കൊല്ലം: കൊല്ലം റെയിൽവേ സ്റ്റേഷനിൽ പുതുതായി നിർമിച്ച മൾട്ടി ലെവൽ കാർ പാർക്കിംഗ് ഉദ്ഘാടനം ഇന്ന്. വൈകുന്നേരം 3.30ന് കേന്ദ്ര സഹ മന്ത്രി സുരേഷ് ഗോപി ഉദ്ഘാടനം ചെയ്യും. യാത്രക്കാരുടെയും നഗരവാസികളുടെയും ദീർഘകാല ആവശ്യത്തിന് പരിഹാരമായാണ് ആധുനിക സൗകര്യങ്ങളോടുകൂടിയ പാർക്കിംഗ് സമുച്ചയം ഒരുക്കിയിരിക്കുന്നത്.
നഗരത്തിലെ വർധിച്ചുവരുന്ന വാഹന സാന്ദ്രതയും റെയിൽവേ സ്റ്റേഷനിലെ പാർക്കിംഗ് ക്ഷാമവും കണക്കിലെടുത്താണ് ഇന്ത്യൻ റെയിൽവേയുടെ നേതൃത്വത്തിൽ ഈ പദ്ധതി നടപ്പാക്കിയത്. ഒരേസമയം നിരവധി കാറുകൾ സുരക്ഷിതമായി പാർക്ക് ചെയ്യാൻ കഴിയുന്ന രീതിയിലാണ് മൾട്ടി ലെവൽ പാർക്കിംഗ് രൂപകൽപ്പന ചെയ്തിരിക്കുന്നത്.
പദ്ധതി പ്രവർത്തനക്ഷമമാകുന്നതോടെ സ്റ്റേഷൻ പരിസരത്തെ ഗതാഗതക്കുരുക്ക് കുറയുകയും യാത്രക്കാർക്ക് കൂടുതൽ സൗകര്യപ്രദമായ പാർക്കിംഗ് ലഭിക്കുകയും ചെയ്യും എന്നാണ് പ്രതീക്ഷ. ഉദ്ഘാടന ചടങ്ങിൽ റെയിൽവേ ഉദ്യോഗസ്ഥരും ജനപ്രതിനിധികളും പങ്കെടുക്കും.
