കുന്നത്തൂർ:കുന്നത്തൂർ കൃഷിഭവനിലെ ഷെൽഫിൽ താവളമുറപ്പിച്ച രക്ത അണലി ജീവനക്കാരെ വിറപ്പിച്ചു.കഴിഞ്ഞ ദിവസം രാവിലെ 10ഓടെയാണ് സംഭവം.ഈ സമയം കൃഷിഭവൻ്റെ മതിൽ നിർമ്മാണത്തിനെത്തിയ ഈസ്റ്റ് ഇന്ത്യാ ബിൽഡേഴ്സ് എന്ന കൺസ്ട്രക്ഷൻ കമ്പനിയിലെ തൊഴിലാളികളായ സുരേഷ്,അനന്ദു എന്നിവർ ചേർന്ന് അണലിയെ പിടികൂടി ചാക്കിലാക്കുകയായിരുന്നു.

പാമ്പ് പിടുത്തം വശമില്ലാത്ത ഈ യുവാക്കൾ
മനോധൈര്യം കൈമുതലാക്കിയാണ് അണലിയെ പിടി കൂടിയതെന്ന് പറഞ്ഞു.പിന്നീടാണ് അണലി വർഗത്തിലെ ഏറ്റവും അപകടകാരിയായ രക്ത അണലിയാണ് ഇതെന്ന് മനസിലാക്കാൻ കഴിഞ്ഞത്.

ശാസ്താംകോട്ട:കുന്നത്തൂർ താലൂക്കിലെ ഏറ്റവും വലിയ സഹകരണ സ്ഥാപനമായ ശാസ്താംകോട്ട കാർഷിക ഗ്രാമവികസന ബാങ്കിലേക്കുള്ള ഭരണ സമിതി തെരഞ്ഞെടുപ്പ് ഞായറാഴ്ച ഐസിഎസ് മിലാദേ ഷെരീഫ് ഹയർസെക്കൻ്ററി സ്കൂളിൽ നടക്കും.രാവിലെ 8 മുതൽ വൈകിട്ട് 4 വരെയാണ് പോളിംഗ്.

രൂപീകൃതമായ കാലം മുതൽ കോൺഗ്രസ് ഭരണത്തിലുള്ള ബാങ്കിൽ ഇക്കുറി കോൺഗ്രസിലെ ഔദ്യോഗിക -വിമതപക്ഷ സ്ഥാനാർത്ഥികൾ നേർക്കുനേർ ഏറ്റുമുട്ടുവെന്ന പ്രത്യേകതയുമുണ്ട്.120000 ത്തോളം അംഗങ്ങൾ മെമ്പർമാരായിട്ടുള്ള ഈ ബാങ്കിൽ മൂവായിരത്തോളം പേർ വോട്ട് ചെയ്യാനെത്തുമെന്നാണ് പ്രതീക്ഷിക്കുന്നത്.പൊതു തെരഞ്ഞെടുപ്പു പോലെ വീറും വാശിയുമേറിയ പോരാട്ടമാണ് താലൂക്കിലെ 7 പഞ്ചായത്തുകളിലും ഇരുകൂട്ടരും നടത്തിവരുന്നത്.

