സോഷ്യൽ മീഡിയ ഫ്ലാറ്റ്ഫോമായ ഇൻസ്റ്റാഗ്രാമിന് ആഗോളതലത്തിൽ വ്യാപകമായ തടസങ്ങൾ നേരിട്ടതായി റിപ്പോർട്ട്. ബുധനാഴ്ച മിക്ക ഉപയോക്താക്കൾക്കും മെസേജുകൾ അയക്കുന്നതിൽ ബുദ്ധിമുട്ട് നേരിട്ടതായാണ് വിവരം. നേരിട്ടുള്ള സന്ദേശങ്ങൾ (DMs) ആക്സസ് ചെയ്യാനോ അയയ്ക്കാനോ കഴിയാത്തതായി പരാതികളുയർന്നു. രാവിലെ 8:45ഓടെ ഇത്തരം പ്രശ്നങ്ങൾ കുത്തനെ വർദ്ധിച്ചതാണ് വെബ്സൈറ്റുകളുടെ സമയം ട്രാക്ക് ചെയ്യുന്ന പോർട്ടലായ ഡൗൺഡിറ്റക്ടർ റിപ്പോർട്ട് ചെയ്യുന്നത്. ചിലർക്ക് സെർവർ-കണക്ഷൻ പ്രശ്നങ്ങളും കണ്ടന്റുകൾ പോസ്റ്റുചെയ്യുന്നതിന് ബുദ്ധിമുട്ടുകളുണ്ടായി.
ഏറ്റവും കൂടുതൽ പ്രശ്നങ്ങൾ റിപ്പോർട്ട് ചെയ്യപ്പെട്ടത് ഇൻസ്റ്റാഗ്രാം ആപ്പിലാണ് (77%). വെബ്സൈറ്റ് വഴി 13 ശതമാനം പ്രശ്നങ്ങളാണ് റിപ്പോർട്ട് ചെയ്തത്. ഏകദേശം 11 ശതമാനം ഉപയോക്താക്കൾക്ക് സെർവർ കണക്ഷനുമായി ബന്ധപ്പെട്ട തകരാറുകൾ അനുഭവപ്പെട്ടു. പ്രധാനമായും അമേരിക്കയിലെ വൻ നഗരങ്ങളെയാണ് ഈ ഔട്ടേജ് ബാധിച്ചത്. ലോസ് ഏഞ്ചൽസ്, ഫീനിക്സ്, ചിക്കാഗോ, വാഷിംഗ്ടൺ, ന്യൂയോർക്ക് എന്നിവിടങ്ങളാണ് ഏറ്റവും കൂടുതൽ ബാധിക്കപ്പെട്ട നഗരങ്ങൾ. നേരിട്ട് സന്ദേശങ്ങളയക്കുന്നതിൽ ഇന്ത്യയിലും തടസങ്ങൾ റിപ്പോർട്ട് ചെയ്യുന്നു.
