ജയ്പൂർ: രാജസ്ഥാനിലെ ജുൻജുനു ജില്ലയിൽ റോഡ് നിർമാണത്തിനിടെ വൈദ്യുതാഘാതമേറ്റ് എട്ട് തൊഴിലാളികൾ മരിച്ചു. അഞ്ച് പേർക്ക് ഗുരുതരമായി പരിക്കേറ്റു. ഉദയ്പൂർവതി പൊലീസ് സ്റ്റേഷൻ പരിധിയിലെ ചാപോളി ഗ്രാമത്തിലായിരുന്നു അപകടം.
റോഡ് നിർമാണത്തിനായി ഉപയോഗിച്ചിരുന്ന ചരൽ മിശ്രിത യന്ത്രം അബദ്ധത്തിൽ സമീപത്തെ ഹൈടെൻഷൻ വൈദ്യുത ലൈനിൽ തട്ടിയതാണ് ദുരന്തത്തിന് കാരണമായത്. ഇതോടെ യന്ത്രത്തിലൂടെ ഉയർന്ന വോൾട്ടേജിൽ വൈദ്യുതി പ്രവഹിക്കുകയും സമീപത്ത് ജോലിചെയ്തിരുന്ന തൊഴിലാളികൾക്ക് ഷോക്കേൽക്കുകയുമായിരുന്നു.
അപകടവിവരമറിഞ്ഞ് എമർജൻസി സംഘങ്ങൾ സ്ഥലത്തെത്തി. പരിക്കേറ്റവരെ ഉടൻതന്നെ സമീപത്തെ ആശുപത്രിയിൽ പ്രവേശിപ്പിച്ചു. മരിച്ചവരെ തിരിച്ചറിഞ്ഞിട്ടില്ല.
വൈദ്യുതി സുരക്ഷാ മാനദണ്ഡങ്ങൾ പാലിക്കാത്തതാണ് അപകടത്തിന് കാരണമെന്ന് ആരോപിച്ച് നാട്ടുകാർ നിർമാണ സ്ഥലത്ത് പ്രതിഷേധിച്ചു. സൈറ്റ് സൂപ്പർവൈസർമാർക്കെതിരെ നടപടി വേണമെന്നും ആവശ്യപ്പെട്ടു.
സംഭവത്തിൽ മുഖ്യമന്ത്രി ഭജൻലാൽ ശർമ അനുശോചനം രേഖപ്പെടുത്തി. മരിച്ചവരുടെ കുടുംബങ്ങൾക്ക് ആവശ്യമായ സഹായം നൽകാനും പരിക്കേറ്റവർക്ക് മികച്ച ചികിത്സ ഉറപ്പാക്കാനും ഉദ്യോഗസ്ഥർക്ക് നിർദേശം നൽകി. അപകടത്തെക്കുറിച്ച് സമഗ്രമായ അന്വേഷണത്തിനും ഉത്തരവിട്ടു. മുൻ മുഖ്യമന്ത്രി അശോക് ഗെലോട്ടും അനുശോചനം രേഖപ്പെടുത്തി. ദുരിതബാധിത കുടുംബങ്ങൾക്ക് മതിയായ സാമ്പത്തിക നഷ്ടപരിഹാരം നൽകണമെന്ന് അദ്ദേഹം സർക്കാരിനോട് ആവശ്യപ്പെട്ടു.