തിരുവനന്തപുരം: യൂത്ത് കോൺഗ്രസ് സെക്രട്ടേറിയറ്റ് മാർച്ചിനിടെ പാളയത്തെ യൂണിവേഴ്സിറ്റി മെൻസ് ഹോസ്റ്റലിന് മുന്നിൽ വൻ സംഘർഷം. മന്ത്രി ഒ.ജെ. ജെനീഷും ഷാഫി പറമ്പിൽ എം.പിയും നയിച്ച മാർച്ചിന് നേരെ ഹോസ്റ്റലിന് മുന്നിൽവച്ച് കല്ലേറുണ്ടായെന്ന് യൂത്ത് കോൺഗ്രസ് ആരോപിച്ചു. സ്ഥലത്ത് ആവശ്യത്തിന് പൊലീസ് വിന്യാസം ഇല്ലാതിരുന്നത് സ്ഥിതിഗതികൾ സങ്കീർണമാക്കിയതായും പ്രവർത്തകർ ആരോപിച്ചു.
റോഡിൽ ടയർ കത്തിച്ച് യൂത്ത് കോൺഗ്രസ് പ്രവർത്തകർ പ്രതിഷേധിക്കുന്നതിനിടെ ഹോസ്റ്റലിൽനിന്ന് കൂവലുണ്ടായി. തുടർന്ന് കല്ലുകളും ബിയർ കുപ്പികളും എറിഞ്ഞത് എസ്.എഫ്.ഐ പ്രവർത്തകരാണെന്നാണ് യൂത്ത് കോൺഗ്രസിന്റെ ആരോപണം. ഇതിന് പിന്നാലെ യൂത്ത് കോൺഗ്രസ് പ്രവർത്തകർ കത്തുന്ന പന്തങ്ങൾ ഹോസ്റ്റൽ വളപ്പിലേക്ക് എറിഞ്ഞു.
എന്നാൽ സംഘർഷത്തിന് തുടക്കമിട്ടത് യൂത്ത് കോൺഗ്രസ് പ്രവർത്തകരാണെന്ന് ഹോസ്റ്റലിലെ വിദ്യാർഥികൾ ആരോപിച്ചു. വൈദ്യുതി പോയ സമയത്ത് ഹോസ്റ്റലിനുള്ളിൽനിന്ന് മുദ്രാവാക്യം വിളിക്കുക മാത്രമാണ് ചെയ്തതെന്നും മാർച്ച് കടന്നുപോകുന്നതിനിടെ യൂത്ത് കോൺഗ്രസ് പ്രവർത്തകർ അസഭ്യം പറയുകയും ഹോസ്റ്റലിനുള്ളിലേക്ക് ബിയർ കുപ്പികളും തീപ്പന്തങ്ങളും എറിയുകയുമായിരുന്നുവെന്നും വിദ്യാർഥികൾ പറഞ്ഞു.
ഹോസ്റ്റൽ വളപ്പിൽ വീണ തീപ്പന്തങ്ങൾ വിദ്യാർഥികൾ കൂട്ടിയിട്ട് കത്തിച്ച് പ്രതിഷേധിച്ചു. തുടർന്ന് കൂടുതൽ പൊലീസും ഫയർഫോഴ്സും സ്ഥലത്തെത്തി. എന്നാൽ വിദ്യാർഥികൾ റോഡ് തടയുകയും ഫയർഫോഴ്സിനെ തടയുകയും ചെയ്തു. വൈദ്യുതി പുനഃസ്ഥാപിക്കാതെ തീ അണയ്ക്കാൻ അനുവദിക്കില്ലെന്ന നിലപാടിലായിരുന്നു വിദ്യാർഥികൾ.
തുടർന്ന് ഹോസ്റ്റലിന് പുറത്തുനിന്ന് വെള്ളമടിച്ച് തീ അണയ്ക്കാനുള്ള ശ്രമം ഫയർഫോഴ്സ് ആരംഭിച്ചു. സ്ഥലത്ത് വൻ പൊലീസ് സംഘം നിലയുറപ്പിച്ചിട്ടുണ്ട്. സംഘർഷത്തിന്റെ പശ്ചാത്തലത്തിൽ പ്രദേശത്ത് കനത്ത സുരക്ഷ ഏർപ്പെടുത്തി.
