2025 ലെ ജ്ഞാനപീഠ പുരസ്‌കാരം കവിയും ഗാനരചയിതാവുമായ ആര്‍. വൈരമുത്തുവിന്. തമിഴ്‌നാട്ടില്‍ ജ്ഞാനപീഠ പുരസ്‌കരത്തിന് അര്‍ഹനാകുന്ന മൂന്നാമത്തെ വ്യക്തിയാണ് വൈരമുത്തു. മികച്ച ഗാന രചയിതാവാനുള്ള ദേശീയ അവാര്‍ഡ് ഏഴ് പ്രാവശ്യം സ്വന്തമാക്കിയിട്ടുണ്ട് വൈരമുത്തു.
1980 ല്‍ പുറത്തിറങ്ങിയ നിഴല്‍ഗള്‍ എന്ന ചിത്രത്തിലൂടെയാണ് വൈരമുത്തു സിനിമയില്‍ തുടക്കം കുറിക്കുന്നത്. 40 വര്‍ഷത്തെ സിനിമാ ജീവിതത്തില്‍ അദ്ദേഹം 7,500-ലധികം ഗാനങ്ങളും കവിതകളും എഴുതിയിട്ടുണ്ട്.
അഞ്ച് പതിറ്റാണ്ടിലേറെയായി തമിഴ് സാഹിത്യത്തിനും ചലച്ചിത്ര ലോകത്തിനും നല്‍കിയ സമാനതകളില്ലാത്ത സംഭാവനകള്‍ പരിഗണിച്ചാണ് വൈരമുത്തുവിന് ജ്ഞാനപീഠ പുരസ്‌കാരം ലഭിച്ചത്. ചെന്നൈയിലെ പച്ചയ്യപ്പാസ് കോളജില്‍ നിന്ന് ബിരുദാനന്തര ബിരുദം നേടിയ വൈരമുത്തു, ഒരു പരിഭാഷകനായാണ് തന്റെ ഔദ്യോഗിക ജീവിതം ആരംഭിച്ചത്. ആ കാലഘട്ടത്തില്‍ തന്നെ അദേഹം രചിച്ച കവിതകള്‍ ഏറെ ശ്രദ്ധിക്കപ്പെട്ടിരുന്നു.
സാഹിത്യ ലോകത്തെ സമഗ്ര സംഭാവനകള്‍ക്കായി രാജ്യം പത്മശ്രീ, പത്മഭൂഷണ്‍ ബഹുമതികള്‍ നല്‍കി അദേഹത്തെ നേരത്തെ ആദരിച്ചിരുന്നു. ‘കള്ളിക്കാട്ടു ഇതിഹാസം’ എന്ന പ്രശസ്തമായ കൃതിക്ക് കേന്ദ്ര സാഹിത്യ അക്കാദമി അവാര്‍ഡും ലഭിച്ചിട്ടുണ്ട്. കവി എന്നതിലുപരി മികച്ച പ്രഭാഷകന്‍ കൂടിയായ വൈരമുത്തു തമിഴ് സാഹിത്യത്തിലെ ആധുനിക ശബ്ദമായാണ് അറിയപ്പെടുന്നത്.