13 അംഗ ഭരണസമിതിയിൽ 40 വയസിൽ താഴെ പ്രായമുള്ള ജനറൽ വിഭാഗത്തിൽ നിന്നും അമീർ നൂറുദീൻ കുട്ടി എതിരില്ലാതെ തെരഞ്ഞെടുക്കപ്പെട്ടിരുന്നു.ഇദ്ദേഹം ഔദ്യോഗിക പാനലിലെ സ്ഥാനാർത്ഥിയാണ്.നിലവിലെ ബാങ്ക് പ്രസിഡൻ്റ് അരവിന്ദാക്ഷൻപിള്ള നേതൃത്വം നൽകുന്ന ഔദ്യോഗിക പാനലിലാണ് ഡിസിസി പ്രസിഡൻ്റ് അംഗീകാരം നൽകിയിരിക്കുന്നത്.ആർ.പങ്കജാക്ഷൻപിള്ള,സി.കെ പൊടിയൻ,ബിജുരാജൻ, വി.വേണുഗോപാല കുറുപ്പ്, വൈ.ഷാജഹാൻ,എസ്.സുഭാഷ്,സോമൻ പിള്ള,നസീറ,ലിസി.ജി,പി.കെ രവി,കെ.സുകുമാരർ നായർ,നാസില എന്നിവരാണ് ഔദ്യോഗിക പാനലിൽ മത്സരിക്കുന്നത്.ഇവരിൽ കോൺഗ്രസ് മുൻ ബ്ലോക്ക് പ്രസിഡൻ്റും ഡിസിസി ജനറൽ സെക്രട്ടറിയുമായ കെ.സുകുമാരർ നായരാണ് പ്രസിഡൻ്റ് സ്ഥാനാർത്ഥി.ബാങ്ക് തെരഞ്ഞെടുപ്പിൽ സ്ഥാനാർത്ഥിത്വം ലഭിക്കാതെ പോയവർ,തങ്ങളുടെ അസംതൃപ്തി പരസ്യമായി പ്രകടിപ്പിച്ചും നേതൃത്വത്തെ വെല്ലുവിളിച്ചുമാണ് വിമതപക്ഷത്ത് മത്സരിക്കുന്നത്.ഡിസിസി ജനറൽ സെക്രട്ടറി കാഞ്ഞിരവിള അജയകുമാറിൻ്റെ നേതൃത്വത്തിലാണ് വിമതപക്ഷം മത്സരരംഗത്തുള്ളത്.അതിനിടെ സംഘർഷാവസ്ഥ കണക്കിലെടുത്ത് സ്ഥലത്ത് കനത്ത പോലീസ് സുരക്ഷയും ഏർപ്പെടുത്തി

ശാസ്താംകോട്ട:കുടിവെള്ള ക്ഷാമം അതിരൂക്ഷമായ ശൂരനാട് വടക്ക് പഞ്ചായത്തിലെ കനാലുകളിൽ കൂടി വെള്ളം തുറന്നു വിടാത്ത നടപടിയിൽ പ്രതിഷേധിച്ച് കൊട്ടാരക്കര കെഐപി
എക്സിക്യൂട്ടീവ് എഞ്ചിനീയറെ ഉപരോധിച്ചു.ശൂരനാട് വടക്ക് പ്രസിഡന്റ് ശ്രീലക്ഷ്മിയുടെ നേതൃത്വത്തിലായിരുന്നു ഉപരോധം.ശൂരനാട് വടക്ക് പഞ്ചായത്തിലെ ഭൂരിഭാഗം പ്രദേശങ്ങളിലും കുടിവെള്ളക്ഷാമം രൂക്ഷമാണ്.കനാലുകൾ തുറന്നുവിട്ടാൽ ഒരു പരിധിവരെ ഇത് പരിഹരിക്കാൻ കഴിയും.

ഫെബ്രുവരി അവസാനിക്കാറായിട്ടും ഇതുവരെയും കനാലുകൾ തുറന്നു വിടാൻ അധികൃതർ നടപടി സ്വീകരിച്ചിട്ടില്ല.അടിയന്തിരമായി കനാലുകൾ തുറന്നില്ലെങ്കിൽ ജനങ്ങളെ സംഘടിപ്പിച്ച് ശക്തമായ സമരപരിപാടികളുമായി മുന്നോട്ടു പോകുമെന്ന് പ്രസിഡന്റ് ശ്രീലക്ഷ്മി അറിയിച്ചു,തിങ്കളാഴ്ചയോടുകൂടി ശൂരനാട് വടക്ക് പ്രദേശങ്ങളിൽ കനാൽ ജലം എത്തിക്കാമെന്ന് അധികൃതർ ഉറപ്പ് നൽകിയതോടെയാണ് ഉപരോധം അവസാനിപ്പിച്ചത്.പഞ്ചായത്ത് അംഗങ്ങളായ സുബൈർ,ശ്രീകുമാർ,ഷീജ ഷാജി,ഗ്രീഷ്മ,ജെസ്സി എന്നിവർ നേതൃത്വം നൽകി.

