ശാസ്താംകോട്ട: ഒ.പി വിഭാഗത്തിൽ ദിവസവും 250 ൽപ്പരം രോഗികൾ ചികിത്സ തേടിയെത്തുന്ന മലനടയിലെ പോരുവഴി പ്രാഥമിക ആരോഗ്യ കേന്ദ്രത്തിൽ ഡോക്ടറുടെ കുറവ് പരിഹരിക്കാൻ നടപടികൾ സ്വീകരിച്ചതായി കൊടിക്കുന്നിൽ സുരേഷ് എം.പി അറിയിച്ചു.എൻഎച്ച്എം വഴി മറ്റൊരു ഡോക്ടറെ കൂടി പുതുതായി നിയമിച്ചു.തിങ്കളാഴ്ച മുതൽ ഈ ഡോക്ടറുടെ സേവനം ആശുപത്രിയിൽ ലഭ്യമാകും.രാവിലെ 8 മുതൽ ഉച്ചയ്ക്ക് 2 വരെ നടക്കുന്ന ഒ.പി വിഭാഗത്തിൽ ചികിത്സ തേടിയെത്തുന്ന രോഗികളെ.പരിശോധിക്കുന്നതിന് ഒരു ഡോക്ടർ മാത്രമാണ് ഉണ്ടായിരുന്നത്.ഇമ്മ്യൂണൈസേഷൻ,മറ്റ് മീറ്റിങ്ങുകൾ എന്നിവയ്ക്കായി മെഡിക്കൽ ഓഫീസർ കൂടിയായ ഈ ഡോക്ടർ പോയാൽ ആശുപത്രിയുടെ പ്രവർത്തനം തന്നെ താളം തെറ്റുന്ന അവസ്ഥയിലായിരുന്നു.ഇത് പലപ്പോഴും രോഗികളും ജീവനക്കാരുമായി വാക്കുതർക്കത്തിനും കാരണമാകുന്നു.അവികസിത പ്രദേശമായ പോരുവഴി പഞ്ചായത്തിലെ സാധാരണക്കാരായ ജനങ്ങളുടെ ഏക ആശ്രയമാണ് ഈ ആതുരാലയം.നിരവധി പട്ടികജാതി ഉന്നതികൾ സ്ഥിതി ചെയ്യുന്ന പ്രദേശം കൂടിയാണിത്.ബസ് സൗകര്യം കുറഞ്ഞ ഗ്രാമപ്രദേശങ്ങൾ കൂടിയായതിനാൽ സാധാരണക്കാർക്ക് അടൂരിലോ ശാസ്താംകോട്ടയിലോ ചികിത്സ തേടി പോകണമെങ്കിൽ വലിയ തുക തന്നെ കണ്ടെത്തേണ്ടതുണ്ട്.ജീവനക്കാരുടെ കുറവ് പരിഹരിച്ച് ആശുപത്രിയുടെ പ്രവർത്തനം കാര്യക്ഷമമാക്കണമെന്ന് ആവശ്യപ്പെട്ട് മെഡിക്കൽ ഓഫീസർ ആരോഗ്യ വകുപ്പിലെ ഉന്നതർക്കും കൊടിക്കുന്നിൽ സുരേഷ് എം.പിക്കും പരാതി നൽകിയിരുന്നു.

ശാസ്താംകോട്ട.പു ക സ കുന്നത്തൂർ ഏരിയ കമ്മറ്റി പ്രതിഷേധ സായാഹ്നസദസ്സ് സംഘടിപ്പിച്ചു.
വെനീസ്വലയുടെ പരമാ ധികാരത്തെ തകർത്തുകൊണ്ട് അവിടുത്തെ പ്രസിഡന്റിനെയും ഭാര്യയെയും ബന്ധിയാക്കിയ അമേരിക്കൻ പ്രസിഡന്റ് ട്രമ്പിന്റെ അധികാര ദാർഷ്ട്യത്തെ അപലപിച്ചുകൊണ്ട് പുരോഗമന കലാസാഹിത്യ സംഘം കുന്നത്തൂർ ഏരിയ കമ്മറ്റി സംഘടിപ്പിച്ച പ്രതിഷേധ സദസ്സ് ജില്ലാ സെക്രട്ടറി ഡോ സി ഉണ്ണികൃഷ്ണൻ ഉത്ഘാടനം ചെയ്‌തു. ഏരിയ പ്രസിഡന്റ് ശ്രീരാമൻ അധ്യക്ഷത വഹിച്ച യോഗത്തിൽ ഏരിയ സെക്രട്ടറി അനിൽകുമാർ, ബി സി പിള്ള, ഗിരിജകുമാരി, ബഹുലേയൻ, അഖിൽ പി ഓണമ്പലം ലക്ഷ്മണൻ, പി ടി. ഗിരിശൻ എന്നിവർ സംസാരിച്ചു.

