കരുനാഗപ്പള്ളി. ശ്രീ നീലകണ്ഠ തീർഥപാദസ്വാമി ചാരിറ്റബിൾ ട്രസ്റ്റിന്റെ പ്രഥമ തീർത്ഥസ്വാമി സാഹിതീ പുരസ്കാരം ഗവേഷകനും എഴുത്തുകാരനുമായ ഡോ.സുരേഷ് മാധവിന് ലഭിച്ചു. 25000 രൂപയും പ്രശസ്തിപത്രവും ഫലകവുമടങ്ങുന്ന പുരസ്കാരം ജൂലൈ 20 ന് കരുനാഗപ്പള്ളി പുതിയകാവ് ഋഷി മണ്ഡപത്തിൽ സംഘടിപ്പിക്കുന്ന ചടങ്ങിൽ വെച്ച് പ്രൊഫ.വി.മധുസൂദനൻ നായർ സമ്മാനിക്കും. ആത്മീയ ചരിത്ര ഗവേഷണരംഗത്തെ സംഭാവനകളെ പരിഗണിച്ചാണ് പുരസ്കാരം.
പ്രൊഫ. ടി.പി. ശങ്കരൻകുട്ടി നായർ , പ്രൊഫ.ജെ.ലളിത, ഡോ.സുകുമാർ കാനഡ എന്നിവരടങ്ങുന്ന സമിതിയാണ് അവാർഡ് നിർണയിച്ചത്. നിരവധി നവോത്ഥാന നായകരെ സംഘടനാ രംഗത്തേയ്ക്ക് നയിച്ച വേദഗുരു സദാനന്ദ സ്വാമികളുടെ ആദ്യത്തെ ആധികാരിക ജീവചരിത്രo എഴുതിയത് സുരേഷ് മാധവാണ്. ചട്ടമ്പിസ്വാമികൾ, ശ്രീ നാരായണ ഗുരു, അയ്യൻകാളി, തപസ്വി ഓമൽ, വാഗ്ഭടാനന്ദ ഗുരു തുടങ്ങിയ മഹാത്മാക്കളുടെ അപൂർവ രേഖകൾ പുറത്തു കൊണ്ടുവരാനും കഴിഞ്ഞു.
വൈക്കം സത്യാഗ്രഹത്തെക്കുറിച്ച് 1926 ൽ ടി.കെ.മാധവൻ നടത്തിയ വിശദീകരണപ്രസംഗം കണ്ടെടുത്ത് പ്രസിദ്ധീകരിക്കാൻ കഴിഞ്ഞതും സുരേഷ് മാധവിന്റെ ഗവേഷണ രംഗത്തെ മികച്ച നേട്ടമാണ്. ഹരിവരാസനം പാട്ടിന്റെയും രാമ സന്ധ്യാനാമത്തിന്റെയും രചനാ രചിത്രം വെളിച്ചത്തു കൊണ്ടുവരാനും ഈ ഗവേഷകന് കഴിഞ്ഞു. പന്തളം എൻ.എസ്.എസ്. കോളേജിലെ മലയാള വിഭാഗം അധ്യാപകൻ കൂടിയായ ഡോ.സുരേഷ് മാധവിന്റെ ഗവേഷണ ഭൂമികയിൽ ചരിത്രം, തത്ത്വചിന്ത, സാഹിത്യം എന്നിവയ്ക്കാണ് സ്ഥാനം.