ശാസ്താംകോട്ട:ശാസ്താംകോട്ട ശ്രീ ധർമ്മശാസ്താ ക്ഷേത്രത്തിൽ തിരു:ഉത്സവം തിങ്കളാഴ്ച കൊടിയേറും.മാർച്ച് 4ന് ആറാട്ടോടെ സമാപിക്കും.ഞായർ രാവിലെ 8.15ന് വാനര ഊട്ട്,മീനൂട്ട്,വൈകിട്ട് 5.45ന് കൈകൊട്ടിക്കളി,6.40ന് നവീകരിച്ച സ്റ്റേജിൻ്റെ ഉദ്ഘാടനവും സാംസ്കാരിക സമ്മേളനവും ആദരവും നടക്കും.ദേവസ്വം ബോർഡ് അംഗം കെ.രാജു ഉദ്ഘാടനം നിർവഹിക്കും.ഉപദേശക സമിതി പ്രസിഡൻ്റ് കെ.പി അജിതകുമാർ അധ്യക്ഷത വഹിക്കും.

രാത്രി 8ന് ഭക്തിസംഗീത സദസ്.23 ന് വൈകിട്ട് 7.30നും 8നും മദ്ധ്യേ തൃക്കൊടിയേറ്റ്,രാത്രി 8.15 ന് നൃത്തസന്ധ്യ.24ന് രാത്രി 7ന് കരോക്കെ ഗാനമേള,8.30ന് ത്രിഭംഗി.25ന് വൈകിട്ട് 6ന് സോപാനസംഗീതം,6.40ന് ആദ്ധ്യാത്മിക പ്രഭാഷണം,രാത്രി 8ന് സ്റ്റേജ് സിനിമ.26 ന് രാത്രി 7ന് സാംസ്കാരിക സദസ്,7.45ന് ശ്രീഭൂതബലി എഴുന്നള്ളത്ത്, 8ന് ഡാൻസ്.

27ന് വൈകിട്ട് 5.30ന് പഞ്ചാരിമേളം,രാത്രി 8ന് നൃത്തനാടകം.28ന് രാവിലെ 11ന് സമൂഹസദ്യ,രാത്രി 7ന് നടക്കുന്ന ആറാം ഉത്സവത്തിൻ്റെ 50-ാം വാർഷിക ആഘോഷം പി.സി വിഷ്ണുനാഥ് എംഎൽഎ ഉദ്ഘാടനം ചെയ്യും.രാത്രി 8ന് മാജിക് ഷോ,8.30 ന് നാട്ടുപൂരം,9.30 ന് നൃത്തമെഗാഷോ,മാർച്ച് ഒന്നിന് രാവിലെ 10ന് ആയില്യംപൂജ,രാത്രി 7ന് ഗാനമേള,രാത്രി 9ന് മേജർ സെറ്റ് കഥകളി,മാർച്ച് രണ്ടിന് രാവിലെ 9.30ന് ഓട്ടൻതുള്ളൽ,11.15 ന് സമൂഹസദ്യ,11.30 ന് ഉത്സവബലി ദർശനം, 6.35ന് ചാക്യാർകൂത്ത്,രാത്രി 8.30ന് ഗാനമേള.3ന് രാത്രി 7ന് ഗാനമേള.

സമാപന ദിവസമായ നാലിന് രാവിലെ 8 നും 9നും മദ്ധ്യേ തൃകൊടിയിറക്ക്,വൈകിട്ട് നാലിന് ശാസ്താംകോട്ട പൂരം, 6ന് ആറാട്ട് എഴുന്നള്ളത്ത്കായൽവിളക്ക്,രാത്രി 9ന് സംഗീതസദസ്, 10ന് തിരു:ആറാട്ട്,ഉത്സവവുമായി ബന്ധപ്പെട്ട ഒരുക്കങ്ങൾ പൂർത്തിയായതായും പൂർണമായും ഹരിതചട്ടം പാലിച്ചു മാത്രമേ ഉത്സവം നടത്തുകയുള്ളുവെന്നും ഉപദേശക സമിതി പ്രസിഡൻ്റ് കെ.പി അജിത്കുമാർ,സെക്രട്ടറി കേരള ശശികുമാർ,വൈസ് പ്രസിഡൻ്റ് എസ്.രാധാകൃഷ്ണ പിള്ള,ഡോ.ബിജു പി.ആർ, വി.ബി ഉണ്ണിത്താൻ എസ്.ഷിബി എന്നിവർ പറഞ്ഞു.