കൊല്ലം: സാധാരണ മരണമെന്നു കരുതിയ സംഭവത്തിന് പിന്നില്‍ കൊലപാതകത്തിന്റെ ചുരുളഴിയുന്നത് കഴുത്തിലെ പാടിലൂടെ. ചെറുമൂട് രാജു എഡ്വേര്‍ഡിന്റെ (53) മരണത്തില്‍ ബന്ധുക്കള്‍ ഉയര്‍ത്തിയ സംശയമാണ് അന്വേഷണത്തിന് വഴിത്തിരിവായത്. ഒക്ടോബര്‍ രണ്ടിന് പുലര്‍ച്ചെ രാജു മരിച്ചെന്ന വിവരം ഭാര്യ ലേഖ മേരിയാണ് ബന്ധുക്കളെ അറിയിച്ചത്. എന്നാല്‍ മൃതദേഹത്തില്‍ കഴുത്തിലുണ്ടായിരുന്ന പാടുകള്‍ സംശയത്തിനിടയാക്കി.
പോസ്റ്റ്മോര്‍ട്ടം പരിശോധനയിലാണ് രാജുവിന്റെ മരണം ശ്വാസംമുട്ടിയാണെന്ന് വ്യക്തമായത്. തുടര്‍ന്ന് നടത്തിയ അന്വേഷണത്തിലാണ് ഭാര്യ ലേഖ മേരി അറസ്റ്റിലായത്. കഴുത്തില്‍ ബെല്‍റ്റ് മുറുക്കിയാണ് കൃത്യം നടത്തിയതെന്നാണ് ലേഖ പൊലീസിന് നല്‍കിയ മൊഴി.
രാജുവിന്റെ സ്വത്തുക്കള്‍ കൈക്കലാക്കുകയായിരുന്നു ലക്ഷ്യമെന്നാണ് അന്വേഷണ സംഘത്തിന്റെ പ്രാഥമിക നിഗമനം. രാജുവിന് അമിതമായി മരുന്ന് നല്‍കിയിരുന്നോയെന്നും പൊലീസ് പരിശോധിക്കുന്നുണ്ട്. ഇതിനായി ആന്തരിക അവയവങ്ങള്‍ പരിശോധനയ്ക്ക് അയച്ചിരിക്കുകയാണ്.
അതേസമയം, ലേഖയുടെ ആണ്‍സുഹൃത്തായ പ്രാക്കുളം സ്വദേശിക്കും സംഭവത്തില്‍ പങ്കുണ്ടോയെന്നതും പൊലീസ് അന്വേഷിക്കുന്നുണ്ട്. ഒരാള്‍ക്ക് ഒറ്റയ്ക്ക് കൃത്യം നടത്താനാകുമോയെന്നതില്‍ പൊലീസിന് സംശയമുണ്ട്. ഇയാള്‍ നിലവില്‍ പൊലീസ് നിരീക്ഷണത്തിലാണ്. രാജുവും ലേഖയും തമ്മില്‍ നേരത്തെയും തര്‍ക്കങ്ങളുണ്ടായിരുന്നതായും അന്വേഷണ സംഘം കണ്ടെത്തിയിട്ടുണ്ട്.
സാധാരണ മരണമെന്ന ധാരണയില്‍ തുടങ്ങിയ അന്വേഷണം, കഴുത്തിലെ പാടില്‍ നിന്നാണ് കൊലപാതകത്തിന്റെ വഴിയിലേക്ക് തിരിഞ്ഞത്. ഇനി കേസില്‍ മറ്റാരുടെയെങ്കിലും പങ്കുണ്ടോയെന്ന ചോദ്യത്തിനാണ് അന്വേഷണ സംഘം ഉത്തരം തേടുന്നത്.