ഓണക്കാലത്തെ യാത്രക്കാരുടെ തിരക്ക് കണക്കിലെടുത്ത് കോട്ടയം വഴി ബെംഗളൂരുവിനും തിരുവനന്തപുരത്തിനുമിടയിൽ മൂന്ന് പ്രത്യേക ട്രെയിൻ സർവീസുകൾ കൂടി അനുവദിച്ചു. ചങ്ങനാശേരി, ചെങ്ങന്നൂർ, മാവേലിക്കര, ശാസ്താംകോട്ട സ്റ്റേഷനുകളിലും പ്രത്യേക ട്രെയിനുകൾക്ക് സ്റ്റോപ്പ് അനുവദിച്ചിട്ടുണ്ട്.
06573/06574 യശ്വന്ത്പൂർ–തിരുവനന്തപുരം നോർത്ത്–യശ്വന്ത്പൂർ എക്സ്പ്രസ് സ്പെഷ്യൽ വെള്ളി, ശനി ദിവസങ്ങളിൽ സർവീസ് നടത്തും. യശ്വന്ത്പൂരിൽ നിന്ന് തിരുവനന്തപുരത്തേക്കുള്ള 06573 ട്രെയിൻ ചങ്ങനാശേരിയിൽ രാവിലെ 10.04നും ചെങ്ങന്നൂരിൽ 10.25നും മാവേലിക്കരയിൽ 10.37നും ശാസ്താംകോട്ടയിൽ 11.13നും എത്തും. ഓരോ സ്റ്റേഷനിലും ഒരു മിനിറ്റ് വീതം നിർത്തും. തിരുവനന്തപുരത്തുനിന്ന് 22ന് പുറപ്പെടുന്ന 06574 ട്രെയിൻ ശാസ്താംകോട്ടയിൽ വൈകിട്ട് 4.32നും മാവേലിക്കരയിൽ 5.06നും ചെങ്ങന്നൂരിൽ 5.18നും ചങ്ങനാശേരിയിൽ 5.38നും എത്തും.
06575/06576 എസ്എംവി ബെംഗളൂരു–തിരുവനന്തപുരം നോർത്ത്–ബെംഗളൂരു കന്റോൺമെന്റ് എക്സ്പ്രസ് സ്പെഷ്യൽ ശനി, ഞായർ ദിവസങ്ങളിലാണ് സർവീസ് നടത്തുക. എസ്എംവി ബെംഗളൂരുവിൽ നിന്ന് തിരുവനന്തപുരത്തേക്കുള്ള 06575 ട്രെയിൻ ചങ്ങനാശേരിയിൽ രാവിലെ 6.50നും ചെങ്ങന്നൂരിൽ 7.15നും മാവേലിക്കരയിൽ 7.29നും ശാസ്താംകോട്ടയിൽ 8.10നും എത്തും. 23ന് തിരുവനന്തപുരത്തുനിന്ന് പുറപ്പെടുന്ന 06576 ട്രെയിൻ ശാസ്താംകോട്ടയിൽ ഉച്ചയ്ക്ക് 1.58നും മാവേലിക്കരയിൽ 2.33നും ചെങ്ങന്നൂരിൽ 2.43നും ചങ്ങനാശേരിയിൽ 3.03നും എത്തും. 28, 29 തീയതികളിലും സർവീസ് ഉണ്ടായിരിക്കും.
