ശാസ്താംകോട്ട:ബിജെപി സ്ഥാനാർത്ഥി രാജി പ്രസാദിന്റെ തെരഞ്ഞെടുപ്പ് പ്രചരണത്തിനായി തിങ്കൾ വൈകിട്ട് മൂന്നുമണിക്ക് ചലച്ചിത്ര താരവും ബിജെപി നേതാവുമായ ഖുശ്ബു എത്തും.
ശാസ്താംകോട്ട ആഞ്ഞിലിമൂട്ടിൽ നിന്നും ആരംഭിക്കുന്ന റോഡ് ഷോ ഭരണിക്കാവ് ജംഗ്ഷനിൽ സമാപിക്കും.രാജി പ്രസാദിന്റെ പഞ്ചായത്ത്തല പര്യടനം തിങ്കളാഴ്ച കുന്നത്തൂരിൽ നടക്കും.
കൊല്ലം.മുഖ്യമന്ത്രി പിണറായി വിജയൻ ഇന്ന് കൊല്ലം ജില്ലയിൽ തിരഞ്ഞെടുപ്പ് പ്രചാരണപരിപാടികളിൽ പങ്കെടുക്കും. രാവിലെ പത്തിന് വാർത്ത സമ്മേളനത്തിന് ശേഷം 11ന് ചവറ നിയോജകമണ്ഡലത്തിലെ പ്രചാരണ പരിപാടിയിൽ പങ്കെടുക്കും.
വൈകിട്ട് നാലിന് കൊല്ലം നിയോജകമണ്ഡലത്തിലെ അഞ്ചാലുമൂട്ടിലും അഞ്ചിന് കൊട്ടാരക്കരയിലും ആറിന് ചടയമംഗലം മണ്ഡലത്തിലെ കടയ്ക്കലിലും പ്രവർത്തകരെ മുഖ്യമന്ത്രി അഭിവാദ്യം ചെയ്യും.
പാലക്കാട്: പാലക്കാട് എംഎല്‍എ സ്ത്രീസുരക്ഷയ്ക്ക് ഭീഷണിയാണെന്ന് പ്രധാനമന്ത്രി നരേന്ദ്ര മോദി. പാലക്കാട്ടെ ഒരു പ്രമുഖ കോണ്‍ഗ്രസ് നേതാവ് സ്ത്രീസുരക്ഷയ്ക്ക് ഭീഷണിയാണെന്നും, ഇതാണ് കോണ്‍ഗ്രസിന്റെ യഥാര്‍ഥ മുഖമെന്നും ഇക്കാര്യം പാലക്കാട്ടുകാര്‍ക്ക് നന്നായി അറിയാമെന്നും മോദി പറഞ്ഞു.
സ്ത്രീകളെ ഉപദ്രവിച്ചതിന്റെ പേരില്‍ മറ്റൊരു കോണ്‍ഗ്രസ് നേതാവിനെ പാര്‍ട്ടിയില്‍നിന്ന് പുറത്താക്കേണ്ടിവന്ന സാഹചര്യവുമുണ്ടായി. ഇത്തരം നേതാക്കളെ കേരളത്തിലെ സ്ത്രീകള്‍ ഗൗരവത്തോടെ കാണണമെന്നും മോദി മുന്നറിയിപ്പ് നല്‍കി. എന്‍ഡിഎ സ്ഥാനാര്‍ത്ഥികളുടെ തെരഞ്ഞെടുപ്പ് പ്രചാരണത്തിന് ആവേശം പകരാന്‍ സംസ്ഥാനത്തെത്തിയ പ്രധാനമന്ത്രി പാലക്കാട് സംസാരിക്കുന്നതിനിടെയാണ് രാഹുല്‍ മാങ്കൂട്ടത്തിലിനെതിരെയുള്‍പ്പെടെ പരിഹാസ രൂപേണ സംസാരിച്ചത്.
