തിരുവനന്തപുരം. ആലപ്പുഴയില് നിന്നുള്ള എംഎല്എയായി സത്യപ്രതിജ്ഞ ചെയ്ത ശേഷം എ ഡി തോമസ് പ്രതിപക്ഷ നേതാവ് പിണറായി വിജയന്റെ അടുത്ത് ചെന്ന് കൈപിടിച്ച് അഭിവാദ്യം ചെയ്തു. ഇത് മധുരപ്രതികാരത്തിന്റെ രാഷ്ട്രീയ ചിത്രമായി. ഒന്നോര്ത്താല് എഡി തോമസ് എന്ന രാഷ്ട്രീയക്കാരനെ സൃഷ്ടിച്ചെടുത്തത് പിണറായിയും അദ്ദേഹത്തിന്റെ നവകേരള യാത്രയുമായിരുന്നു.
2023 ഡിസംബര് 15ന് നവകേരളയാത്രയുമായി ആലപ്പുഴയിലെത്തിയ അന്നത്തെ മുഖ്യമന്ത്രി പിണറായി വിജയന് നേരെ കരിങ്കൊടി കാട്ടിയ യൂത്ത് കോണ്ഗ്രസ് പ്രവര്ത്തകന് എ ഡി തോമസിനെ പൊലീസ് പിടിച്ചുമാറ്റിയിരുന്നു. പിന്നാലെ മുഖ്യമന്ത്രിയുടെ ഗണ്മാന്മാര് വാഹനത്തില് നിന്ന് വടിയുമായി ഇറങ്ങി പ്രവര്ത്തകരെ തല്ലിയിരുന്നു. തുടര്ന്ന് ഇത് വിവാദമായി. ഹൈക്കോടതിയും ഇക്കാര്യത്തില് വിമര്ശനം ഉന്നയിച്ചു. അന്ന് മുഖ്യമന്ത്രിയായിരുന്ന പിണറായി വിജയന് ഇതിനെ ന്യായീകരിക്കുകയും ചെയ്തു. പുനരന്വേഷണത്തിനുള്ള കോടതി ഉത്തരവ് നടപ്പാക്കിയതുമില്ല. ഒരു ചെറുപ്പക്കാരനെ അകാരണമായി മൃഗീയമായി ആക്രമിക്കുന്ന ചിത്രവും വിഡിയോയും സിപിഎമ്മിന്റെ രാഷ്ട്രീയ പതനത്തിന് വലിയ വഴിമരുന്നായി.
സര്ക്കാര് നിലപാടില് പ്രതിഷേധിച്ചാണ് യുഡിഎഫ് നിയമസഭാ തെരഞ്ഞെടുപ്പില് തോമസിനെ ആലപ്പുഴ മണ്ഡലത്തില് സ്ഥാനാര്ത്ഥിയാക്കിയത്. സിപിഎമ്മിന്റെ മുന് ജില്ലാ സെക്രട്ടറിയും സിറ്റിങ് എംഎല്എയുമായ ചിത്തരഞ്ജനെ തോല്പ്പിച്ചാണ് തോമസ് എംഎല്എ ആയത്. ആക്രമണത്തിന് നിര്ദ്ദേശിച്ചവര്ക്കുള്ള പ്രതികാരം തീര്ന്നുകഴിഞ്ഞു. ആക്രമിച്ചവര്ക്കുള്ള പ്രതികാരകര്മ്മത്തിന് എസ്ഐടി നടപടി ആരംഭിച്ചിരിക്കയാണ്.
