ചെന്നൈ: കാറിന് മുകളിൽ കിടന്ന് നാൽപ്പത് കിലോമീറ്റർ കള്ളക്കടത്തുകാരെ സാഹസികമായി പിന്തുടർന്ന തമിഴ്നാട്ടിലെ പൊലീസുകാരന് അഭിനന്ദന പ്രവാഹം. കോയമ്പത്തൂരിനടുത്ത കോവിൽപാളയം സ്റ്റേഷനിലെ പോലീസ് കോൺസ്റ്റബിൾ വേൽമുരുകനാണ് പുകയിലക്കടത്തുകാരെ സാഹസികമായി പിന്തുടർന്നത്.
കഴിഞ്ഞ ദിവസം പുലര്ച്ചെ കൊച്ചി- സേലം ദേശീയപാതയിലാണ് സംഭവം. വാഹന പരിശോധനയ്ക്കിടെ പൊലീസിനെ തള്ളിമാറ്റി പാഞ്ഞ കാറില് തൂങ്ങിക്കിടന്ന് 40 കിലോമീറ്ററോളമാണ് ഇദ്ദേഹം സഞ്ചരിച്ചത്.
കര്ണാടകയില് നിന്നു വന്തോതില് നിരോധിക പുകയില ഉത്പന്നങ്ങള് കടത്തുന്നുണ്ടെന്ന വിവരത്തിന്റെ അടിസ്ഥാനത്തില് സബ് ഇന്സ്പെക്ടര് വി വിഘ്നേഷും വേല്മുരുകനും ചേര്ന്നു വാഹനങ്ങള് പരിശോധിക്കുകയായിരുന്നു.
ബംഗളൂരുവില് നിന്നെത്തിയ കര്ണാടക രജിസ്ട്രേഷന് കാര് തടഞ്ഞു നിര്ത്തിയ പൊലീസ് പിന്സീറ്റിലെ സാധനങ്ങള് പരിശോധിക്കാന് ശ്രമിച്ചു. എന്നാല് കാറിലുണ്ടായിരുന്ന മൂന്നംഗ സംഘം പൊലീസുകാരെ തള്ളിമാറ്റി ഡോറുകള് അടച്ച് അതിവേഗം കാര് മുന്നോട്ടെടുത്തു. പെട്ടെന്നു കാറിന്റെ വേഗം കൂട്ടി രക്ഷപ്പെടാന് ശ്രമിച്ചപ്പോള് വേല്മുരുകന്റെ കൈ ഡോര് ഹാന്ഡിലില് കുടുങ്ങി. ഉടന് കാറിന്റെ റൂഫ് റെയിലില് പിടിച്ചു മുകളിലേക്ക് കയറി കിടക്കുകയായിരുന്നുവെന്നു വേല്മുരുകന് പറഞ്ഞു.
പൊലീസുകാരന് മുകളില് ഉണ്ടെന്ന കാര്യം വകവയ്ക്കാതെ കാര് മണിക്കൂറില് 100 കിലോമീറ്റര് വേഗത്തിലാണ് പ്രതികള് ഓടിച്ചത്. സിവില് വേഷത്തിലുള്ള ഹെഡ് കോണ്സ്റ്റബിള് മരണപ്പാച്ചില് നടത്തുന്ന കാറിനു മുകളില് കിടക്കുന്നതു കണ്ട് മറ്റു യാത്രക്കാര് മൊബൈലില് പകര്ത്തിയ ദൃശ്യങ്ങള് സമൂഹ മാധ്യമങ്ങളില് പ്രചരിച്ചു.
അതിനിടെ എസ്ഐയും സംഘവും മറ്റൊരു കാറില് പ്രതികളെ പിന്തുടര്ന്നിരുന്നു. വിവരമറിഞ്ഞ് നിലമ്പൂര്, കരുമത്തംപട്ടി പൊലീസും പ്രദേശത്തെ ആംബുലന്സ് ഡ്രൈവര്മാരും നാട്ടുകാരും ചെയ്സില് പങ്കെടുത്തു. അതിനിടെ എതിര്വശത്തു നിന്നു അവിനാശി പൊലീസും വരുന്നുണ്ടായിരുന്നു. ഒടുവില് തിരുപ്പുര് ജില്ലാ അതിര്ത്തിയിലെ തെക്കലൂരില് പൊലീസും ആംബുലന്സുകാരും ചേര്ന്നു കാറിനെ വളഞ്ഞു.
വണ്ടി നിന്ന ഉടന് ഓടിപ്പോകാന് ശ്രമിച്ച 3 പ്രതികളെ അവിനാശി പൊലീസ് പിടികൂടി. രാജസ്ഥാന് സ്വദേശികളായ പി ബാബു ധാര (27), എ രാജേഷ് കുമാര് (23), എസ് സുരേഷ് (20) എന്നിവരാണ് അറസ്റ്റിലായത്. രക്ഷപ്പെടാന് ശ്രമിക്കുന്നതിനിടെ ഇവരില് രണ്ട് പേരുടെ കൈ ഒടിഞ്ഞിട്ടുണ്ട്. കോയമ്പത്തൂരിലേക്ക് കടത്തുകയായിരുന്ന 170 കിലോ നിരോധിത പുകയില് ഉത്പന്നങ്ങളാണു കാറില് ഉണ്ടായിരുന്നത്. വേൽമുരുകൻ്റെ സാഹസം അപകടം പിടിച്ചതായിരുന്നെങ്കിലും ജോലിയോടുള്ള സമീപനത്തെ വാഴ്ത്തുകയാണ് സമൂഹമാധ്യമങ്ങളിലെ പോസ്റ്റുകളിൽ.