ശാസ്താംകോട്ട . കേരളത്തിലൂടെ ഓടുന്ന 16 ട്രെയിനുകൾക്ക് സംസ്ഥാനത്തെ വിവിധ സ്റ്റേഷനുകളിൽ അധിക സ്റ്റോപ്പ് അനുവദിച്ചത് റെയിൽവേ മന്ത്രാലയം നടപടി സ്വീകരിച്ചപ്പോൾ ശാസ്താംകോട്ടക്കാര്‍ക്ക് നിരാശ. ഒട്ടേറെ ട്രയിനുകള്‍ക്ക് സ്റ്റോപ്പു ലഭിച്ച വികസന പാതയിലുള്ള സ്റ്റേഷനെ പുതിയ വികസനത്തില്‍ ഒഴിവാക്കിയത് കൊടിക്കുന്നില്‍ സുരേഷ് എംപി കൈവിട്ടതിനാലാണെന്ന് പിന്നാമ്പുറ സംസാരമുണ്ട്. ശാസ്താംകോട്ടക്ക് നിരവധി ട്രയിനുകള്‍ക്ക് സ്റ്റോപ്പ് അനുവദിച്ചു ഏറെ ജനപ്രിയനായിമാറിയ എംപിയെ അടുത്തിടെ ഏറനാടിന് സ്റ്റോപ്പ് അനുവദിച്ചതില്‍ ബിജെപിക്കു പിന്നില്‍ നിര്‍ത്തിയത് അസ്വാരസ്യമുണ്ടാക്കിയിരുന്നു. കേന്ദ്രമന്ത്രി ജോര്‍ജ്ജ് കുര്യനാണ് സ്റ്റോപ്പ് അനുവദിക്കാന്‍ കാരണമെന്നും രാജീവ് ചന്ദ്രശേഖറാണ് ഇടപെട്ടതെന്നുമുള്ള പ്രചാരണം സ്ഥിരമായി ശാസ്താംകോട്ടക്കായി പ്രവര്‍ത്തിച്ചിരുന്ന കൊടിക്കുന്നിലിന് ഇഷ്ടമായില്ലെന്ന് പിന്നാമ്പുറ സംസാരമുണ്ട്.കേന്ദ്രമന്ത്രി ജോര്‍ജ്ജ് കുര്യനെ ശാസ്താംകോട്ടയിലെത്തിച്ച് കോണ്‍ഗ്രസിന്‍റെ മേല്‍ക്കൈ മറികടക്കാനും ബിജെപിക്ക് ആയി.

മാത്രമല്ല ഗ്രൂപ്പുസമവാക്യങ്ങള്‍ മൂലം കുന്നത്തൂരിലെ കോണ്‍ഗ്രസ് നേതൃത്വം പൊതുവേ കൊടിക്കുന്നിലിനോടുള്ള വിധേയത്വം കുറച്ചിരിക്കയാണ്. ഇതെല്ലാമാണ് ശാസ്താംകോട്ടയുടെ വികസനത്തിന് ചുവപ്പു ലൈറ്റായതെന്നാണ് സൂചന. ഇടയില്‍ കയറി മിടുക്കുകാട്ടിയ ബിജെപി നേതാക്കള്‍ക്ക് കുന്നത്തൂരില്‍ പ്രത്യേക രാഷ്ട്രീയ താല്‍പര്യവുമില്ലത്രേ. റെയില്‍മന്ത്രാലയവുമായി നല്ല ബന്ധമുള്ള നേതാവാണ് കൊടിക്കുന്നില്‍. ഏതുഭരണമായാലും കാര്യങ്ങള്‍ സാധിച്ചെടുക്കാന്‍ ഇടപെടാന്‍ ഇതുമൂലം കൊടിക്കുന്നിലിന് കഴിയുമായിരുന്നുവെന്ന് നേതാക്കള്‍ പറയുന്നു

ശാസ്താംകോട്ട റെയിൽവേ സ്റ്റേഷനെ ഒഴിവാക്കിയതിനെതിരെ വ്യാപക പ്രതിഷേധം ഉയര്‍ന്നിട്ടുണ്ട്. പുതിയ സ്റ്റോപ്പുകൾ അനുവദിക്കുമ്പോൾ ശാസ്താംകോട്ട റെയിൽവേസ്റ്റേഷനിൽ കൂടുതൽ ട്രെയിനുകൾക്ക് സ്റ്റോപ്പ് ലഭിക്കുമെന്ന ജനപ്രതിനിധികളുടെ ഉറപ്പാണ് പാഴായത്. കണ്ണൂർ,മാവേലി, ഇൻ്റർസിറ്റി എന്നീ എക്സ്പ്രസ്സ് ട്രെയിനുകളിൽ ചിലതിനെങ്കിലും സ്റ്റോപ്പ് ലഭിക്കുമെന്നാണ് ജനപ്രതിനിധികൾ ഉറപ്പ് പറഞ്ഞിരുന്നത്. ഏറനാട് എക്സ്പ്രസ്സിന് സ്റ്റോപ്പ് അനുവദിച്ചതുമായി ബന്ധപ്പെട്ട സമ്മേളനത്തിൽ
കേന്ദ്രമന്ത്രി ജോർജ് കുര്യൻ, കൊടിക്കുന്നിൽ സുരേഷ് എം.പി എന്നിവർ ഇത് സംബന്ധിച്ച് ഉറപ്പ് പറഞ്ഞിരുന്നു.
