ക്വാലാലംപൂർ: ആഗോളതലത്തിൽ വിമാന ഇന്ധനവില കുതിച്ചുയരുന്നതും പ്രവർത്തനച്ചെലവ് വർദ്ധിക്കുന്നതും കാരണം ഉയർന്ന വിമാന ടിക്കറ്റ് നിരക്കുകൾ ഇനി ഒരു താത്കാലിക മാറ്റത്തിന് പകരം ‘പുതിയ സാധാരണ നില’ ആയി മാറിയേക്കാമെന്ന് അസോസിയേഷൻ ഓഫ് ഏഷ്യ പസഫിക് എയർലൈൻസ് ഡയറക്ടർ ജനറൽ വോംഗ് ഹോംഗ് വ്യക്തമാക്കി. മേഖലയിലെ 18 പ്രമുഖ വിമാനക്കമ്പനികളുടെ കൂട്ടായ്മയുടെ മേധാവിയായ അദ്ദേഹം വെള്ളിയാഴ്ച നടന്ന സമ്മേളനത്തിന് ശേഷമാണ് യാത്രക്കാർക്ക് ആശങ്കയുണ്ടാക്കുന്ന ഈ മുന്നറിയിപ്പ് നൽകിയത്.
യാത്രക്കാരെ അകറ്റാതിരിക്കാൻ ടിക്കറ്റ് നിരക്കുകൾ നിയന്ത്രിച്ചുനിർത്താൻ വിമാനക്കമ്പനികൾ പരമാവധി ശ്രമിക്കുന്നുണ്ടെങ്കിലും, നിലവിലെ വിപണി സാഹചര്യങ്ങളും ചെലവുകളും വിമാനക്കമ്പനികളുടെ സാമ്പത്തിക നിലനിൽപ്പിനെ തന്നെ ബാധിക്കുന്ന അവസ്ഥയിലാണെന്ന് അദ്ദേഹം ചൂണ്ടിക്കാട്ടി.
ഒരു വർഷം മുൻപത്തേതിൽ നിന്ന് തികച്ചും വ്യത്യസ്തമായ സാമ്പത്തിക സാഹചര്യത്തിലാണ് വ്യോമയാന മേഖല ഇപ്പോൾ പ്രവർത്തിക്കുന്നതെന്ന് വോംഗ് ഹോംഗ് കണക്കുകൾ സഹിതം വിശദീകരിച്ചു. ഒരു വർഷം മുൻപ് ബാരലിന് ഏകദേശം 80 ഡോളറായിരുന്ന വിമാന ഇന്ധനവില നിലവിൽ 180 ഡോളറിലേക്ക് കുതിച്ചുയർന്നിരിക്കുകയാണ്. വിമാനക്കമ്പനികളുടെ ആകെ പ്രവർത്തനച്ചെലവിന്റെ മൂന്നിലൊന്ന് ഭാഗവും ഇന്ധനത്തിനായാണ് ചെലവഴിക്കുന്നത്.