also read:
കഴിഞ്ഞതവണ ഇ. ശ്രീധരനുണ്ടായ പരാജയത്തില്‍ ജനങ്ങള്‍ക്കുണ്ടായ വിഷമം പരിഹരിക്കാന്‍ ഇത്തവണ ശോഭ സുരേന്ദ്രന് വോട്ട് നല്‍കണമെന്നും അദ്ദേഹം അഭ്യര്‍ഥിച്ചു. കേരളത്തിന് പുറത്ത് കോണ്‍ഗ്രസുകാരും കമ്യൂണിസ്റ്റുകാരും ഒന്നിച്ചാണ്. കേരളത്തില്‍ മാത്രമാണ് ഇവര്‍ പരസ്പരം പോരടിക്കുന്നതായി അഭിനയിക്കുന്നത്. ബിഹാര്‍, ഝാര്‍ഖണ്ഡ്, തമിഴ്‌നാട് തുടങ്ങിയ സംസ്ഥാനങ്ങളില്‍ ഇവര്‍ സഖ്യത്തിലാണ്. കേരളത്തില്‍ ഇവര്‍ പരസ്പരം ‘ബി’ ടീം എന്ന് വിളിക്കുമ്പോള്‍, ഈ തിരഞ്ഞെടുപ്പിലെ യഥാര്‍ഥ ‘എ’ ടീം ബിജെപി മാത്രമാണെന്ന് അവര്‍ തന്നെ സമ്മതിക്കുകയാണെന്നും മോദി പറഞ്ഞു.
എല്‍ഡിഎഫും യുഡിഎഫും ചേര്‍ന്ന് കേരളത്തെ കൊള്ളയടിക്കുകയാണ്. ഒരു സംഘം ഭരിച്ച് കീശവീര്‍പ്പിക്കുമ്പോള്‍ അടുത്ത തവണ മറ്റേ സംഘത്തിന് അവസരം നല്‍കുന്ന വിചിത്രമായ സഖ്യമാണ് കേരളത്തിലുള്ളത്. ഇരുമുന്നണികളും ഒരുപോലെ ബിജെപിയെ ഭയപ്പെടുകയാണെന്നും ബിജെപി സര്‍ക്കാര്‍ അധികാരത്തില്‍ വന്നാല്‍ ഇവരുടെ കള്ളത്തരങ്ങള്‍ പുറത്തുവരുമെന്ന് ഇരുമുന്നണികള്‍ക്കും അറിയാമെന്നും മോദി പറഞ്ഞു.
പത്തനംതിട്ട: ഇലക്ഷന്‍ സ്‌പെഷ്യല്‍ ഡ്രൈവിന്റെ ഭാഗമായി നടത്തിയ പരിശോധനയില്‍ ചെങ്ങന്നൂര്‍ റെയില്‍വേ സ്റ്റേഷനില്‍ നിന്ന് വന്‍ കഞ്ചാവ് ശേഖരം പിടികൂടി. ആറ് ബാഗുകളിലായി കടത്താന്‍ ശ്രമിച്ച 50. 058 കിലോ കഞ്ചാവുമായി എറണാകുളം സ്വദേശി ജലീല്‍ ജോസിനെ (30) എക്‌സൈസും ആര്‍പിഎഫും ചേര്‍ന്ന് പിടികൂടി.
മേഘാലയയില്‍ നിന്ന് ട്രെയിന്‍ വഴി എത്തിച്ച കഞ്ചാവ് ചെങ്ങന്നൂര്‍ കേന്ദ്രീകരിച്ച് വിപണനം നടത്തുകയായിരുന്നു പ്രതിയുടെ ലക്ഷ്യം. നാല് ട്രോളി ബാഗുകളിലും രണ്ട് ട്രാവല്‍ ബാഗുകളിലുമായി അതീവ രഹസ്യമായാണ് കഞ്ചാവ് സൂക്ഷിച്ചിരുന്നത്. റെയില്‍വേ പ്ലാറ്റ്‌ഫോമില്‍ സംശയകരമായ സാഹചര്യത്തില്‍ കണ്ട പ്രതിയെ ഉദ്യോഗസ്ഥര്‍ തടഞ്ഞുനിര്‍ത്തി പരിശോധിച്ചപ്പോഴാണ് ലഹരിക്കടത്ത് പുറത്തായത്.
