തിരുവനന്തപുരം: കിടപ്പ് രോഗികള് ഒഴികെയുള്ള ഗുണഭോക്താക്കള്ക്ക് ക്ഷേമപെന്ഷന് വിതരണം പൂര്ണമായും ബാങ്ക് അക്കൗണ്ട് വഴിയാക്കാനുള്ള തീരുമാനം തിടുക്കത്തില് നടപ്പാക്കില്ലെന്ന് സംസ്ഥാന സര്ക്കാര് വ്യക്തമാക്കി. പുതിയ സംവിധാനത്തിലേക്ക് മാറുന്നതിന് മുന്പായി ഗുണഭോക്താക്കള്ക്ക് ബാങ്ക് അക്കൗണ്ട് എടുക്കുന്നതിന് മതിയായ സമയം അനുവദിക്കും. വരാനിരിക്കുന്ന ഓണക്കാലത്തുള്പ്പെടെ പെന്ഷന് വിതരണം നിലവിലെ രീതിയില് തന്നെ തുടരാനാണ് സര്ക്കാരിന്റെ തീരുമാനം.
ക്ഷേമപെന്ഷന് വാങ്ങുന്ന എല്ലാവര്ക്കും ബാങ്ക് അക്കൗണ്ട് ഉണ്ടെന്ന് ഉറപ്പാക്കിയതിന് ശേഷം മാത്രമേ പുതിയ പരിഷ്കാരം പ്രാബല്യത്തില് കൊണ്ടുവരികയുള്ളൂ. ഇതിനായി വേഗത്തില് ബാങ്ക് അക്കൗണ്ടുകള് എടുപ്പിക്കുന്നതിനുള്ള നടപടികളും സര്ക്കാരിന്റെ ഭാഗത്തുനിന്നുണ്ടാകും. ഈ നടപടിക്രമങ്ങള് പൂര്ത്തിയായ ഉടന് തന്നെ വിതരണം ബാങ്ക് വഴിയാക്കാനാണ് ലക്ഷ്യമിടുന്നത്. മുന്പ് തീരുമാനിച്ചതുപോലെ കിടപ്പ് രോഗികളെ ഈ പരിഷ്കാരത്തില് നിന്ന് ഒഴിവാക്കിയിട്ടുണ്ട്.
പുതിയ തീരുമാനത്തിന്റെ പശ്ചാത്തലത്തില് ഗുണഭോക്താക്കള്ക്ക് യാതൊരുവിധ ആശങ്കയും വേണ്ടെന്ന് സര്ക്കാര് അറിയിച്ചു. ക്ഷേമപെന്ഷന് വിതരണം അവസാനിപ്പിക്കുന്നതിനായുള്ള സര്ക്കാരിന്റെ രഹസ്യ നീക്കമാണ് നടക്കുന്നതെന്ന പ്രതിപക്ഷ ആരോപണത്തെ സര്ക്കാര് പൂര്ണമായും തള്ളിക്കളഞ്ഞു. അര്ഹരായ എല്ലാവര്ക്കും തടസങ്ങളില്ലാതെ പെന്ഷന് ലഭ്യമാക്കാനാണ് പുതിയ സംവിധാനം ഏര്പ്പെടുത്തുന്നത്.
നിലവില് സഹകരണ സൊസൈറ്റികളിലെ ഏജന്റുമാര് മുഖേനയാണ് പലര്ക്കും ക്ഷേമപെന്ഷന് തുക വീട്ടിലെത്തിച്ചു നല്കുന്നത്. എന്നാല്, ഗുണഭോക്താക്കള്ക്ക് വിതരണം ചെയ്യാത്ത പെന്ഷന് തുക സര്ക്കാരിലേക്ക് യഥാസമയം തിരിച്ചടക്കുന്നതില് ചിലയിടങ്ങളില് വീഴ്ചകള് കണ്ടെത്തിയിരുന്നു. ഇത്തരം സാമ്പത്തിക ക്രമക്കേടുകള് പൂര്ണമായും ഒഴിവാക്കുക എന്ന ലക്ഷ്യത്തോടെയാണ് പെന്ഷന് വിതരണം നേരിട്ട് ബാങ്ക് അക്കൗണ്ട് വഴിയാക്കാന് സര്ക്കാര് തീരുമാനിച്ചത്.