സ്വകാര്യ ബസുകളുടെ മത്സര ഓട്ടത്തിന്റെ ഫലമായി തൃശൂർ സ്വദേശിയും ഐ ടി ജീവനക്കാരിയുമായിരുന്ന അക്ഷരയുടെ മരണം ഏവരെയും ഞെട്ടിച്ചിരുന്നു . കൊച്ചി കാക്കനാട് ഇൻഫോ പാർക്കിന് സമീപം അമിത വേഗതയിൽ എത്തിയ സ്വകാര്യ ബസിടിച്ചാണ് അക്ഷര മരണപ്പെട്ടത് . ഫിറ്റ്നസ് സെന്ററിൽ നിന്നും മടങ്ങുന്നതിനിടയിലാണ് അമിത വേഗതയിലെത്തിയ മലയിൽ ബസിടിച്ച് അക്ഷര മരണപ്പെട്ടത് . ഇപ്പോഴിതാ അക്ഷരയുടെ ഭർത്താവ് വരുൺ സോഷ്യൽ മീഡിയയിൽ പങ്കിട്ട വികാരഭരിതമായ ഒരു കുറിപ്പാണ് വൈറൽ ആകുന്നത്.
അക്ഷരാ
നമ്മൾ ഒരുമിച്ചുള്ള ആദ്യത്തെ ചിത്രം
ഇതൊരു വെറും യാദൃച്ഛികത മാത്രമാണോ? നിനക്കിത് ഓർമ്മയുണ്ടോ? 2023 നവംബർ 4-ാം തീയതിയാണ് ഞാൻ ആദ്യമായി മാട്രിമോണിയൽ സൈറ്റിൽ നിന്റെ പ്രൊഫൈൽ കണ്ടത്, അഥവാ നിന്നെക്കുറിച്ച് അറിഞ്ഞത്. കൃത്യം മൂന്ന് വർഷങ്ങൾക്കുശേഷം, അതേ ദിവസം തന്നെ, 2026 നവംബർ 4-ാം തീയതി നീ എന്നെ വിട്ടുപോകാൻ തീരുമാനിച്ചു. നിനക്കത് അറിയാമായിരുന്നോ? അതോ വെറുമൊരു യാദൃച്ഛികതയായിരുന്നോ? . തീയതികളുടെ കാര്യത്തിൽ നല്ല അറിവുള്ളത് നീയാണല്ലോ. നിന്നെ ഇങ്ങനെയൊരു അവസ്ഥയിൽ കാണാൻ ഞാൻ ആഗ്രഹിച്ചിരുന്നില്ല.
നീ എന്നോട് ഇങ്ങനെ ചെയ്യേണ്ടിയിരുന്നില്ല. ഞങ്ങളിൽ ആരോടും നീ ഇങ്ങനെ ചെയ്യേണ്ടിയിരുന്നില്ല. നിനക്ക് ചുറ്റും നിന്നെ ഒരുപാട് സ്നേഹിക്കുന്ന, ഭ്രാന്തമായി സ്നേഹിക്കുന്ന ഒരുപാട് പേരുണ്ടെന്ന് നിനക്കറിയാമല്ലോ. നിന്റെ പുഞ്ചിരി, നിന്റെ ആവേശം, നിന്റെ പൊട്ടിച്ചിരി, നിന്റെ സംസാരം, നിന്റെ പ്രസരിപ്പ്, നിന്റെ ഊർജ്ജം, നിന്റെ പാട്ട്, നിന്റെ ചുവടുകൾ… അങ്ങനെ നിന്റെ ഓരോ കാര്യവും സ്നേഹിക്കുന്ന ഒരുപാട് പേർ.
അവർക്കെല്ലാം ഇതൊക്കെ ഇനി ഒരിക്കൽ കൂടി കാണാൻ കഴിയുമോ? എനിക്ക് ഇനി അതൊക്കെ കാണാൻ കഴിയുമോ? ഇല്ല… “No means No”.
നീ പറഞ്ഞ ഓരോ വാക്കും ഇപ്പോൾ എന്നെ വേട്ടയാടുകയാണ്. ഓരോ വാക്കും, ഓരോ വാചകവും, ഓരോ നിമിഷവും… എല്ലാം.
നിനക്കറിയാമല്ലോ, നീണ്ട സന്ദേശങ്ങൾ എഴുതാനോ ഇത്തരത്തിൽ പോസ്റ്റുകൾ ഇടാനോ ഇഷ്ടപ്പെടുന്ന ഒരാളല്ല ഞാൻ. പക്ഷേ, നീ ഇതെല്ലാം എവിടെയെങ്കിലും സുരക്ഷിതമായ ഒരിടത്ത്, സമാധാനമുള്ള ഏതോ ഒരു ലോകത്ത് ഇരുന്ന് വായിക്കുന്നുണ്ടാകുമെന്ന പ്രതീക്ഷയിലാണ് ഞാൻ ഇതെല്ലാം എഴുതുന്നത്. ഇതെല്ലാം വായിച്ചുകഴിഞ്ഞാൽ, നിനക്ക് എപ്പോഴെങ്കിലും സമയം കിട്ടുമ്പോൾ എനിക്കൊരു ചെറിയ സൂചനയെങ്കിലും തരാമോ? ദയവായി… പ്ലീസ്..
ഒരിക്കലെങ്കിലും എന്റെ സ്വപ്നത്തിൽ വരാമോ? എന്നെ നോക്കി ഒന്ന് പുഞ്ചിരിച്ചിട്ട് ഇങ്ങനെ പറയണം:
“വരുൺ, നീ പറഞ്ഞതെല്ലാം ഞാൻ കേട്ടു. നീ പറഞ്ഞ ഓരോ കാര്യവും ഞാൻ കേട്ടു. ഇപ്പോഴും നീ പറയുന്നതെല്ലാം ഞാൻ കേൾക്കുന്നുണ്ട്. വിഷമിക്കേണ്ട. ഞാൻ നിന്റെ കൂടെയുണ്ട്. എന്നും നിന്റെ കൂടെയുണ്ടാകും. ഇത് പറയാൻ വേണ്ടി മാത്രമെങ്കിലും ഒരിക്കൽ തിരികെ വരുമോ?
ഞാൻ കാത്തിരിക്കുകയാണ് ട്ടാ… ഇപ്പോഴും കാത്തിരിക്കുകയാണ്. ഇതായിരുന്നു അക്ഷരയുടെ ഭർത്താവ് സോഷ്യൽ മീഡിയയിൽ കുറിച്ചത്