സംസ്ഥാനത്തെ ഐഎഎസ് തലപ്പത്ത് അഴിച്ചുപണിയുമായി സർക്കാർ. തിരുവനന്തപുരം, കാസർകോഡ് അടക്കമുള്ള വിവിധ ജില്ലകളിലെ കളക്ടർമാർക്കും പ്രധാന വകുപ്പുകളിലെ തലവന്മാർക്കുമാണ് പുതിയ ചുമതലകൾ നൽകിയിരിക്കുന്നത്.
അഞ്ജു കെ.എസ് ഐഎഎസിനെ തിരുവനന്തപുരം ജില്ലാ കലക്ടറായി നിയമിച്ചു. തിരുവനന്തപുരം കളക്ടറായിരുന്ന അനു കുമാരി ഐഎഎസിനെ ജിഎസ് ടി സ്പെഷ്യൽ കമ്മീഷണറായാണ് മാറ്റി നിയമിച്ചിരിക്കുന്നത്. ഭക്ഷ്യസുരക്ഷാ കമ്മീഷണറായിരുന്ന ശ്രീധന്യ സുരേഷ് ഐഎഎസിനെ കാസർകോട് ജില്ലാ കലക്ടറായും നിയമിച്ചു. പൊതുവിദ്യാഭ്യാസ ഡയറക്ടറായിരുന്ന സ്നേഹിൽ കുമാർ സിങ് ഐഎഎസിനെ വ്യവസായ-വാണിജ്യ വകുപ്പ് ഡയറക്ടറായി നിയമിച്ചു. ഇൻബശേഖർ കെ. ഐഎഎസിനെ സംസ്ഥാന ലോട്ടറീസ് ഡയറക്ടറായും ശ്രീറാം വെങ്കിട്ടരാമൻ വനം-വന്യജീവി വകുപ്പ് ജോയിന്റ് സെക്രട്ടറിയായും നിയമിച്ചു.
ശബരിമലയിൽ എഡിഎം ആയി പുതിയ തസ്തിക രൂപീകരിച്ചു. ദിലീപ് കൈനകരി ഐഎസ് ആണ് പുതിയ എഡിഎം. മണ്ഡലകാല-മകരവിളക്ക് മഹോത്സവ സമയങ്ങളിൽ ശബരിമല, പമ്പ എന്നിവിടങ്ങളിലെ പൂർണ ചുമതല പുതിയ എഡിഎമ്മിനായിരിക്കും. തീർഥാടകർക്കായുള്ള സൗകര്യങ്ങൾ ഉറപ്പാക്കുന്നതിനും സുരക്ഷാ-ഭരണനിർവഹണ ഏകോപനത്തിനുമാണ് തസ്തിക രൂപീകരിച്ചത്.
ഡോ. ബിനു ഫ്രാൻസിസ് ഐഎഎസിനെ പട്ടികവർഗ വികസന വകുപ്പ് ഡയറക്ടറായും ഡോ. ഹരികുമാർ കെ. ഐഎഎസിനെ സിവിൽ സപ്ലൈസ് ആൻഡ് കൺസ്യൂമർ അഫയേഴ്സ് കമ്മീഷണറായും അനു എസ്. നായർ ഭക്ഷ്യസുരക്ഷാ കമ്മീഷണറായുമാണ് നിയമിച്ചത്. ആകെ 36 ഐഎഎസ് ഉദ്യോഗസ്ഥരുടെ മാറ്റം ആണ് ഉത്തരവായി പുറത്തിറക്കിയത്.