പത്രം മലയാള ദിനപത്രങ്ങളിലൂടെ |2026 ജൂലൈ 10, വെള്ളി

മൊറോക്കോയെ എതിരില്ലാത്ത രണ്ട് ഗോളുകള്‍ക്കു തകര്‍ത്ത് ഫ്രാന്‍സ് സെമി ഫൈനലില്‍ പ്രവേശിച്ചു. രണ്ടാം പകുതിയില്‍ കിലിയന്‍ എംബാപ്പെയുടെയും ഉസ്മാന്‍ ഡെംബലെയുടെയും ഗോളുകളാണ് ഫ്രാന്‍സിന് ജയം സമ്മാനിച്ചത്. 60-ാം മിനിറ്റില്‍ എംബാപ്പെ ഫ്രാന്‍സിനായി അക്കൗണ്ട് തുറന്നു. 66-ാം മിനിറ്റില്‍ ബോക്‌സിന് പുറത്തുനിന്നുള്ള തകര്‍പ്പന്‍ ഷോട്ടിലൂടെ ഉസ്മാന്‍ ഡെംബലെ ലീഡ് ഉയര്‍ത്തി.

പിഎസ്‌സി പരീക്ഷാ ക്രമക്കേട് അന്വേഷിക്കാന്‍ ഐജി അജിത ബീഗത്തിന്റെ നേതൃത്വത്തില്‍ പ്രത്യേക അന്വേഷണ സംഘത്തെ നിയമിച്ചു. എസ്പി സക്കറിയ മാത്യു, ഡിവൈഎസ്പി അജയ് നാഥ് എന്നിവരാണ് സംഘത്തിലെ അംഗങ്ങള്‍. ക്രൈംബ്രാഞ്ച് എഡിജിപിയുടെ മേല്‍നോട്ടത്തില്‍ നടക്കുന്ന അന്വേഷണത്തിന്റെ പുരോഗതി റിപ്പോര്‍ട്ട് രണ്ടാഴ്ച കൂടുമ്പോള്‍ സമര്‍പ്പിക്കണമെന്നും ഡിജിപിയുടെ ഉത്തരവില്‍ പറയുന്നു.

പിഎസ്‌സി പരീക്ഷ ക്രമക്കേടില്‍ ആഭ്യന്തര വിജിലന്‍സ് അന്വേഷണവും ആരംഭിച്ചു. ആസൂത്രണ ബോര്‍ഡിലെ പരീക്ഷ ക്രമക്കേടില്‍ പരാതി നല്‍കിയ തിരുവനന്തപുരം സ്വദേശിയുടെ മൊഴി ആഭ്യന്തര വിജിലന്‍സ് രേഖപ്പെടുത്തി.

ഓപ്പറേഷന്‍ തൂഫാന്റെ ഭാഗമായി ദക്ഷിണേന്ത്യന്‍ ഡിജിപിമാരുടെ യോഗം ഇന്ന് തിരുവനന്തപുരത്ത് നടക്കും. ഇന്ത്യയുടെ ആഭ്യന്തര സുരക്ഷാ ചരിത്രത്തില്‍ പുതിയൊരു സഹകരണ മാതൃകയ്ക്ക് ഈ യോഗം തുടക്കമാകുമെന്ന് ആഭ്യന്തര മന്ത്രി രമേശ് ചെന്നിത്തല അറിയിച്ചു.

ഡല്‍ഹിയില്‍ കേരളത്തിന്റെ ‘യഥാര്‍ഥ അംബാസിഡര്‍മാരായി’ എല്ലാ എംപിമാരും ഒരു ടീമായി പ്രവര്‍ത്തിക്കണമെന്ന് മുഖ്യമന്ത്രി വി ഡി സതീശന്‍. സംസ്ഥാനത്തിന്റെ പ്രധാന ആവശ്യങ്ങളും വികസന പദ്ധതികളും ചര്‍ച്ച ചെയ്യുന്നതിനായി ചേര്‍ന്ന എംപിമാരുടെ സമ്മേളനത്തില്‍ സംസാരിക്കുകയായിരുന്നു അദ്ദേഹം.