ചെങ്ങന്നൂരില്‍ ലഹരിക്കടത്ത് സംഘങ്ങള്‍ സജീവമാണെന്ന സൂചനയാണ് പുറത്തുവരുന്നത്. രണ്ട് ദിവസം മുന്‍പ് ഇതേ സ്റ്റേഷന്‍ പരിധിയില്‍ നിന്ന് 20 കിലോ കഞ്ചാവ് എക്‌സൈസ് പിടികൂടിയിരുന്നു. തെരഞ്ഞെടുപ്പിനോടനുബന്ധിച്ച് പരിശോധനകള്‍ കര്‍ശനമാക്കിയതോടെയാണ് തുടര്‍ച്ചയായ ലഹരിവേട്ടകള്‍ നടക്കുന്നത്.
അടൂര്‍. ക്ഷേത്ര നവീകരണത്തിൽ 12.09 ലക്ഷത്തിന്റെ തട്ടിപ്പ് ,
തട്ടിയെടുത്ത പണം ബിജെപി നേതാവ് അടക്കം 3 പ്രതികളിൽ നിന്ന് തിരികെ പിടിക്കണം. ബിജെപി സംസ്ഥാന കമ്മിറ്റി അംഗം T.R അജിത് കുമാർ, മറ്റ് രണ്ട് ഭാരവാഹികൾ എന്നിവരിൽ നിന്ന് ഈടാക്കാൻ കോടതി ഉത്തരവ്. പത്തനംതിട്ട പെരിങ്ങനാട് തൃച്ചേന്ദമംഗലം ക്ഷേത്രത്തിൽ നമസ്കാര മണ്ഡപത്തിനായി തേക്ക് വാങ്ങിയ ഇനത്തിൽ ആയിരുന്നു ക്രമക്കേട്
ഉത്തരവ് പത്തനംതിട്ട സബ്ബ് കോടതിയുടേത്. 52 ലക്ഷം രൂപ വിലയുള്ള തടിക്ക് 24.61 ലക്ഷം രൂപ എഴുതിയെടുത്തു.
തട്ടിപ്പ് നടന്ന കാലയളവിൽ ഭരണ സമിതിയുടെ പ്രസിഡന്റ്‌ ആയിരുന്നു അജിത് കുമാർ 2017-18 കാലത്തെ ഭരണ സമിതിയാണ് കോടതിയെ സമീപിച്ചത്. വീഴ്ചയില്ലെന്നും അപ്പീൽ പോകുമെന്നും അജിത് കുമാർ
ചവറ നിയോജകമണ്ഡലം ഇടതുപക്ഷജനാധിപത്യമുന്നണി സ്ഥാനാര്‍ത്ഥി ഡോ. സുജിത് വിജയന്‍പിളളയുടെ തെരഞ്ഞെടുപ്പ് പ്രചരണത്തിന്‍റെ ഭാഗമായി ഇന്ന് രാവിലെ 6 മണിക്ക് മരുത്തടിയില്‍നിന്നും എല്‍.ഡി.വൈ.എഫിന്‍റെ ആഭിമുഖ്യത്തില്‍ മോര്‍ണിംഗ് വാക്ക് വിത്ത് കാന്‍ഡിഡേറ്റ് എന്ന പ്രോഗ്രാമില്‍ പങ്കെടുത്തുകൊണ്ടുളള യാത്ര അഞ്ച് കിലോമീറ്റര്‍ ദൂരം യുവജനങ്ങളുമായി പങ്ക് ചേര്‍ന്ന് നടത്തി.
യൂത്ത് റാലിയും കണ്‍വന്‍ഷനും നടത്തി
ഇടതുപക്ഷ ജനാധിപത്യമുന്നണിയുടെ യുവജനസംഘടനയായ എല്‍.ഡി.വൈ.എഫിന്‍റെ ആഭിമുഖ്യത്തില്‍ മുഖംമൂടിമുക്ക് ഷാ കണ്‍വന്‍ഷന്‍ സെന്‍ററില്‍ ഡോ. സുജിത് വിജയന്‍പിളളയുടെ തെരഞ്ഞെടുപ്പ് വിജയത്തിനായി വിപുലമായ കണ്‍വന്‍ഷന്‍ സംഘടിപ്പിച്ചു.
