അനുകൂല നടപടി, എല്‍പിഎസ്ടി റാങ്ക് ഹോള്‍ഡേഴ്സ് നടത്തി വന്ന നിരാഹാര സമരം പിന്‍വലിച്ചു

നിയമനം നടത്താതെ പിഎസ്സി നോട്ടിഫിക്കേഷന്‍ നിരന്തരം ഇറക്കുന്നത് അവസാനിപ്പിക്കും

തിരുവനന്തപുരം: എല്‍പിഎസ്ടി റാങ്ക് ഹോള്‍ഡേഴ്സ് നടത്തി വന്ന നിരാഹാര സമരം പിന്‍വലിച്ചു. സമരസമിതി സെക്രട്ടറി വളര്‍മതി 13 ദിവസമായി നടത്തിവന്ന നിരാഹാരമാണ് അവസാനിപ്പിച്ചത്. സെക്രട്ടേറിയറ്റിന് മുമ്പില്‍ പന്തലിട്ട് നടത്തിയ സമരം താല്‍ക്കാലികമായി നിര്‍ത്തിവെച്ചു. 37 ദിവസം നീണ്ട് നിന്ന സമരമാണ് നിര്‍ത്തിവച്ചത്. സമരം നിര്‍ത്തിയെങ്കിലും നേതാക്കള്‍ അവിടെ തുടരുമെന്ന് സമരസമിതി സെക്രട്ടറി വളര്‍മതി മാധ്യമങ്ങളോട് വ്യക്തമാക്കി. കാര്യങ്ങള്‍ പഠിക്കാന്‍ സര്‍ക്കാര്‍ 45 ദിവസം ആവശ്യപ്പെട്ട സാഹചര്യത്തിലാണ് സമരം നിര്‍ത്തിവച്ചത്.

1:25 വിദ്യാര്‍ഥി അധ്യാപക അനുപാതം സര്‍ക്കാര്‍ മേഖലയില്‍ നടപ്പിലാക്കണം. ഇത് സര്‍ക്കാരിന് ബാധ്യതയാവുന്ന കാര്യമല്ല. എല്‍പിഎസ്ടി ലിസ്റ്റ് കാലാവധി തീരുന്ന മുറയ്ക്ക് നീട്ടുന്നത് പരിഗണിക്കാമെന്ന് മന്ത്രി വ്യക്തമാക്കിയിട്ടുണ്ട്. നോട്ടിഫിക്കേഷനും നീട്ടിവെയ്ക്കും. മന്ത്രി തന്ന വെള്ളം കുടിച്ച് നിരാഹാരം അവസാനിപ്പിച്ചതെന്നും വളര്‍മതി പറഞ്ഞു.

കാര്യങ്ങള്‍ പരിശോധിക്കാന്‍ 45 ദിവസത്തെ സമയമാണ് സര്‍ക്കാര്‍ ആവശ്യപ്പെട്ടിട്ടുള്ളത്. ഇത് സെപ്റ്റംബര്‍ 24നാണ് പൂര്‍ത്തിയാവുന്നത്. സമരത്തിന്റെ ഭാഗമായി ഇനി പ്രകടനമോ പ്രതിഷേധമോ ഉണ്ടാവില്ല. സമാധാനപരമായി സമരപന്തലില്‍ തുടരും. സെപ്റ്റംബര്‍ 24ന് തീരുമാനമായില്ലെങ്കില്‍ പിന്നീട് സമരം എങ്ങനെ വേണമെന്ന് ആലോചിക്കും. സാമൂഹ്യ രാഷ്ട്രീയ പ്രവര്‍ത്തകരും, വിദ്യാര്‍ഥി യുവജന സംഘടനകളും സമരത്തെ പിന്താങ്ങി. ഇതുവരെ സര്‍ക്കാര്‍ ഉപാധികളൊന്നും വെച്ചിട്ടില്ല. എയ്ഡഡിന് പ്രൊട്ടക്ഷന്‍ നല്‍കുമ്പോള്‍ സര്‍ക്കാര്‍ മേഖലയിലും അത് ഉണ്ടാവണം. സര്‍ക്കാര്‍ ഈ സമയപരിധിക്കുള്ളില്‍ ഇക്കാര്യങ്ങള്‍ പഠിച്ച് തീരുമാനമെടുക്കും എന്നാണ് വിശ്വാസമെന്നും വളര്‍മതി മാധ്യമങ്ങളോട് വ്യക്തമാക്കി.

എല്‍പിഎസ്ടി സമരക്കാര്‍ ഉന്നയിച്ച ആവശ്യങ്ങളില്‍ ഉള്‍ക്കൊള്ളാവുന്നതെല്ലാം ഉള്‍ക്കൊള്ളുമെന്ന് വിദ്യാഭ്യാസമന്ത്രി ഷംസുദ്ദീന്‍ മാധ്യമങ്ങളോട് വ്യക്തമാക്കി. കുറച്ച് കാര്യങ്ങളില്‍ ചര്‍ച്ചയില്‍ ധാരണയായി. നിയമനം നടത്താതെ പിഎസ്സി നോട്ടിഫിക്കേഷന്‍ നിരന്തരം ഇറക്കുന്നത് അവസാനിപ്പിക്കും.
തസ്തികക്ക് അനുസരിച്ചാവണം നോട്ടിഫിക്കേഷന്‍ ഇറക്കേണ്ടത്. നിലവിലെ ലിസ്റ്റ് കാലാവധി നീട്ടുന്ന കാര്യം അനുഭാവപൂര്‍വം പരിഗണിക്കും. വിദ്യാര്‍ഥി അധ്യാപക അനുപാതം 1: 25 ആക്കുന്ന കാര്യവും എയ്ഡഡ് മേഖലയിലെ പ്രൊട്ടക്ഷന്‍ സര്‍ക്കാര്‍ ഖേലയില്‍ നല്‍കുന്നതും പരിഗണിക്കുമെന്നും മന്ത്രി പറഞ്ഞു. വിദ്യാര്‍ഥി അനുപാതത്തിന്റെ കാര്യത്തില്‍ തീരുമാനത്തിന് 45 ദിവസത്തെ സാവകാശം സമരസമിതിയോട് തേടിയിട്ടുണ്ടെന്നും അദ്ദേഹം വ്യക്തമാക്കി.