നെയ്യാറ്റിന്‍കര ജില്ലാ ജനറല്‍ ആശുപത്രിയില്‍ ഡോക്ടറെ കാണാന്‍ ക്യൂ നിന്ന ആള്‍ കുഴഞ്ഞ് വീണ് മരിച്ചു. കൂട്ടപ്പന സ്വദേശി രാജേഷ് കുമാര്‍ (52) ആണ് മരിച്ചത്. സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ ജില്ലാ മെഡിക്കല്‍ ഓഫീസര്‍ക്ക് ആരോഗ്യ മന്ത്രി കെ. മുരളീധരന്‍ നിര്‍ദ്ദേശം നല്‍കി.

വിഴിഞ്ഞം ഓഹരി വിവാദത്തില്‍ അഴിമതി ആരോപിച്ച പാര്‍ട്ടി നിലപാട് ഏറ്റെടുക്കാതെ കേന്ദ്ര കമ്മിറ്റി അംഗം ഇപി ജയരാജന്‍. പദ്ധതിയിലെ വിവാദം അനാവശ്യമാണെന്നും അഴിമതി ആരോപണം ഉന്നയിക്കാന്‍ താനില്ലെന്നും അദ്ദേഹം പറഞ്ഞു.

നിയമസഭാ തെരഞ്ഞെടുപ്പു തോല്‍വിക്കു പിറകേ നേതൃത്വത്തില്‍ മാറ്റം വരുത്തുന്ന രീതി സി പി എമ്മില്‍ ഇല്ലെന്ന് കെ കെ ശൈലജ പറഞ്ഞു. തോല്‍വിയില്‍ എല്ലാവര്‍ക്കും കൂട്ടുത്തരവാദിത്തമാണുള്ളതെന്നും അവര്‍ കൂട്ടിച്ചേര്‍ത്തു.

ശബരിമലയില്‍ എല്ലാ ഭക്തര്‍ക്കും ദര്‍ശന സൗകര്യമൊരുക്കുമെന്ന് ദേവസ്വം മന്ത്രി കെ. മുരളീധരന്‍. തീര്‍ത്ഥാടനത്തിന് മുന്നോടിയായി നടത്തിയ അവലോകന യോഗത്തില്‍ റോഡ് നിര്‍മ്മാണം, ഇടത്താവള നവീകരണം തുടങ്ങിയവ വിലയിരുത്തി.

ആറുമാസം പിന്നിട്ട പാലാ നഗരസഭാ ഭരണത്തിന് കോണ്‍ഗ്രസ് പിന്തുണ പിന്‍വലിച്ചു. ഇതോടെ നഗരസഭാ ചെയര്‍പേഴ്സനെതിരെ എല്‍ഡിഎഫ് അവിശ്വാസ പ്രമേയത്തിന് നോട്ടീസ് നല്‍കി.

നടിയെ ആക്രമിച്ച കേസില്‍ പ്രതികളുടെ ശിക്ഷ മരവിപ്പിക്കണമെന്ന ഹര്‍ജിയില്‍ ഹൈക്കോടതി ഇടക്കാല ഉത്തരവിനായി മാറ്റി.

തനിക്കെതിരെ ഫേസ് ബുക്കില്‍ വ്യാജ പ്രചാരണം നടത്തിയവര്‍ക്കെതിരേ മുതിര്‍ന്ന കോണ്‍ഗ്രസ് നേതാവ് വി.എം. സുധീരന്‍ ആഭ്യന്തര മന്ത്രിക്ക് പരാതി നല്‍കി.

തിരുവനന്തപുരത്തെ പിഎസ്സി ഓഫീസിലേക്ക് മാര്‍ച്ച് നടത്തിയ യൂത്ത് കോണ്‍ഗ്രസ് പ്രവര്‍ത്തകര്‍ക്കതിരെ ജാമ്യമില്ലാ വകുപ്പ് പ്രകാരം കേസെടുത്തു.

സോളാര്‍ ഉപഭോക്താക്കളുടെ അഡീഷണല്‍ ക്യാഷ് ഡെപ്പോസിറ്റ് കണക്കുകള്‍ പുനഃപരിശോധിക്കുമെന്ന് കെഎസ്ഇബി അറിയിച്ചു.

വിഴിഞ്ഞം എംഡി സ്ഥാനത്ത് നിന്ന് ദിവ്യ എസ്. അയ്യരെ മാറ്റിയതില്‍ കെ.കെ. രാഗേഷിന്റെ വിമര്‍ശനത്തെ തള്ളി കെ.കെ. ശൈലജ രംഗത്തെത്തി. പുതിയ സര്‍ക്കാര്‍ വരുമ്പോള്‍ സ്ഥലംമാറ്റങ്ങള്‍ സ്വാഭാവികമാണെന്ന് അവര്‍ പറഞ്ഞു.

