മുൻ ഇംഗ്ലണ്ട് ക്യാപ്റ്റൻ Kevin Pietersen വീണ്ടും ഇംഗ്ലണ്ട് ടീമിന്റെ ഭാഗമാകുന്നു. ഇത്തവണ കളിക്കാരനായല്ല, വൈറ്റ് ബോൾ ക്രിക്കറ്റിൽ ടീമിന്റെ സ്പെഷലിസ്റ്റ് മെന്ററായാണ് പീറ്റേഴ്സന്റെ തിരിച്ചുവരവ്.
2014ൽ ഇംഗ്ലണ്ട് അധികൃതരുമായുള്ള അഭിപ്രായവ്യത്യാസങ്ങളെ തുടർന്ന് അന്താരാഷ്ട്ര കരിയറിന് വിരാമമിട്ട പീറ്റേഴ്സൻ 12 വർഷത്തെ ഇടവേളയ്ക്കു ശേഷമാണ് ദേശീയ ടീമിന്റെ കോച്ചിങ് സംഘത്തിലേക്ക് മടങ്ങിയെത്തുന്നത്. Brendon McCullum നയിക്കുന്ന കോച്ചിങ് സ്റ്റാഫിലാണ് പീറ്റേഴ്സനും ചേരുന്നത്.
ഈ മാസം അവസാനം ശ്രീലങ്കയ്ക്കെതിരെ നടക്കുന്ന വൈറ്റ് ബോൾ മത്സരങ്ങളിലൂടെയാകും പീറ്റേഴ്സന്റെ പുതിയ ദൗത്യം ആരംഭിക്കുക. ഇംഗ്ലണ്ട് ടീമിനൊപ്പം പ്രവർത്തിക്കാനും ദക്ഷിണാഫ്രിക്കയിൽ നടക്കുന്ന ലോകകപ്പ് സ്വന്തമാക്കാനുള്ള ടീമിന്റെ ശ്രമങ്ങൾക്ക് സഹായിക്കാനും അവസരം ലഭിച്ചതിൽ അഭിമാനമുണ്ടെന്ന് പീറ്റേഴ്സൻ പ്രതികരിച്ചു.
നിലവിൽ ബ്രണ്ടൻ മക്കെല്ലമാണ് ഇംഗ്ലണ്ടിന്റെ വൈറ്റ് ബോൾ ടീമിന്റെ മുഖ്യ പരിശീലകൻ. മാർക്കസ് ട്രസ്കോത്തിക് ബാറ്റിങ് കോച്ചും ടിം സൗത്തി ഫാസ്റ്റ് ബൗളിങ് കോച്ചും ജീതൻ പട്ടേൽ സ്പിൻ ബൗളിങ് കോച്ചും സാറ ടെയ്ലർ ഫീൽഡിങ് കോച്ചുമാണ്. ഈ സംഘത്തിലേക്കാണ് കെവിൻ പീറ്റേഴ്സനും പുതുതായി എത്തുന്നത്.