കൊച്ചി: വൈറ്റില റെയിൽവേ ട്രാക്കിന് സമീപം 35 വയസ്സിനോട് അടുത്ത പ്രായം തോന്നിക്കുന്ന യുവതിയെ മരിച്ച നിലയിൽ കണ്ടെത്തി. റെയിൽവേ പാലത്തിന്റെ തൂണിനോട് ചേർന്നാണ് മൃതദേഹം കിടന്നിരുന്നത്. ഇത് കൊലപാതകമാണെന്ന സംശയത്തിലാണ് പോലീസ് അന്വേഷണം പുരോഗമിക്കുന്നത്.
യുവതിയുടെ മുഖത്ത് ഉൾപ്പെടെ പരിക്കേറ്റ പാടുകൾ കണ്ടെത്തിയിട്ടുണ്ട്. മറ്റെവിടെയെങ്കിലും വെച്ച് കൊലപ്പെടുത്തിയ ശേഷം മൃതദേഹം ഇവിടെ കൊണ്ടുവന്ന് തള്ളിയതാകാം എന്നാണ് പ്രാഥമിക നിഗമനം. മൃതദേഹത്തിന് സമീപത്ത് നിന്ന് ഒരു മൊബൈൽ ഫോൺ പോലീസിന് ലഭിച്ചിട്ടുണ്ട്. ഇത് കേന്ദ്രീകരിച്ച് യുവതിയെ തിരിച്ചറിയാനുള്ള ശ്രമങ്ങൾ നടക്കുന്നു.
ഫൊറൻസിക് സംഘവും പോലീസും സ്ഥലത്തെത്തി വിശദമായ പരിശോധനകൾ നടത്തി. ഞായറാഴ്ച രാത്രിയിലാകാം മൃതദേഹം ഇവിടെ ഉപേക്ഷിച്ചതെന്ന് പോലീസ് കരുതുന്നു. യുവതിയെ തിരിച്ചറിയുന്നതിനായി സമീപത്തെ സിസിടിവി ദൃശ്യങ്ങളും കാണാതായവരെക്കുറിച്ചുള്ള വിവരങ്ങളും പോലീസ് പരിശോധിച്ചുവരികയാണ്. ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്‌മോർട്ടത്തിനായി മാറ്റും.