പതിമ്മൂന്നുകാരിയുടെ വ്യാജ പോക്സോ പരാതിയില്‍ കസ്റ്റഡിയിലെടുത്തവരെ മര്‍ദ്ദിച്ച എസ്ഐയെ സ്ഥലംമാറ്റി. സിഐക്കെതിരേയും നടപടിയുണ്ടാകും.

വ്യാജ ലഹരി വിരുദ്ധ സംഘടനയുടെ സംസ്ഥാന പ്രസിഡന്റിന്റെ കൂട്ടാളിയായ സുമിത് മോഹനനെ (37) പോലീസ് അറസ്റ്റ് ചെയ്തു.

സോഷ്യല്‍ മീഡിയ വഴി പരിചയപ്പെട്ട് യുവാവിനെ വിളിച്ചുവരുത്തി നാലു പവന്റെ സ്വര്‍ണമാലയും മൊബൈല്‍ ഫോണും തട്ടിയെടുത്ത യുവതിയെ പീച്ചി പോലീസ് അറസ്റ്റ് ചെയ്തു.

കോഴിക്കോട് നഗരത്തില്‍നിന്നും യുവതിയെ തട്ടിക്കൊണ്ടുപോയി സ്വര്‍ണാഭരണങ്ങള്‍ കവര്‍ന്ന കേസില്‍ നാല് സ്ത്രീകള്‍ ഉള്‍പ്പെടെ ആറുപേര്‍ പിടിയിലായി.

കള്ളാടി ദുരന്തബാധിതര്‍ക്കുള്ള ക്യാമ്പിലെ കുട്ടികള്‍ക്ക് മന്ത്രി ടി സിദ്ദിഖ്, പ്രിയങ്ക ഗാന്ധി നല്‍കിയ മിഠായികളും കളിപ്പാട്ടങ്ങളും വിതരണം ചെയ്തു.

സ്ത്രീത്വത്തെ അപമാനിച്ചെന്ന പരാതിയില്‍ നടന്‍ വിനായകനെതിരെ ആലപ്പുഴ മാവേലിക്കര പൊലീസ് കേസെടുത്തു.

പാലക്കാട് മെഡിക്കല്‍ കോളേജ് ഹോസ്റ്റലിലെ കുടിവെള്ളത്തില്‍ ഇ-കോളി ബാക്ടീരിയ കണ്ടെത്തിയതിനെ തുടര്‍ന്ന് 50-ഓളം വിദ്യാര്‍ത്ഥികള്‍ ചികിത്സ തേടി.

മലപ്പുറത്ത് 23 ദിവസം പ്രായമായ കുഞ്ഞിന്റെ ചേലാകര്‍മ്മത്തില്‍ ചികിത്സാ പിഴവെന്ന പരാതിയില്‍ സ്വകാര്യ ആശുപത്രിക്കും ഡോക്ടര്‍ക്കുമെതിരെ 50 ലക്ഷം രൂപ നഷ്ടപരിഹാരം നല്‍കാന്‍ ഉപഭോക്തൃ കോടതി ഉത്തരവിട്ടു.

കൊല്ലം മുന്‍ എംഎല്‍എ എം മുകേഷ് എംഎല്‍എ ബോര്‍ഡ് മാറ്റിയില്ലെന്ന് കാട്ടി യൂത്ത് കോണ്‍ഗ്രസ് ജില്ലാ കളക്ടര്‍ക്കു പരാതി നല്‍കി.

തിരുവനന്തപുരം തിരുവല്ലം ടോള്‍പ്ലാസക്ക് സമീപമുണ്ടായ ബൈക്ക് അപകടത്തില്‍ യുവാവും യുവതിയും മരിച്ചു.

കരൂര്‍ ദുരന്തത്തില്‍ മരിച്ചവരുടെ കുടുംബാംഗങ്ങള്‍ക്ക് ജോലി നല്‍കാനുള്ള വിജയ് സര്‍ക്കാരിന്റെ തീരുമാനം തെറ്റായ കീഴ്വഴക്കമാണെന്ന് സിപിഎമ്മും സിപിഐയും വിമര്‍ശിച്ചു.

