തിരുവനന്തപുരം. പരീക്ഷാ ക്രമക്കേടുമായി ബന്ധപ്പെട്ട കേസില്‍ പിഎസ് സി ചെയര്‍മാന്‍ ഡോ. എം ആര്‍ ബൈജുവിനെ ക്രൈംബ്രാഞ്ച് പ്രത്യേക അന്വേഷണ സംഘം ഇന്ന് വീണ്ടും ചോദ്യം ചെയ്യും. ഉച്ചയ്ക്ക് രണ്ടു മണിയ്ക്ക് തിരുവനന്തപുരത്തെ ക്രൈംബ്രാഞ്ച് ആസ്ഥാനത്ത് ചോദ്യം ചെയ്യലിന് ഹാജരാകണമെന്ന് ബൈജുവിന് എസ്‌ഐടി നിര്‍ദേശം നല്‍കിയിട്ടുണ്ട്.
ഇത് മൂന്നാം തവണയാണ് ചോദ്യം ചെയ്യലിനായി ക്രൈംബ്രാഞ്ച് ബൈജുവിന് നോട്ടീസ് നല്‍കുന്നത്. എന്നാല്‍ ഹാജരാകില്ലെന്ന് അറിയിച്ചുകൊണ്ടുള്ള മറുപടി ഇതുവരെ ബൈജു അന്വേഷണസംഘത്തിന് നല്‍കിയിട്ടില്ലെന്നാണ് റിപ്പോര്‍ട്ടുകള്‍. കഴിഞ്ഞമാസം അവസാനം ബൈജുവിനെ ക്രൈംബ്രാഞ്ച് വിശദമായി ചോദ്യം ചെയ്തിരുന്നു. കേസുമായി ബന്ധപ്പെട്ട അന്വേഷണത്തില്‍ ലഭിച്ച പുതിയ വിവരങ്ങളുടെ അടിസ്ഥാനത്തിലാണ് ബൈജുവിനെ വീണ്ടും ചോദ്യം ചെയ്യുന്നത്.
നിയമവിരുദ്ധമായ യാതൊരു ഇടപെടലും നടത്തിയിട്ടില്ലെന്നും, ഇന്റര്‍വ്യൂ നടപടികള്‍ നടത്തിയത് സുതാര്യമായാണെന്നുമാണ് ഡോ. ബൈജു ചോദ്യം ചെയ്യലില്‍ എസ്‌ഐടിയോട് പറഞ്ഞത്. സംഭവിച്ചത് ഉദ്യോഗസ്ഥരുടെ ഭാഗത്തു നിന്നുണ്ടായ പിഴവാണ്. സാങ്കേതിക പിഴവ് തിരിച്ചറിയുന്നതിലും, ആ സമയത്തുതന്നെ കണ്ടെത്തുന്നതിലും ഉദ്യോഗസ്ഥര്‍ക്ക് പിഴവ് സംഭവിച്ചിട്ടുണ്ട്. അറിഞ്ഞ ഉടന്‍ തന്നെ വീണ്ടും മൂല്യനിര്‍ണയം നടത്തുകയും, പുതിയ റാങ്ക്ലിസ്റ്റ് പ്രസിദ്ധീകരിക്കുകയും ചെയ്തുവെന്നും ഡോ. ബൈജു പറഞ്ഞു.
അതേസമയം, പിഎസ് സിയില്‍ പല കാര്യങ്ങളും തീരുമാനിക്കുന്നത് ചെയര്‍മാന്റെ നേതൃത്വത്തിലുള്ള കോക്കസാണെന്ന് ക്രൈംബ്രാഞ്ചിന് മൊഴി ലഭിച്ചതായി റിപ്പോര്‍ട്ടുകളുണ്ട്. ചെയര്‍മാനും ഒന്നോ രണ്ടോ അംഗങ്ങളും അടങ്ങിയ സംഘമാണ് പല പ്രധാന തീരുമാനങ്ങളും എടുക്കുന്നതെന്നാണ് ആക്ഷേപം. പരീക്ഷാ ക്രമക്കേടുമായി ബന്ധപ്പെട്ട അന്വേഷണത്തോട് സഹകരിക്കാന്‍ വിസമ്മതിച്ചിരുന്ന ഡോ. ബൈജുവും പിഎസ് സി അംഗങ്ങളും ഹൈക്കോടതി നടത്തിയ രൂക്ഷവിമര്‍ശനത്തെത്തുടര്‍ന്നാണ് ചോദ്യം ചെയ്യലിനായി ഹാജരായത്.
