൊലീസ് കസ്റ്റഡിയില്‍ എടുത്ത അശ്വന്ത് താന്‍ എലിവിഷം കഴിച്ചിട്ടുണ്ടെന്ന് പറഞ്ഞതിനെ തുടര്‍ന്ന് മെഡിക്കല്‍ കോളജ് ആശുപത്രിയിലേക്കു കൊണ്ടുപോയി. അശ്വന്തിനു കാവ്യയോടുള്ള വൈരാഗ്യത്തിന്റെ കാരണം അന്വേഷിക്കുകയാണെന്നു പാറശാല പൊലീസ് പറഞ്ഞു.

പ്രമുഖ ഓണ്‍ലൈന്‍ ഷോപ്പിംഗ് പ്ലാറ്റ്‌ഫോമായ ‘മീഷോ’ (Meesho Shopping Pvt. Ltd) എന്ന സ്ഥാപനത്തിന്റെ പേരില്‍ രജിസ്റ്റര്‍ഡ് പോസ്റ്റ് വഴി വ്യാജ സമ്മാന കത്തുകള്‍ അയച്ച് തട്ടിപ്പ്. തട്ടിപ്പുകാര്‍ അയക്കുന്ന കത്തുകളില്‍ ആകര്‍ഷകമായ സ്‌ക്രാച്ച് കാര്‍ഡുകള്‍ ഉള്‍പ്പെടുത്തിയിരിക്കും. ഇത് സ്‌ക്രാച്ച് ചെയ്യുമ്പോള്‍ വലിയൊരു തുക സമ്മാനം ലഭിച്ചതായി കാണിക്കുകയും തുക കൈപ്പറ്റാനായി കത്തിലുള്ള ഹെല്‍പ്ലൈന്‍ നമ്പറിലോ വാട്സ്ആപ്പ് നമ്പറിലോ ബന്ധപ്പെടാന്‍ ആവശ്യപ്പെടുകയും ചെയ്യുന്നതോടെയാണ് തട്ടിപ്പിന് തുടക്കമാകുന്നതെന്ന് കേരള പൊലീസിന്റെ മുന്നറിയിപ്പില്‍ പറയുന്നു.

Also Read:

കമ്പനി പ്രതിനിധികള്‍ എന്ന വ്യാജേന സംസാരിക്കുന്ന തട്ടിപ്പുകാര്‍, സമ്മാനത്തുക ലഭിക്കുന്നതിന് മുന്നോടിയായി പ്രോസസ്സിംഗ് ഫീസ്, ഡോക്യുമെന്റേഷന്‍ ചാര്‍ജ്, ഇന്‍കം ടാക്സ് തുടങ്ങിയ ഇനങ്ങളില്‍ പണം ആവശ്യപ്പെടുന്നു. വിശ്വാസ്യത വര്‍ദ്ധിപ്പിക്കാനായി വ്യാജമായ ഇന്‍കം ടാക്സ് രേഖകളും മറ്റ് ഔദ്യോഗിക മുദ്രകളും ഇവര്‍ അയച്ചുനല്‍കും. പണം കൈമാറിക്കഴിഞ്ഞാല്‍ പിന്നീട് ഇവരുമായി ബന്ധപ്പെടാന്‍ സാധിക്കിക്കുന്നതല്ലെന്നും മുന്നറിയിപ്പില്‍ പറയുന്നു.

സ്‌ക്രാച്ച് കാര്‍ഡ്/ഗിഫ്റ്റ് ഓഫര്‍ എന്ന പേരില്‍ പണം ആവശ്യപ്പെടുന്നവരെ ഒഴിവാക്കുക. സമ്മാനം നല്‍കുന്നതിന് പകരമായി ‘പ്രോസസ്സിംഗ് ഫീസ്’ അല്ലെങ്കില്‍ ‘ടാക്സ്’ മുന്‍കൂറായി ആവശ്യപ്പെടുന്നത് തട്ടിപ്പിന്റെ ലക്ഷണമാണ്. അപരിചിതമായ നമ്പറുകളിലേക്ക് വിളിക്കുകയോ വാട്സ്ആപ്പ് വഴി വ്യക്തിഗത വിവരങ്ങള്‍ പങ്കുവെക്കുകയോ ചെയ്യാതിരിക്കുക. സൈബര്‍ സാമ്പത്തിക തട്ടിപ്പിന് ഇരയായാല്‍ ഉടന്‍ തന്നെ 1930 എന്ന സൈബര്‍ ഹെല്‍പ്ലൈന്‍ നമ്പറിലോ www.cybercrime.gov.in എന്ന ദേശീയ സൈബര്‍ ക്രൈം പോര്‍ട്ടലിലോ പരാതി രജിസ്റ്റര്‍ ചെയ്യേണ്ടതാണെന്നും കേരള പൊലീസ് അറിയിച്ചു.