നേതാക്കളായ ജോണ്‍ ബ്രിട്ടാസ് എം.പി, ആദര്‍ശ് .എം. സജി, അഡ്വ. വിനീത വിന്‍സെന്‍റ് തുടങ്ങിയവര്‍ പങ്കെടുത്തു.
തൃശ്ശൂർ. പുതുക്കാട് കാൽനടയാത്രക്കാരനെ കാർ ഇടിച്ചുതെറിപ്പിച്ചു.ഏഷ്യാനെറ്റ് ന്യൂസിന്റെ വാഹനം ആണ് ഇടിച്ചത് ദേശീയപാതയിൽ ആണ് സംഭവം
ദേശീയപാത പുതുക്കാട് കെഎസ്ആർടിസി ബസ്റ്റാൻഡ് പരിസരത്താണ് അപകടം നടന്നത്. റോഡ് മുറിച്ച് കിടക്കുകയായിരുന്നു യുവാവിനെ ആണ് ചാലക്കുടി ഭാഗത്തേക്ക് പോവുകയായിരുന്ന കാർ ഇടിച്ചത്. പരിക്കേറ്റ യുവാവ് ഗുരുതരാവസ്ഥയിൽ. പരിക്കേറ്റയാളെ തിരിച്ചറിഞ്ഞിട്ടില്ല
(
തൃശൂർ: തിരഞ്ഞെടുപ്പ് പ്രചാരണങ്ങൾക്കായി പ്രധാനമന്ത്രി നരേന്ദ്രമോദി തൃശൂരിലെത്തി. ഹെലികോപ്‌റ്ററിൽ കുട്ടനല്ലൂർ ഗവൺമെന്റ് കോളേജ് ഗ്രൗണ്ടിൽ വന്നിറങ്ങിയ മോദി തുറന്നവാഹനത്തിൽ റോഡ്ഷോയായാണ് സ്വരാജ് റൗണ്ടിലെ സമ്മേളനവേദിയിലേക്ക് നീങ്ങിയത്. എൻഡിഎ സ്ഥാനാർത്ഥികളായ സി സി മുകുന്ദൻ, പത്മജ വേണുഗോപാൽ, കെ കെ അനീഷ്‌കുമാർ എന്നിവർ അദ്ദേഹത്തിനൊപ്പം റോഡ്ഷോയിൽ പങ്കെടുത്തു.
കേന്ദ്രസഹമന്ത്രി സുരേഷ് ഗോപിയും റോഡ് ഷോയുടെ ഭാഗമായി. 900 മീറ്റർ ദൂരത്തിൽ പലയിടങ്ങളിലായി വിവിധ കലാരൂപങ്ങളുടെ അവതരണങ്ങളാണ് ബിജെപി പ്രവർത്തകർ പ്രധാനമന്ത്രിക്കായി ഒരുക്കിയത്. രണ്ടരവർഷത്തിനിടയിൽ മൂന്നാം തവണയാണ് പ്രധാനമന്ത്രി തൃശൂരിൽ എത്തിയത്.
കേരളം മാറ്റത്തിന്റെ സന്ദേശം നൽകുന്നുവെന്ന് പ്രധാനമന്ത്രി നരേന്ദ്രമോദി പാലക്കാട് നടന്ന പൊതുസമ്മേളനത്തിൽ പറഞ്ഞിരുന്നു. എൻഡിഎയുടെ വർദ്ധിച്ചുവരുന്ന ജനസമ്മതിയും ബിജെപിയോട് ജനങ്ങൾക്ക് കൂടിവരുന്ന വിശ്വാസത്തിലും അത് കാണാൻ സാധിക്കുമെന്നും മോദി പറഞ്ഞു. ഡീൽ ആരോപണങ്ങളെ പരാമർശിച്ച മോദി, ബിജെപിയാണ് തിരഞ്ഞെടുപ്പിലെ എ ടീമെന്ന് പറഞ്ഞു. ഇടത് വലത് പാർട്ടികൾ ചേർന്ന് ഒത്തുകളിക്കുകയാണെന്നും അദ്ദേഹം ആരോപിച്ചു.