ചെന്നൈയിലെ രണ്ടാമത്തെ വിമാനത്താവളം പരന്തൂറില്‍ നിര്‍മ്മിക്കാനുള്ള ഡിഎംകെ സര്‍ക്കാരിന്റെ പദ്ധതി ടിവികെ സര്‍ക്കാര്‍ ഉപേക്ഷിച്ചു.

കര്‍ണാടകയിലെ യെല്ലാപുരിലുണ്ടായ വാഹനാപകടത്തില്‍ ലോറിയും ജീപ്പും കൂട്ടിയിടിച്ച് ഏഴുപേര്‍ മരിച്ചു.

മഹാരാഷ്ട്ര നാന്ദേഡില്‍ നാന്ദേഡ്-ലാത്തൂര്‍ ഹൈവേയിലെ ഫ്ലൈഓവറിന്റെ ഒരു ഭാഗം തകര്‍ന്നുവീണു.

മഹാരാഷ്ട്ര താനെയിലെ ആശുപത്രിയില്‍ ശിവസേന നേതാവിന്റെ മര്‍ദനത്തിനിരയായ ഡോക്ടര്‍മാരില്‍ ഒരാള്‍ രാജിവച്ചു.

യുക്രൈന്‍ തീരത്ത് ഇന്ത്യന്‍ നാവികന്‍ ദീപക് ദുഡ്ഡിയെ കാണാതായി. നാവികന്‍ കപ്പലില്‍ നിന്ന് കടലിലേക്ക് വീണതായാണ് സംശയം.

അയോധ്യ ക്ഷേത്രത്തില്‍നിന്ന് കടത്തിയ വഴിപാട് പണം പ്രതികള്‍ ഓഹരി വിപണിയില്‍ നിക്ഷേപിച്ചെന്ന് അന്വേഷണ സംഘം. 30 ബാങ്ക് അക്കൗണ്ടുകള്‍ മരവിപ്പിച്ചു.

മൂന്നുപതിറ്റാണ്ടായി രാജ്യത്തെ മുന്നൂറിലേറെ ആഡംബര ഹോട്ടലുകളില്‍ താമസിച്ച് പണമടക്കാതെ മുങ്ങി തട്ടിപ്പു നടത്തിയ തമിഴ്നാട് സ്വദേശിയെ റായ്പുര്‍ പൊലീസ് അറസ്റ്റ് ചെയ്തു.

ജന്തര്‍ മന്തറില്‍ പ്രതിഷേധം തുടരുന്ന കോക്റോച്ച് ജനത പാര്‍ട്ടി പ്രവര്‍ത്തകര്‍ക്കുള്ള റെയിന്‍ കോട്ടുകളും ടാര്‍പായകളും പോലീസ് തടഞ്ഞതായി പരാതി.

പശ്ചിമ ബംഗാളില്‍ തൃണമൂല്‍ കോണ്‍ഗ്രസിന്റെ എംപിമാരായിരുന്ന മൂന്ന് നേതാക്കള്‍ ബിജെപിയില്‍ ചേര്‍ന്നു.

ന്യൂയോര്‍ക്കില്‍ വാഹനാപകടത്തില്‍ ആന്ധ്രാ സ്വദേശിയായ പ്രസന്ന അട്ടല്ലൂരി (25) മരിച്ചു.

ഇറാനിലെ റെയില്‍വേ പാലം അമേരിക്ക തകര്‍ത്തു. തിരിച്ചടിയായി ബഹറൈനിലും കുവൈത്തിലും ഖത്തറിലും ജോര്‍ദാനിലും ഇറാന്‍ ആക്രമണം നടത്തി.

ഇറാന്റെ പരമോന്നത നേതാവ് ആയത്തുല്ല അലി ഖമനെയിയുടെ വിലാപയാത്രയില്‍ പതിനായിരങ്ങള്‍ പങ്കെടുത്തു.

രാജ്യത്തെ ആണവ വൈദ്യുതി ഉല്‍പാദനം വര്‍ധിപ്പിക്കാന്‍ ഓസ്ട്രേലിയ ഇന്ത്യക്കു സമ്പുഷ്ടീകരിച്ച യുറേനിയം നല്‍കാന്‍ ധാരണയായി.

പാക്കിസ്ഥാനിലെ തീവ്രവാദികളുടെ ഒളിത്താവളങ്ങളില്‍ മാത്രമാണ് ഇന്ത്യ ‘ഓപറേഷന്‍ സിന്ദൂര്‍’ ആക്രമണം നടത്തിയതെന്ന് പ്രധാനമന്ത്രി നരേന്ദ്രമോദി പറഞ്ഞു.

