ചരിത്രം കുറിച്ച് മിസിസിപ്പി; സെനറ്റ് തെരഞ്ഞെടുപ്പിൽ ഡെമോക്രാറ്റുകൾക്ക് അട്ടിമറിവിജയം, യുഎസ് സെനറ്റിലേക്ക് തെരഞ്ഞെടുക്കപ്പെട്ട് സ്കോട്ട് കോളം

വാഷിംഗ്ടൺ: അമേരിക്കൻ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ ഉറച്ച കോട്ടയായ മിസിസിപ്പിയിൽ ഡെമോക്രാറ്റിക് പാർട്ടിക്ക് ചരിത്രവിജയം. നിലവിലെ റിപ്പബ്ലിക്കൻ സെനറ്റർ സിൻഡി ഹൈഡ്-സ്മിത്തിനെ പരാജയപ്പെടുത്തി ഡെമോക്രാറ്റിക് സ്ഥാനാർഥിയും പ്രോസിക്യൂട്ടറുമായ സ്കോട്ട് കോളം യുഎസ് സെനറ്റിലേക്ക് തെരഞ്ഞെടുക്കപ്പെട്ടു.

Also Read: പ്രണയബന്ധം അവസാനിപ്പിക്കാൻ കൊലപാതക ക്വട്ടേഷൻ; 19കാരിയും സംഘവും അഴിക്കുള്ളിൽ

നവംബർ 3-ന് നടന്ന വോട്ടെടുപ്പിന് ശേഷം നടന്ന വോട്ടെണ്ണലിനൊടുവിലാണ് വിജയം പ്രഖ്യാപിച്ചത്. അവസാന നിമിഷം വരെ ആകാംക്ഷ നിറഞ്ഞുനിന്ന മത്സരത്തിൽ നേരിയ ഭൂരിപക്ഷത്തിനാണ് 43-കാരനായ സ്കോട്ട് കോളം വിജയിച്ചത്. ആകെ എണ്ണിയ വോട്ടുകളിൽ സ്കോട്ട് കോളം 49.2 ശതമാനം (4,71,752 വോട്ടുകൾ) നേടിയപ്പോൾ സിൻഡി ഹൈഡ്-സ്മിത്തിന് 48.7 ശതമാനം (4,67,352 വോട്ടുകൾ) വോട്ടുകളാണ് ലഭിച്ചത്. സ്വതന്ത്ര സ്ഥാനാർഥി ടൈ പിങ്കിൻസ് 2.1 ശതമാനം വോട്ടുകൾ നേടി. മിസിസിപ്പി നിയമപ്രകാരം റീകൗണ്ടിംഗിന് വ്യവസ്ഥയില്ലാത്തതിനാൽ, ഫലം അംഗീകരിച്ചുകൊണ്ട് സിൻഡി ഹൈഡ്-സ്മിത്ത് പരാജയം സമ്മതിച്ചു.

152 വർഷത്തെ കാത്തിരിപ്പിന് വിരാമം

1874-ന് ശേഷം മിസിസിപ്പിയിൽ നിന്ന് യുഎസ് സെനറ്റിലേക്ക് തെരഞ്ഞെടുക്കപ്പെടുന്ന ആദ്യ കറുത്തവർഗക്കാരനാണ് സ്കോട്ട് കോളം. 1874-ൽ തെരഞ്ഞെടുക്കപ്പെട്ട ബ്ലാഞ്ച് കെൽസോ ബ്രൂസിന് ശേഷമുള്ള ആദ്യ നേട്ടമാണിത്. ജനങ്ങളുടെ നേരിട്ടുള്ള വോട്ടെടുപ്പിലൂടെ മിസിസിപ്പിയിൽ നിന്ന് സെനറ്റിലെത്തുന്ന ആദ്യ കറുത്തവർഗക്കാരൻ എന്ന ചരിത്രവും ഇതോടെ കോളത്തിന് സ്വന്തമായി.1982-ൽ ജോൺ സി സ്റ്റെന്നിസ് വിജയിച്ചതിന് ശേഷം ആദ്യമായാണ് മിസിസിപ്പിയിൽ നിന്ന് ഒരു ഡെമോക്രാറ്റിക് സ്ഥാനാർഥി യുഎസ് സെനറ്റിലേക്ക് തെരഞ്ഞെടുക്കപ്പെടുന്നത്. 2024-ലെ പ്രസിഡന്‍റ് തെരഞ്ഞെടുപ്പിൽ ഡൊണാൾഡ് ട്രംപ് 20-ലധികം പോയിന്റുകളുടെ ഭൂരിപക്ഷത്തിൽ വിജയിച്ച സംസ്ഥാനത്താണ് ഈ അട്ടിമറി സംഭവിച്ചതെന്നതും ശ്രദ്ധേയമാണ്.

