ബാങ്ക് ഓഫ് ബറോഡയിൽ വിവിധ സംസ്ഥാനങ്ങളിൽ 2700 അപ്രന്റിസ് തസ്തികകളിലേക്ക് അപേക്ഷ ക്ഷണിച്ചു. യോഗ്യരായ ഉദ്യോഗാർഥികൾക്ക് bankofbaroda.bank.in വഴി അപേക്ഷ സമർപ്പിക്കാം. നവംബർ പതിനൊന്നിന് രജിസ്‌ട്രേഷൻ നടപടികൾ ആരംഭിച്ചു. 2025 ഡിസംബർ ഒന്നാണ് അപേക്ഷ സമർപ്പിക്കേണ്ട അവസാന തീയതി. കേരളത്തിൽ 52 ഒഴിവുകളാണ് ഉള്ളത്.

ഒരു സംസ്ഥാനത്തിലോ അല്ലെങ്കിൽ ഒരു കേന്ദ്രഭരണ പ്രദേശത്തിലോ ഉള്ള ഒഴിവുകളിലേക്ക് മാത്രമാണ് ഒരാൾക്ക് അപേക്ഷിക്കാൻ കഴിയുക.

യോഗ്യത

അംഗീകൃത സർവകലാശാലയിൽ നിന്ന് ഏതെങ്കിലും വിഷയത്തിലുള്ള ബിരുദം അല്ലെങ്കിൽ കേന്ദ്ര സർക്കാർ അംഗീകരിച്ച തത്തുല്യമായ യോഗ്യതയോ ഉണ്ടായിരിക്കണം. 20- 28 വയസ്സിനിടയ്ക്കുള്ളവർക്ക്‌ അപേക്ഷിക്കാം. ബാങ്ക് ഓഫ് ബറോഡയിലോ മറ്റ് സ്ഥാപനങ്ങളിലോ മുൻപ് അപ്രന്റിസായി ജോലി ചെയ്തവർ അപേക്ഷിക്കാൻ യോഗ്യരല്ല.

തിരഞ്ഞെടുപ്പ് പ്രക്രിയ

ഓൺലൈൻ പരീക്ഷയിലൂടെയാണ് ഉദ്യോഗാർഥികളെ തിരഞ്ഞെടുക്കുക. 100 മാർക്കിന്റെ 100 ചോദ്യങ്ങളാണ് ഉണ്ടാവുക. ഒരു മണിക്കൂർ നീളുന്ന പരീക്ഷയ്ക്ക് നെഗറ്റീവ് മാർക്ക് ഉണ്ടാകില്ല. പരീക്ഷയിൽ വിജയിക്കുന്നവരുടെ യോഗ്യത രേഖകൾ പരിശോധിച്ച ശേഷം അപേക്ഷ സമർപ്പിച്ച സംസ്ഥാനത്തെ പ്രാദേശിക ഭാഷാ പരിജ്ഞാനവും പരിശോധിക്കും.

പരീക്ഷയിൽ ഉദ്യോഗാർഥികൾ നിശ്ചിത ശതമാനം മാർക്ക് നേടേണ്ടതുണ്ട്. എസ്‌സി/ എസ്ടി/ ഒബിസി/ പിഡബ്ല്യുഡി വിഭാഗത്തിൽ ഉൾപ്പെട്ടവർക്ക് അഞ്ച് ശതമാനം ഇളവ് ലഭിക്കും. മിനിമം യോഗ്യത മാർക്ക് നിർണയിക്കാനുള്ള അധികാരം ബാങ്കിനാണ്. സംസ്ഥാന അടിസ്ഥാനത്തിൽ കാറ്റഗറി കൂടി പരിഗണിച്ചാണ് മെറിറ്റ് ലിസ്റ്റ് തയ്യാറാക്കുക.

അപേക്ഷ

https://nats.education.gov.in അല്ലെങ്കിൽ എൻഎപിഎസ് പോർട്ടലായ https://www.apprenticeshipindia.gov.in വഴി അപേക്ഷിക്കാം. അപേക്ഷിക്കുമ്പോൾ ആധാർ കാർഡ്, പാൻ കാർഡ്, ഇമെയിൽ ഐഡി, മൊബൈൽ നമ്പർ, പാസ്‌പോർട്ട് ഫോട്ടോ, പത്താം ക്ലാസ്, പ്ലസ് ടു, ബിരുദ മാർക്ക് ലിസ്റ്റ്, ബാങ്ക് പാസ്ബുക്ക്, ഉദ്യോഗാർഥിയുടെ ഒപ്പ് എന്നിവ ആവശ്യമാണ്.

അപേക്ഷാ ഫീസ്

ജനറൽ, ഇഡബ്ല്യുഎസ്, മറ്റ് പിന്നാക്ക വിഭാഗം ഒബിസി-800/-
പിഡബ്ല്യുബിഡി ഫീസ് 400/-
എസ്‌സി, എസ്ടി ഉദ്യോഗാർഥികളെ അപേക്ഷാ ഫീസിൽ നിന്ന് ഒഴിവാക്കിയിട്ടുണ്ട്.
ഇതുമായി ബന്ധപ്പെട്ട കൂടുതൽ വിവരങ്ങൾക്കായി ഉദ്യോഗാർഥികൾക്ക് ബാങ്ക് ഓഫ് ബറോഡയുടെ ഔദ്യോഗിക വെബ്‌സൈറ്റ് പരിശോധിക്കാവുന്നതാണ്.