മലപ്പുറത്ത് സിഗററ്റ് പാക്കറ്റിനുള്ളിൽ ഒളിപ്പിച്ച് കടത്തിയ എംഡിഎംഎ പൊലീസ് പിടികൂടി.
പ്രായപൂർത്തിയാകാത്ത പെൺകുട്ടിയടക്കം മൂന്ന് പേരെ കൽപകഞ്ചേരി പോലീസ് അറസ്റ്റ് ചെയ്തു. രഹസ്യവിവരത്തെ തുടർന്നുള്ള വാഹന പരിശോധനയിലാണ് ലഹരി കണ്ടെത്തിയത് .
രഹസ്യവിവരത്തിന്റെ അടിസ്ഥാനത്തിൽ എടരിക്കോട് മമ്മാലിപ്പടിയിൽ കൽപകഞ്ചേരി പോലീസ് വാഹന പരിശോധന ശക്തമാക്കുകയായിരുന്നു. ഇതിനിടെ സംശയാസ്പദമായി എത്തിയ കറുത്ത ഹ്യുണ്ടായി ക്രെറ്റ കാർ പോലീസ് തടഞ്ഞുനിർത്തി. കാറിനുള്ളിൽ നടത്തിയ വിശദമായ പരിശോധനയിലാണ് സിഗററ്റ് പാക്കറ്റിനുള്ളിൽ ഒളിപ്പിച്ച നിലയിൽ എംഡിഎംഎ കണ്ടെത്തിയത്.
കാറിലുണ്ടായിരുന്ന മഞ്ചേരി ഇളംകൂർ സ്വദേശി കൊയിലാണ്ടി വീട്ടിൽ അനസിനെയും, കോഴിച്ചെന പെരുമണ്ണ പാടത്തേരി മുഹമ്മദ് ഷാനുവിനെയും പോലീസ് അറസ്റ്റ് ചെയ്തു. ഇവർക്കൊപ്പമുണ്ടായിരുന്ന പ്രായപൂർത്തിയാകാത്ത പെൺകുട്ടിയെ ജുവനൈൽ നിയമപ്രകാരം കസ്റ്റഡിയിലെടുത്തു.
സിഗററ്റ് പാക്കറ്റിനുള്ളിൽ ഒളിപ്പിച്ചിരുന്ന 1.24 ഗ്രാം എംഡിഎംഎയാണ് പോലീസ് പിടിച്ചെടുത്തത്. പ്രതികൾ സഞ്ചരിച്ച കെ.എൽ.07 സി.ആർ.2340 നമ്പർ കറുത്ത ഹ്യുണ്ടായി ക്രെറ്റ കാറും കസ്റ്റഡിയിലെടുത്തു.ലഹരി എവിടെ നിന്നാണ് എത്തിച്ചത്, ആർക്കാണ് കൈമാറാനിരുന്നത്, പിന്നിൽ വലിയ ലഹരി ശൃംഖലയുണ്ടോയെന്നതടക്കമുള്ള കാര്യങ്ങൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്. കൂടുതൽ പ്രതികളിലേക്കും ലഹരി വിതരണ സംഘത്തിലേക്കും അന്വേഷണം വ്യാപിപ്പിച്ചിരിക്കുകയാണ് കൽപകഞ്ചേരി പോലീസ്.
