തിരുവനന്തപുരം : ബോക്സ് ഓഫീസിൽ വിസ്മയ മോഹൻലാൽ ചിത്രം ‘തുടക്കം’ കുതിപ്പ് തുടരുന്നു. ജൂഡ് ആന്തണി ജോസഫ് സംവിധാനം ചെയ്ത ചിത്രത്തിന് തീയേറ്ററുകളിൽ മികച്ച പ്രേക്ഷക പ്രതികരണമാണ് ലഭിക്കുന്നത്. റിലീസ് ചെയ്ത് അഞ്ച് ദിവസത്തിനുള്ളിൽ ചിത്രം ആഗോള തലത്തിൽ 28.69 കോടി രൂപ കളക്ഷൻ നേടി.
റിലീസിന്റെ അഞ്ചാം ദിനത്തിൽ ഇന്ത്യയിലുടനീളം 1,136 ഷോകളാണ് ചിത്രം പൂർത്തിയാക്കിയത്. ചൊവ്വാഴ്ച മാത്രം ഇന്ത്യയിൽ നിന്ന് 1.61 കോടി രൂപ കളക്ഷൻ നേടി. തിങ്കളാഴ്ചത്തെ കളക്ഷനേക്കാൾ വർധനവാണ് അഞ്ചാം ദിവസം രേഖപ്പെടുത്തിയത്. നിലവിൽ ചിത്രത്തിന്റെ ഇന്ത്യൻ ഗ്രോസ് 15.79 കോടി രൂപയും വിദേശ ഗ്രോസ് കളക്ഷൻ 12.90 കോടിയുമാണ്. കൊച്ചി ഉൾപ്പെടെയുള്ള പ്രമുഖ കേന്ദ്രങ്ങളിൽ മികച്ച ഒക്യുപെൻസിയോടെയാണ് ചിത്രം പ്രദർശിപ്പിക്കുന്നത്.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിച്ച ചിത്രത്തിൽ അദ്ദേഹത്തിന്റെ മകൻ ആശിഷ് ജോ ആന്റണിയും പ്രധാന വേഷത്തിലുണ്ട്. മോഹൻലാലിന്റെ കാമിയോ റോൾ പ്രേക്ഷകർക്ക് സർപ്രൈസ് നൽകുന്നു. കുടുംബ പ്രേക്ഷകരെ ഒന്നടങ്കം ആകർഷിക്കുന്ന കഥാപശ്ചാത്തലമാണ് ചിത്രത്തിന്റെ വിജയത്തിന് പിന്നിലെ പ്രധാന ഘടകം.
