ലോണ്‍ ആപ്പുവഴി തട്ടിപ്പ് നടത്തുന്ന സംഘം പിടിയില്‍. തിരുവനന്തപുരം പോങ്ങുമ്മൂട് ചേന്തിയിലാണ് ഓഫീസ് ഉള്ളത്. ലോകം മുഴുവന്‍ ഉള്ള ഇടപാടുകള്‍ വഴി കോടികളാണ് സംഘം തട്ടിയെടുത്തത്. സ്ഥാപനത്തിലെ ജീവനക്കാര്‍ അടക്കം 18 ഉത്തരേന്ത്യക്കാരെ പോലീസ് കസ്റ്റഡിയിലെടുത്തു. ഓഫീസ് റെയ്ഡിനിടെ 50 ഓളം കമ്പ്യൂട്ടറുകള്‍ പിടിച്ചെടുത്തു. പരിശോധന രാത്രി വൈകിയും തുടരുകയാണ്.
സൈബര്‍ പോലീസും ശ്രീകാര്യം- മെഡിക്കല്‍ കോളേജ് പോലീസും സംയുക്തമായാണ് പരിശോധന നടത്തുന്നത്. ഓപ്പറേഷന്‍ തൂഫാന്റെ ഭാഗമായി നടത്തിയ പരിശോധനയിലാണ് തട്ടിപ്പ് സംഘത്തെ പിടികൂടിയത്. പോലീസ് പോലീസ് എത്തുന്ന വിവരം അറിഞ്ഞ് രക്ഷപ്പെടാന്‍ ശ്രമിച്ച സംഘത്തില്‍പ്പെട്ട ഒരാളെ എയര്‍പോര്‍ട്ടില്‍ നിന്നും പോലീസ് കസ്റ്റഡിയിലെടുത്തു. തുടര്‍ന്ന് നടത്തിയ പരിശോധനയിലാണ് 18 പേരെ കസ്റ്റഡിയിലെടുത്തത്.
സംഘത്തില്‍ സ്ത്രീകളും ഉണ്ടെന്നാണ് വിവരം. കൂടുതല്‍ ഉദ്യോഗസ്ഥര്‍ സ്ഥലത്തെത്തി പരിശോധന തുടരുന്നു. ഇതര സംസ്ഥാന തൊഴിലാളികള്‍ ലഹരി കച്ചവടം നടത്തുന്ന എന്നായിരുന്നു രഹസ്യ വിവരം. ഇതിന്റെ അടിസ്ഥാനത്തില്‍ പരിശോധിച്ചപ്പോള്‍ ആണ് തട്ടിപ്പ് കമ്പനി കണ്ടെത്തിയത്. കൂടുതലും വിദേശികളാണ് തട്ടിപ്പിന് ഇരയായവര്‍. ഇടപാടുകാര്‍ കൂടുതലും അമേരിക്കക്കാരാണ്.
