കൊല്ലം: ശക്തികുളങ്ങരയില് ബോട്ടുമാറിക്കയറുന്നതിനിടയില് കാല്തെറ്റി കായലില് വീണ് മത്സ്യത്തൊഴിലാളിയെ കാണാതായി. തിരുവനന്തപുരം പാറശാല അജ്ഞലി കോണം ലോട്ടസ് ക്യാബിനില് ക്രിസ്റ്റഫറിന്റെ മകന് കിരണിനെയാണ് (27) കാണാതായത്.
9ന് രാത്രി 10 മണിയോടെയായിരുന്നു സംഭവം. അരവിള പട്ടം ഐസ് പ്ലാറ്റിനു സമീപം മത്സ്യത്തൊഴിലാളികളുടെ ബോട്ടുകള് ബന്ധിക്കുന്ന ഭാഗത്ത് നിര്ത്തിയിട്ടിരുന്ന ‘എഫ് ആന്റ് എഫ്’ എന്ന മത്സ്യബന്ധന ബോട്ടില് നിന്നും മറ്റൊരു ബോട്ടിലേക്ക് കയറുന്നതിനിടയിലാണ് അപകടമുണ്ടായത്. ഇയാള് വെള്ളത്തിലേക്ക് വീണ ഉടന് ഒപ്പമുണ്ടായിരുന്നവര് തിരച്ചില് നടത്തിയെങ്കിലും കണ്ടെത്താനായില്ല. തുടര്ന്ന് പുലര്ച്ചെ മുതല് ഫയര് ആന്റ് റസ്ക്യൂ സ്കൂബ ടീമിന്റെ നേതൃത്വത്തില് കായലില് തിരച്ചില് ഊര്ജിതമാക്കിയിട്ടുണ്ട്. ശക്തികുളങ്ങര പോലീസ് സംഭവത്തില് കേസെടുത്ത് അന്വേഷണം ആരംഭിച്ചു.