കിഴക്കന്‍ ചൈനയിലെ ഷൂ ഫാക്ടറിയിലുണ്ടായ വന്‍ തീപിടിത്തത്തില്‍ 28 പേര്‍ കൊല്ലപ്പെട്ടു.

ടോമാഹോക്ക് മിസൈലുകള്‍ ജര്‍മ്മനിക്ക് വില്‍ക്കാന്‍ അമേരിക്ക അനുമതി നല്‍കി.

അര്‍ജന്റീനയില്‍ പരിശീലന പറക്കലിനിടെ പൈലറ്റ് വിമാനത്തില്‍ നിന്ന് ചാടി മരിച്ചു. ഒപ്പമുണ്ടായിരുന്ന വിദ്യാര്‍ത്ഥിനി വിമാനം സുരക്ഷിതമായി താഴെയിറക്കി.

മെക്‌സിക്കന്‍ അഭയാര്‍ത്ഥിയെ സഹായിച്ച കേസില്‍ മുന്‍ അമേരിക്കന്‍ ജഡ്ജിക്ക് 5,000 ഡോളര്‍ പിഴ ചുമത്തി.

ഇന്ത്യക്കെതിരായ ടി20 പരമ്പര ഇംഗ്ലണ്ട് സ്വന്തമാക്കി. നാലാം ടി20യില്‍ ഒമ്പത് വിക്കറ്റിനായിരുന്നു ഇംഗ്ലണ്ടിന്റെ വിജയം.

മലബാര്‍ ഗ്രൂപ്പിന് കീഴിലുള്ള 51 കമ്പനികളെ അതിന്റെ ഫ്‌ലാഗ്ഷിപ്പ് ബ്രാന്‍ഡായ മലബാര്‍ ഗോള്‍ഡ് ആന്‍ഡ് ഡയമണ്ട്‌സ് ലിമിറ്റഡിലേക്ക് ലയിപ്പിക്കാന്‍ കോമ്പറ്റീഷന്‍ കമ്മീഷന്‍ അംഗീകാരം നല്‍കി.

ആധാര്‍ ആപ്പില്‍ ഇ-മെയില്‍ അപ്‌ഡേറ്റ് ചെയ്യുന്നതിനുള്ള സൗകര്യം യുഐഡിഎഐ ഏര്‍പ്പെടുത്തി. ജൂലൈ ഒന്നുമുതല്‍ ആറുമാസം വരെ ഈ സേവനം സൗജന്യമായിരിക്കും.

കുഞ്ചാക്കോ ബോബന്‍, അര്‍ജുന്‍ സര്‍ജ എന്നിവരെ നായകന്മാരാക്കി ദിലീഷ് പോത്തന്‍ സംവിധാനം ചെയ്യുന്ന പുതിയ ചിത്രം പ്രഖ്യാപിച്ചു.

നീരജ് മാധവ്, അല്‍ത്താഫ് സലിം എന്നിവരെ പ്രധാന കഥാപാത്രങ്ങളാക്കി ആദിത്യന്‍ ചന്ദ്രശേഖര്‍ സംവിധാനം ചെയ്യുന്ന ‘പ്ളൂട്ടോ’ ജൂലായ് 30ന് പ്രദര്‍ശനത്തിന് എത്തും.

നിസാന്‍ ഇന്ത്യയുടെ പുതിയ എസ്യുവി ‘ടെക്ടണ്‍’ ഇന്ത്യന്‍ വിപണിയില്‍ അവതരിപ്പിച്ചു. 10.49 ലക്ഷം രൂപ മുതലാണ് വില ആരംഭിക്കുന്നത്.

വിനായക് നിര്‍മ്മലിന്റെ പുതിയ പുസ്തകമായ ‘ആരും പറയാത്ത കഥകള്‍’ സൈകതം ബുക്സ് പുറത്തിറക്കി.

വൃക്കകളുടെ പ്രവര്‍ത്തനം കുറയുമ്പോള്‍ ശരീരം നല്‍കുന്ന മുന്നറിയിപ്പ് ലക്ഷണങ്ങള്‍ ശ്രദ്ധിക്കണമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. അടിക്കടി മൂത്രമൊഴിക്കാനുള്ള തോന്നല്‍, കാലുകളിലെ നീര്, വിശപ്പില്ലായ്മ എന്നിവ ശ്രദ്ധിക്കണം.