പ്രചാരണത്തിലെ നിർണ്ണായക ഘടകങ്ങൾ

മിസിസിപ്പിയിലെ 16-ാം ജുഡീഷ്യൽ ഡിസ്ട്രിക്റ്റ് അറ്റോർണിയായി പ്രവർത്തിച്ചിരുന്ന സ്കോട്ട് കോളം, രാജ്യത്തെ വിലക്കയറ്റവും ജീവിതച്ചെലവും പ്രധാന പ്രചാരണ വിഷയമാക്കി. ബീഫ് ഉൾപ്പെടെയുള്ള ഭക്ഷ്യവസ്തുക്കളുടെ വിലവർധനവിനെക്കുറിച്ചുള്ള ചോദ്യത്തിന് “തിരഞ്ഞെടുക്കാൻ വേറെയും പ്രോട്ടീനുകൾ ഉണ്ടല്ലോ” എന്ന് സിൻഡി ഹൈഡ്-സ്മിത്ത് നൽകിയ മറുപടി കോളം പ്രചാരണായുധമാക്കി. “മറ്റൊരു പ്രോട്ടീൻ തിരഞ്ഞെടുക്കുന്നതിന് പകരം മറ്റൊരു സെനറ്ററെ തെരഞ്ഞെടുക്കാം” എന്ന കോളത്തിന്‍റെ പ്രചാരണം വലിയ ജനശ്രദ്ധ നേടിയിരുന്നു. 2023-ൽ ഫെഡറൽ ജഡ്ജി സ്ഥാനത്തേക്കുള്ള കോളത്തിന്‍റെ നിയമനം സെനറ്റിൽ തടഞ്ഞത് സിൻഡി ഹൈഡ്-സ്മിത്തായിരുന്നു.

സെനറ്റിലെ കക്ഷിനില

മിസിസിപ്പി കൂടി പിടിച്ചെടുത്തതോടെ 100 അംഗ യുഎസ് സെനറ്റിൽ ഡെമോക്രാറ്റിക് സഖ്യത്തിന്‍റെ (രണ്ട് സ്വതന്ത്ര അംഗങ്ങൾ ഉൾപ്പെടെ) അംഗബലം 55 ആയി ഉയർന്നു. റിപ്പബ്ലിക്കൻ പാർട്ടിക്ക് 44 സീറ്റുകളാണുള്ളത്. ഇനി ഫലം പുറത്തുവരാനുള്ളത് അലാസ്കയിലെ ഒരു സീറ്റിൽ മാത്രമാണ്. നിലവിലെ റിപ്പബ്ലിക്കൻ സെനറ്റർ ഡാൻ സള്ളിവനും ഡെമോക്രാറ്റിക് സ്ഥാനാർഥി മേരി പെൽറ്റോളയും തമ്മിൽ ഇഞ്ചോടിഞ്ച് പോരാട്ടം നടക്കുന്ന അലാസ്കയിൽ റാങ്ക്ഡ് ചോയ്സ് വോട്ടിംഗ്’ പ്രക്രിയയിലൂടെയാകും അന്തിമ വിജയിയെ നിശ്ചയിക്കുക.