വയനാട്.വാഴവറ്റയിലെ വീട് തന്റേതല്ലെന്ന ആന്റോ അഗസ്റ്റിന്റെ വാദത്തിന് തിരിച്ചടിയായി ഔദ്യോഗിക രേഖകൾ.
മദ്യശേഖരം കണ്ടെത്തിയ വീടിന്റെയും സ്ഥലത്തിന്റെയും ഉടമസ്ഥാവകാശം ഇപ്പോഴും ആന്റോ അഗസ്റ്റിന്റെ പേരിൽ. വൈദ്യുതി കണക്ഷനും ആന്റോയുടെ പേരിൽ തന്നെ. വിവിധ കേസുകളിലെ കോടതി രേഖകളിലും വിലാസമായി രേഖപ്പെടുത്തിയിരിക്കുന്നത് വാഴവറ്റയിലെ ഈ വീടാണ്.
ബാങ്ക് ജപ്തി ചെയ്തതിന് പിന്നാലെ വീട് മറ്റൊരാൾ ലേലത്തിൽ സ്വന്തമാക്കിയെന്നായിരുന്നു ആന്റോ അഗസ്റ്റിന്റെ വാദം.
എന്നാൽ ഔദ്യോഗിക രേഖകൾ പറയുന്നത് മറ്റൊന്ന് .പഞ്ചായത്ത്, വില്ലേജ് രേഖകളിൽ 10,581 ചതുരശ്രയടി വിസ്തീർണമുള്ള നാലുനില വീടും സ്ഥലവും ഇപ്പോഴും ആന്റോ അഗസ്റ്റിന്റെ പേരിലാണന്ന് എക്സൈസ്.ഏറ്റവും ഒടുവിൽ ഭൂനികുതി അടച്ചിരിക്കുന്നതും ആന്റോയുടെ പേരിൽ തന്നെ.
വീടിന്റെ വൈദ്യുതി കണക്ഷന്റെ രേഖകളും ആന്റോയുടെ വാദത്തിന് വിരുദ്ധം.
വാഴവറ്റയിലെ വീട്ടിലെ കണക്ഷൻ ആന്റോ അഗസ്റ്റിന്റെ പേരിലാണെന്ന് വ്യക്തമാക്കുന്ന കെഎസ്ഇബി ബില്ലാണ് പുറത്തുവന്നത്.
സെപ്റ്റംബർ ഒന്നിലെ കണക്കനുസരിച്ച് 21,464 രൂപയാണ് വൈദ്യുതി ചാർജായി അടച്ചത്.
ആന്റോയുടെ പേരിലുള്ള വൈദ്യുതി കണക്ഷൻ സംബന്ധിച്ച വിവരങ്ങൾ കെഎസ്ഇബി എക്സൈസിനും സ്ഥിരീകരിച്ചിട്ടുണ്ട്.
വാഴവറ്റയിലെ ഈ വിലാസം ആന്റോയുമായി ബന്ധപ്പെട്ട ഔദ്യോഗിക രേഖകളിൽ നേരത്തെയും ഇടംപിടിച്ചിട്ടുണ്ട്.
മുട്ടിൽ മരംമുറി കേസിൽ അന്വേഷണ സംഘം സമർപ്പിച്ച കുറ്റപത്രത്തിലും ആന്റോ അഗസ്റ്റിന്റെ വിലാസമായി രേഖപ്പെടുത്തിയിരിക്കുന്നത് ഈ വീട് തന്നെ എന്ന് എക്സൈസ്.
കോടതി രേഖകളിലും ഇതേ വിലാസം.
വിവിധ കേസുകളുമായി ബന്ധപ്പെട്ട സമൻസുകളും വാറണ്ടുകളും എത്തിയത് വാഴവറ്റയിലെ ഈ വീട്ടിലേക്കാണ്. കഴിഞ്ഞ മാസവും കോടതി വാറണ്ട് ലഭിച്ചത് ഇതേ വിലാസത്തിലാണെന്ന് എക്സൈസ് സ്ഥിരീകരിച്ചു.വീട് തന്റേതല്ലെന്ന വാദം ഉയർത്തി ഹൈക്കോടതിയിൽ ജാമ്യാപേക്ഷ നൽകിയിരിക്കെയാണ് ഉടമസ്ഥാവകാശവും വിലാസവും സംബന്ധിച്ച ഔദ്യോഗിക രേഖകൾ പുറത്തുവരുന്നത്.