ശാസ്താംകോട്ട റെയിൽവേ സ്റ്റേഷൻ്റെ വികസനവുമായി ബന്ധപ്പെട്ട് പ്രവർത്തിക്കുന്ന ചില സംഘടനകള്‍ പിന്നീട് കൊടിക്കുന്നിൽ സുരേഷ് എം.പിയ്ക്കും കേന്ദ്ര മന്ത്രി ജോർജ് കുര്യനും നിവേദനം നൽകിയിരുന്നു.
ബി. ജെ.പി പ്രാദേശിക – ജില്ലാ ഘടകങ്ങൾ സംസ്ഥാന പ്രസിഡൻ്റ് രാജീവ് ചന്ദ്രശേഖർ വഴി കേന്ദ്ര മന്ത്രിമാർക്കും നിവേദനം നൽകിയിരുന്നു. ഈ അവസരങ്ങളിലെല്ലാം എതങ്കിലും ട്രെയിനുകൾക്ക് സ്റ്റോപ്പ് ലഭിക്കുമെന്ന് ഉറപ്പ് ലഭിച്ചിരുന്നു. കോവിഡിന് മുമ്പ് വരെ ഉണ്ടായിരുന്ന കണ്ണൂർ എക്സ്പ്രസ്സിൻ്റെ സ്റ്റോപ്പ് കോവിഡിനെ തുടർന്നാണ് പിൻവലിച്ചത്. കോവിഡിന് ശേഷം മറ്റ് എല്ലാ റെയിൽവേ സ്റ്റേഷനുകളിലും കണ്ണൂരിൻ്റെ സ്റ്റോപ്പ് പുനസ്ഥാപിച്ചെങ്കിലും ശാസ്താംകോട്ടയിൽ ഇനിയും പുനസ്ഥാപിച്ചില്ല. ഇത് പുനസ്ഥാപിക്കുമെന്ന് പ്രതീക്ഷിച്ചിരുന്നു.ആലപ്പുഴ വഴിയുള്ള മാവേലി എക്സ്പ്രസ്സിന് സ്റ്റോപ്പ് അനുവദിച്ചാൽ പുലർച്ചെ തിരുവനന്തപുരം മെഡിക്കൽ കോളേജ് ആശുപത്രിയിൽ പോകുന്നവർ ഉൾപ്പെടെയുള്ളവർക്ക് ഏറെ പ്രയോജനകരമായേനെ. തിരുവനന്തപുരം അടക്കമുള്ള സ്ഥലങ്ങളിൽ ജോലിയ്ക്ക് പോകുന്നവർക്ക് പ്രയോജനകരമായ ഇൻ്റർസിറ്റി എക്സ്പ്രസ്സിനും സ്റ്റോപ്പ് പ്രതീക്ഷിച്ചിരുന്നു. അനുദിനം യാത്രക്കാരുടെ എണ്ണം വർദ്ധിച്ചു വരുന്ന ശാസ്താംകോട്ട റെയിൽവേ സ്റ്റേഷനിൽ ട്രെയിനുകൾക്ക് സ്റ്റോപ്പ് ലഭിക്കാത്തതിൽ കടുത്ത നിരാശയിലാണ് യാത്രക്കാരും പ്രദേശവാസികളും.