ബംഗളൂരു: സാമ്പത്തിക ബാധ്യതയെ തുടർന്നു ഒരു കുടുംബത്തിലെ നാല് പേർ ആത്മഹത്യക്കു ശ്രമിച്ചു. സംഭവത്തിൽ രണ്ട് പേർ മരിച്ചു. രണ്ട് പേരുടെ നില ഗുരുതരമാണ്. ഇവർ നിലവിൽ ചികിത്സയിലാണ്. ആശ (55), മകൾ ഹർഷിത (34) എന്നിവർ സംഭവ സ്ഥലത്തു തന്നെ മരിച്ചു. വർഷിതയുടെ സഹോദരൻ മോഹൻ ഗൗഡ (32), മകൻ മായങ്ക് (11) എന്നിവരാണ് ആശുപത്രിയിൽ ചികിത്സയിലുള്ളത്.
മറ്റുള്ളവരുടെ കഴുത്തറുത്ത ശേഷം മോഹൻ ജീവനൊടുക്കാൻ ശ്രമിക്കുകയായിരുന്നുവെന്നു പൊലീസ് വ്യക്തമാക്കി. ചിട്ടി നടത്തിയും പടക്ക കച്ചവടം നടത്തിയും മോഹൻ വൻ സാമ്പത്തിക ബാധ്യതയിൽപെട്ടിരുന്നു. ഇതോടെയാണ് കുടുംബം കൂട്ട ആത്മഹത്യയ്ക്കു ശ്രമിച്ചത്. 5 ലക്ഷം മുതൽ ഒരു കോടി വരെയുള്ള ചിട്ടി ഇടപാടുകൾ മോഹനുണ്ടായിരുന്നുവെന്നും പൊലീസ് പറയുന്നു.
മോഹൻ തന്റെ അമ്മയുടേയും സഹോദരിയുടേയും അനന്തരവന്റേയും കഴുത്തറുത്ത ശേഷം ജീവനൊടുക്കാൻ ശ്രമിച്ചു. കടക്കെണി കാരണം ആത്മഹത്യ ചെയ്യുകയാണെന്നു വ്യക്തമാക്കി വിഡിയോ റെക്കോർഡ് ചെയ്തിരുന്നു. ഈ വിഡിയോ ബന്ധുക്കൾക്ക് ആയച്ചു കൊടുത്തു. ഇതോടെയാണ് സംഭവം പുറംലോകമറിഞ്ഞത്.
വിഡിയോ കണ്ടയുടൻ ബന്ധുക്കൾ വീട്ടിലേക്ക് എത്തിയെങ്കിലും മുൻവാതിൽ ആകത്തു നിന്നു പൂട്ടിയ നിലയിലായിരുന്നു. തുടർന്നു പിൻവാതിലിലൂടെ അകത്തു കയറി നോക്കിയപ്പോഴാണ് നാല് പേരേയും രക്തത്തിൽ കുളിച്ച നിലയിൽ കണ്ടെത്തിയത്. ഉടൻ തന്നെ ബന്ധുക്കൾ പൊലീസിൽ വിവരം അറിയിക്കുകയായിരുന്നു.
തിരുവനന്തപുരം: യേശുക്രിസ്തുവിന്റെ ജറുസലേം പ്രവേശനത്തിന്റെ സ്മരണകളുണർത്തി കുരുത്തോലകളേന്തി ക്രൈസ്തവർ ഇന്ന് ഓശാനപ്പെരുന്നാൾ ആചരിച്ചു. സഹനത്തിന്റെയും കുരിശുമരണത്തിന്റെയും ദിനങ്ങളായ പീഡാനുഭവ വാരത്തിന് ഇതോടെ തുടക്കമായി. യേശുക്രിസ്തുവിന്റെ ജറുസലേം പ്രവേശനത്തിന്റെയും അന്ത്യ അത്താഴത്തിന്റെയും കാൽവരിക്കുന്നിലെ കുരിശുമരണത്തിന്റെയും ഉയിർപ്പുതിരുനാളിന്റെയും ഓർമ്മ പുതുക്കുന്ന വേളയാണിത്.
