തിരുവനന്തപുരം. വിവാദ റെഞ്ച് റോവര്‍ യാത്രയില്‍ തദ്ദേശ മന്ത്രി കെ എം ഷാജിയുടെ വാദം പൊളിയുന്നു. പൊതുഭരണവകുപ്പിന്റെ അനുമതിയില്ലാതെയായിരുന്നു മന്ത്രിയുടെ റെഞ്ച് റോവര്‍ യാത്ര. സ്വകാര്യ വാഹനം കെ എം ഷാജിക്ക് ഔദ്യോഗിക വാഹനമാക്കാന്‍ അനുമതി നല്‍കി ഇതുവരെ പൊതുഭരണവകുപ്പ് ഉത്തരവിറങ്ങിയിട്ടില്ല. ഒരു സ്വകാര്യ ചടങ്ങില്‍ പങ്കെടുക്കാന്‍ കണ്ണൂരില്‍ നിന്ന് കുര്‍ഗിലേക്കുള്ള യാത്രയ്ക്ക് മാത്രമാണ് ഷാജിക്ക് സ്വകാര്യ കാര്‍ ഉപയോഗിക്കാന്‍ അനുമതി നല്‍കിയത്. സ്വകാര്യ ചടങ്ങില്‍ പങ്കെടുക്കാന്‍ കര്‍ണാടക സര്ക്കാരിന്റെ പ്രോട്ടോകോള്‍ വിഭാഗത്തിന് കൈമാറിയ കത്തില്‍ റെഞ്ച് റോവറിന്റെ നമ്പര്‍ ഉള്‍പ്പെടുത്തിയിട്ടുണ്ട്.
റേഞ്ച് റോവര്‍ കറക്കത്തില്‍ കെഎം ഷാജിയുടെ വാദങ്ങള്‍ പൊളിയുകയാണ്. മന്ത്രിമാര്‍ക്ക് സ്വകാര്യ വാഹനം ഔദ്യോഗിക വാഹനമാക്കാം, പക്ഷെ പൊതുഭരണവകുപ്പിന്റെ അനുമതി ഉത്തരവ് ആവശ്യമാണ്. നേരത്തെ പലമന്ത്രിമാരും ഇങ്ങനെയാണ് ആഡംബര കാര്‍ ഔദ്യോഗിക കാറാക്കിയത്. യാക്കൂബ് എന്ന ഷാജിയുടെ സുഹൃത്താണ് റേഞ്ച് റോവര്‍ നല്‍കുന്നത്.
വിവാദം ശക്തമായപ്പോള്‍ ഷാജിയുടെ വാദം ഇങ്ങനെ: നല്ല വാഹനങ്ങള്‍ വീട്ടില്‍ വെറുതെ ലോക്ക് ചെയ്ത് വെച്ചിട്ടുള്ള സുഹൃത്തുക്കള്‍ക്ക് യാക്കൂബ്ക്കയെ പോലെ പ്രശസ്തന്‍ ആകാന്‍ ആഗ്രമുണ്ടെങ്കില്‍ എനിക്ക് തരാം. ആവശ്യമായ അനുമതി വാങ്ങി ഞാന്‍ ഉപയോഗിച്ചോളാം.
എന്നാല്‍, റേഞ്ച് റോവര്‍ ഉപയോഗത്തിന് ഷാജിക്ക് അനുമതി കിട്ടിയിട്ടില്ല. ആകെ അനുമതി നല്‍കിയത് സ്വകാര്യ ചടങ്ങില്‍ പങ്കെടുക്കാന്‍ കണ്ണൂരില്‍ നിന്നും കൂര്‍ഗിലേക്ക് പോകാന്‍ മാത്രമാണ്. ആഡംബര കാര്‍ വിവാദത്തില്‍ ശക്തമായ കടന്നാക്രണം തുടരുകയാണ് പ്രതിപക്ഷം. ആര്‍ക്കും വേണ്ടാത്ത 13 ആം നമ്പര്‍ ഏറ്റെടുത്ത മാതൃകയായ ഷാജിയാണ് ഇപ്പോള്‍ റേഞ്ച് റോവറില്‍പ്പെട്ടത്. ആഡംബര കാര്‍ വിവാദത്തില്‍ പക്ഷെ വിചിതരമായ വാദങ്ങള്‍ നിരത്തിയാണ് മന്ത്രിമാര്‍ ഷാജിയെ ന്യായീകരിക്കുന്നത്. വിവാദം തുടരുന്നതിനിടെ മന്ത്രി യൂറോപ്യന്‍ ടൂറിലാണ്.
