വെസ്റ്റ് ഇന്‍ഡീസിനെതിരായ അഞ്ചു മത്സര ട്വന്റി20 പരമ്പര സ്വന്തമാക്കാന്‍ ഇന്ത്യ നാളെ ഇറങ്ങും. ഹൈദരാബാദില്‍ നടക്കുന്ന നാലാം മത്സരത്തില്‍ ജയിച്ചാല്‍ ഇന്ത്യക്ക് പരമ്പര ഉറപ്പിക്കാം. അതേസമയം, പരമ്പരയില്‍ പ്രതീക്ഷ നിലനിര്‍ത്താന്‍ വെസ്റ്റ് ഇന്‍ഡീസിന് വിജയം അനിവാര്യമാണ്. ജയിച്ചാല്‍ പരമ്പര 2-2ന് സമനിലയിലാക്കാന്‍ സന്ദര്‍ശകര്‍ക്കാകും.
ഇന്ത്യന്‍ ബാറ്റര്‍മാരുടെ മികച്ച ഫോമും വെസ്റ്റ് ഇന്‍ഡീസ് ബൗളര്‍മാരുടെ പ്രതിരോധവും തമ്മിലുള്ള പോരാട്ടത്തിനാണ് ഹൈദരാബാദ് വേദിയാകുന്നത്. സഞ്ജു സാംസണ്‍, അഭിഷേക് ശര്‍മ, ഇഷാന്‍ കിഷന്‍ എന്നിവരുടെ പ്രകടനത്തിലാണ് ഇന്ത്യയുടെ പ്രതീക്ഷ.
ഇന്‍ഡോറില്‍ നടന്ന മൂന്നാം മത്സരത്തില്‍ 30 പന്തില്‍ 69 റണ്‍സ് നേടിയ അഭിഷേക് ശര്‍മയാണ് ഇന്ത്യയുടെ വിജയത്തില്‍ നിര്‍ണായകമായത്. ആറു ഫോറും അഞ്ചു സിക്‌സും ഉള്‍പ്പെട്ട ഇന്നിങ്‌സിന്റെ കരുത്തില്‍ ഇന്ത്യ 223 റണ്‍സ് നേടി. അഭിഷേക് താളം കണ്ടെത്തിയാല്‍ തടയുക പ്രയാസമാണെന്ന് വെസ്റ്റ് ഇന്‍ഡീസ് ഓള്‍റൗണ്ടര്‍ ഷമര്‍ സ്പ്രിംഗര്‍ പ്രതികരിച്ചിരുന്നു.