യേശുക്രിസ്തുവിനെ കഴുതപ്പുറത്തിരുത്തി യഹൂദജനം രാജകീയപദവികളോടെ ഒലിവിൻ ചില്ലകളേന്തി ജറുസലേം നഗരത്തിലേക്ക് വരവേറ്റതിന്റെ അനുസ്മരണമായാണ് ഓശാന ഞായറിലെ തിരുക്കർമ്മങ്ങൾ. പ്രത്യേക പ്രാർത്ഥനകളിൽ പങ്കെടുക്കാൻ പുലർച്ചെ തന്നെ വിശ്വാസികൾ ദേവാലയങ്ങളിൽ എത്തിയിരുന്നു.തലസ്ഥാനത്ത് പാളയം സെന്റ് ജോസഫ് മെട്രോപോളിറ്റൻ കത്തീഡ്രലിൽ നടന്ന പ്രാർത്ഥനാ ചടങ്ങുകൾക്ക് ലത്തീൻ അതിരൂപത ആർച്ചുബിഷപ്പ് തോമസ് ജെ. നെറ്റോ മുഖ്യ കാർമ്മികത്വം വഹിച്ചു.
പള്ളിയിൽ നിന്ന് ആരംഭിച്ച കുരുത്തോല പ്രദക്ഷിണം യൂണിവേഴ്സിറ്റി കോളേജ് പരിസരത്തുനിന്നും തിരിഞ്ഞ് വീണ്ടും ദേവാലയത്തിൽ സമാപിച്ചു.
കൊച്ചിയിൽ സെന്റ് മേരീസ് ബസിലിക്കയിൽ നടന്ന തിരുകർമ്മങ്ങൾക്ക് സിറോ മലബാർ സഭ അദ്ധ്യക്ഷൻ മാർ റാഫേൽ തട്ടിൽ നേതൃത്വം നൽകി.
നെയ്യാറ്റിൻകര ലത്തീൻ രൂപതയുടെ ഓശാന തിരുകർമ്മങ്ങൾക്ക് ബിഷപ്പ് ഡോ.ഡി.സെൽവരാജനും, പാറശാല മലങ്കരരൂപതയുടെ തിരുകർമ്മങ്ങൾക്ക് ബിഷപ്പ് ഡോ.തോമസ് മാർ യൗസേബിയൂസും, ചങ്ങനാശ്ശേരി അതിരൂപതയിലെ അമ്പൂരിഫൊറോന ദേവാലയത്തിൽ ഫാ.സോണി കരിവേലിയും നേതൃത്വം നൽകി.
വെള്ളറട
കാനക്കോട് സാൽവേഷൻ ആർമി ചർച്ചിൽ ഓശാന ഞായർ ശുശ്രൂഷകൾ നടന്നു. കോർ ഓഫീസർ മേജർ ലീലാമ്മ സ്റ്റീഫൻ അധ്യക്ഷത വഹിച്ചു. പബ്ളിക്ക് റിലേഷൻ സെക്രട്ടറി മേജർ റ്റി.ഇ.സ്റ്റീഫൻസൺ തിരുവവചന സന്ദേശം നൽകി. മേജർ എസ് ശാമുവേൽ കുട്ടി, മേജർലില്ലി ഭായ്, മേജർ ജെ. ടൈറ്റസ്, മേജർ മേരി ജോൺ, മേജർ ഗ്രേയ്സ് ഡാനിയേൽ എന്നിവർ പ്രസംഗിച്ചു.
കുരുത്തോല പ്രദിക്ഷണത്തിന് ചർച്ച് കമ്മിറ്റി ഭാരവാഹികളായ ജെ സെൽവരാജ്, സജി പോൾ, ആർ സുമേഷ്, ഷീജാ ജോൺ, സാറാ ജെസ്റ്റിൻ, സുമ സജി, മിലാനാ ജോസ് തുടങ്ങിയവർ നേതൃത്വം നൽകി.
ഇനിയുള്ള ദിവസങ്ങൾ യേശുവിന്റെ പീഡാനുഭവത്തിന്റെയും കുരിശുമരണത്തിന്റെയും ഓർമ്മകളാൽ നിറഞ്ഞതാണ്. വ്യാഴാഴ്ച പെസഹ ആചരണവും വെള്ളിയാഴ്ച ദുഃഖവെള്ളിയും കഴിഞ്ഞാൽ ഞായറാഴ്ച ഈസ്റ്ററോടെ വിശുദ്ധ വാരം സമാപിക്കും.